2 Jatianra Ibon Gedeón yoia iki: “Icha jonira ikanai, jatianra en amaa israelitabaon madianitaboareskanti iki, jaskáxonra non koshinbira non ake ixon, ebebonbi shinankanti iki.

3 Jaskara iketian, jonibo yoiwe tsoaboki raketai jaton xobon botankanon”, akin. Jato tanakin Gedeónman jaskáara, rabé chonka rabé waranka jonibo boríbakana iki, jatianra chonka waranka jonires baneta iki.

4 Ikaxbira Ibon Gedeón ati yoiribia iki: “Ichaparira ikanai. Onpax xeanon jato iotanwe, jainoara en jato tanai, tsoaboki mibé kati iki itan tsoaboki mibé katima iki ixon, en mia yoiti iki”, akin.

5 Jatianra Gedeónman onpax xeakanon ixon jato ioa iki, jainxonra Ibon neskáakin yoia iki: “Ja mekenman weataanan ochitinin taxoai keskáakin xeaibora wetsaori min ati iki, jainoax ja chirankootaanan xeaibora wetsaoribiribi min jato imati iki”, akin.

6 Ja mekenman weataanan kexain boxon, ochítinin taxoai keskáakin onpax xeaabora kimisha pacha jonires ikana iki. Jatíribibaonra chirankootaanan, xeakana iki.

7 Jatian Ibon Gedeón yoia iki: “Nato kimisha pacha joniboyaxonra en mato jatíbi xabáai, jaskákinra madianitabo non jatoaresti iki. Jatíribibora moa bokanti iki”, akin.

8 Jatianra jatíribi moa jaton xobonko banéti bokanti Gedeónman yoia iki. Ikaxbi bokanamatianbira, jaton chomoyabi carnero machan tii atibo jato bichina iki. Jaskataxa kimisha pacha joni katokootabo betanres baneta iki, ja madianitabo teshanpain ikanaitianra; jabobiribi manan maxkaten bochiki ikana iki.

9 Ja yaméra Ibon Gedeón neskara ati yoia iki: “Wenitax moa ipakeax madianitabo betan reteanantanwe, min mekemanra jabo menikaatai.

10 Ikaxbi jato peotinin raketira, min yonoti Fura betan jaton carpa peota ikanainko matobichopari kati iki,

11 jainxonra yoyo ikanai min ninkáti iki. Japekáora moa shinan koshiax mia reteananti iki”, akin. Jatianra Gedeón jawen yonoti Fura betan ipakeax jaton rawibo naisi jaton carpa peotainko kaman kaa iki.

12 Ja madianitabo, amalecitabo, jainoax ja bari pikotaiorikea jonibo, manan teshanpain janbiskanara kikinbires jakonma icha chanpo maana keská ikana iki. Jatian camelloboribira aniparo kexakea mashi keská icha iká iki.

13 Jatian jaton rawíbaon carpa peotainko kaxonra, Gedeónman westíora sontáronin ja namata joii wetsa akí neskatai ninkata iki: —En namatara ike, westíora cebada pan noa ikainko kaman joxon tsakaa, westíora carpa peota poxoti —iki ikaitian.

14 Jainxon jabé ikátonin neskáakin yoishokoa iki: —Jara wetsa jawékima iki, Joássen bake israelainoa Gedeónman sontárobo yoii iká riki. Diossenra ja madianitabo jatíbi jain ikáboyabi, Gedeónman mekenman jato menikaamai —akin.

15 Ja namá jaskati yoii iká ninkátaananra, Gedeónman Ibo rabia iki. Jaskáa pekáo jaton carpa peota ikanainko kaxonra, israelitabo neskáti yoia iki: —¡Wenikanwe, Ibonra madianitabo jato jain iká carpa peotaayabi noki menikaamai! —akin.

16 Jatianbira Gedeónman, jawen kimisha pacha sontárobo, jato kimisha tsamáribi jato imaa iki, jainxonra carnero machan tii ati betan, jaweti chomoshoko jawebioma ja bokanai ketea chichó joétaia jato menia iki.

17 Jainxonra jato yoia iki: —Non rawíbaon carpa peota bekeiba kaxon, en akai oinxonra, matonribi jaskashokoti iki.

18 Jatian ja ebé kaaboyaxon ja machan non xoon akaitianra, matonribi ja jaton carpa peota ikain jatíbiain katemakin xoon ashokoti iki, jaskáaira mato saí iti iki: ‘¡Ibo kopí itan Gedeón kopíra non akai!’ iki —akinra jato aká iki.

19 Jaskataxa, Gedeón jawen pacha sontároboya, ja jaton campamento iká bekeiba nokota iki. Yamé pochinikon ikaitian, wetsabo iká pekáo ikai jan jema koirannai sontárobo jikiaitian. Jatianra ja carnero machan xoon akana iki, ja bokanai chomoboribi toekana iki,

20 ja kimisha tsamáa jonibaonra, senenbires ja carnero machan xoon akana iki, jatian ja chomobiribira toekana iki. Jainoax joé keteaxon, jaton mexkao mekenman bokana iki; jatian jaton mekayao mekenman iká iki carnero machan, jainoax koshin saí ikana iki. “¡Reteananti riki! ¡Ibo betan Gedeónmanra mato akai!” iki.

21 Jatianra Israelitabo, jaton carpa peotainoa jato katei tsamataxbi jawe iamakana iki, ikaxbi madianita jonibora, jabati boí sion iakekana iki,

22 jatianribi ja kimisha pacha israelitabaon, carnero machan xoon akin jeneyamakanaitian, Ibon madianitabo jaton kaibobo betanbi reteanamaa iki, jaskatira ja Zerera bain jabati boax Bet-sita kamán, itan ja Abel-mehola mai senenain kaman jabákana iki, ja Tabat ochoma.

23 Jatianra madianita jonibo chibani bokanon ixon, Neftalíkan rarebo israelitabo, Asernin jonibo itan jatíbi Manaséssen jonibo jato kenamakana iki.

24 Gedeónmanra, jatíbi Efraín mainmeaboki, jainoa jonibo yoiti, madianitabo betan reteanani bekanon ixon; jato keshanti jonibo raana iki, jainoax Bet-barain iká paro betan Jordán paro ikain, jain shitáti jakonbo ikainbo jato nokotamatianbi. Efraínman jonibaon jaskáati yoiabo senenhakana iki.

25 Jainxonribira madianitabaon joni koshi rabé, Oreb betan Zeeb janeya yatankana iki. Ja Oreb retekana iki shankan axon, jara akanai rama ja Orebnin shanka, akin. Ja Zeebiribira jainxon uva jamakanai jawen janeya ikainxonbi retekana iki. Jainxon ja madianitabo chibani botana pekáora, Oreb betan Zeebkan mapo, Gedeón boxonkana iki, ja Jordán keiba iketian.