2 Jaskákinra madianitabaon, israelitabo bebonbires jato jakonmaaboreskana iki, jaskati madianitaboki rakékinra mananbaon, kiniaxbo jainoax tsoabi katimainkobo jonétibo akana iki.

3 Jatíbitian israelitabo banáya ikenbira, madianita jonibaon, amalecita jonibaon jainoax bari pikotaiori iká jonibaon bexon jato ramianankatikanai.

4 Jatian ja israelitabaon main beax tsamáxonra, ja Gaza mai kamanbi jatíbi ja moa tsekatires yoábo jato ramiankatikanai, jainxon jatíbi jaton carnerobo, wakabo, burrobo jato keyonankatikanai moa ja pitibi yamatiakin.

5 Jaton carpa peotaboyabi, itan jaton wakaboyabi ja main weixonra, jatíbi keyokatikanai. Kikinbires jakonma chanpo maannax beai keskatira, kikinbires icha camelloyabo bekátikanai.

6 Ja madianitabaon jakáa kopíra, israelitabo ichabires masá tenei winókana iki, ja senenainbira jato akinnon ixon Ibo yokákana iki.

7 Jatian madianitaboibakea, jato Ibon xabáanon ixon israelitabaon yokákanketianra,

8 westíora profeta jato raanxona iki janra neskáakin yoia iki: “Neskárai Ibo, Israelbaon Dios: ‘Enra mato Egiptonkonia pikoa iki, jainra mato koiranxon kikinhakin yanka yonokin jamakana iká iki,

9 ja egipcioboibakeara en mato pikobichoyamaa iki; ja jatíbinin mato masá tenemakanainkoniara en mato pikoa iki. Jabo mato bebonmea potataananra, jaton mai bixon en mato iboamaa iki.

10 Enra moa mato yoia iki, ea riki Ibo, maton Dios, matora rakétima iká iki ja amorreobaon diosboki; ja rama mato jaa mainkoniax, ikaxbira maton ea ninkáxonyamaa iki’ ”, akin.

11 Jatianra Ibon ángel Ofraínhain joáx encina jiwi naman yakata iki, jara Joássena iká iki. Gedeónra Joássen bake iká iki, ja Joássa Abiezernin rarebo iká iki. Uva jamákanainkoxonra madianitabaon oinnaketian jonéxon trigo payani iká iki.

12 Ibon ángelninra jaki pikóxon, neskáakin yoia iki: —¡Ja Ibora mibé iki, koshi itan rakéma joni mia iketian! —akin.

13 Jainxon Gedeónman yoishokoa iki: —Ibó ea jaweayamawe, ikaxbi Ibo nobé ikenbikayaki, ¿Jawekopi jatíbi neskarabo noa winoti iitai? ¿Ja non rekenbaon yoiai jato Ibon Egiptonkonia pikonontian, jatíbi jaskara iosma jawéki aníboki jawerano iki? Ibora noa jenetaanan, madianitabaon noa ikínnon ikax noon ménita iki —akin.

14 Jatianra Ibon já ointaanan yoia iki: —Ja mia jayata koshinbi Madianitabaon mekenmamea ja israelitabo jato xabaatanwe. Ea riki jan mia raanai —akin.

15 Ikaxbi Gedeónman yoiribia iki: —Ja akinbichopari ea jaweayamawe Ibó, ¿Jawekeskaaxonkayaki, en Israelbo pikoti iki? Nokon rarebo, jatíbi manasés jonibora kikin jawebioma iki, jainoax ea riki ja nokon rareboibakea jaton chiníshoko —akin.

16 Jatianra Ibon yoia iki: —Ea mibé iketianra min atipanke. Westíora jonibicho atinra min madianitabo jatoaresti iki —akin.

17 Jatianra Gedeónman yoia iki: —Min oinna ea mii bebon jakon iketian, ja ebé yoyo ikaira ikon iki ixon, en mia jaskáaxon onanti ea westíora jawéki axonwe.

18 Nenoaxpari kayamawe, jakiribi joxon westíora jawéki en mia meniai kaman —akin. Jatianra Ibon yoia iki: —Nenonxobi en mia manabanon, mia joai kaman —akin.

19 Kaxonra Gedeónman, westíora cabra bake nami pitiaxona iki, jainxonra rabé chonka litros harina pan, levaduraoma axona iki; jatian namira tasakan axona iki, jenebiribi kentikan axona iki, jaskáaxonra jatíbi encina jiwi kaman boá iki.

20 Diossen ángelninra, ja nami betan levaduraoma pan aká, shankan marakantaanan jaki ja jene chikoti yoia iki. Jatianra Gedeónman ja ati yoiabo senenhaa pekáo,

21 ángelnin ja nami betan panbo, ja yatana jawen bastón rebon tii aká iki, jaskáara ja shanka meranoaxbi chii tiri pikóxon ja nami betan panbo keyoa iki; ja ataananra Ibon ángel jawen jishnonbi ja bebonmeax keyota iki.

22 Jaskáketianra ja Ibon ángel onantaanan, Gedeón neskata iki: —¡Jawe ireskiaipanon Ibó, Ibó! ¡Ibon ángel betanra ea oinhananke! —iki.

23 Ikaxbira Ibon yoia iki: —Rakéyamawe, miara mawáyamai. Nokon jakon shinanres biwé —akin.

24 Jatianra Gedeónman jain, Ibo axonkin, westíora makan tsama aká iki. Jainxonra janea iki “Ibo riki, jakonhakin tantimamis”, akin. Nato makan tsamara Ofráin japarike, jara Abiezernin rarebobaon jema iki.

25 Ja yamébira Ibon Gedeón neskáa iki: —Ja rabé itin pikota, kanchis baritiaya westíora min papan waka bene biwé. Jainoax ja min papa jayata Baalnin makan tsamara min poxati iki. Jainxonribira, iresama jiwi xate chankata ja rabikanai, ja Baalnin makan tsama patax iká min rerati iki.

26 Jainxonra bochiki shanka mato maxkaten, min Ibo Dios westíora makan tsamá min axonti iki. Ja rabé itin iká waka benera min biti iki, jainxonra ea menikin keyokin min menoti iki, ja iresama jiwi chankata karoaxonra min menoti iki —akin aká iki.

27 Jatianra Gedeónman jawen chonka yonoti jonibo bixon, jatíbi ja Ibon yoia keskábo axona iki; ikaxbira ja jemamea joniboki itan jawen papan kaiboboki rakékin, neten ayamakin yaméres aká iki.

28 Ja nete xabáketianra, ja jemamea jonibaon wenixon Baalnin makan tsama reokana merakana iki, itan ja makan tsama patax chankata iresama jiwiribi rerakana, jainoaxibi makan tsama benáshamantonin, westíora waka bene retexon menokanaribi merakana iki.

29 Jaskatira westíorabo yokakanankana iki; “¿Tson akámein iki, nato jaskáakin?” ikibo. Jaskákin ichabires benakin itan jato yokábokinra, Joássen baken Gedeónman aká onankana iki. Jaskákin Joás keshani boxonra neskáakin yoikana iki:

30 —Min bake noa pikoxonwe, ja reteira noa joke, ¡Janra Baalnin, makan tsama reonaana iki, itan ja makan tsama patax chankata iresama jiwiribira poxanana iki! —akin akana iki.

31 Ikaxbi ja kateax tsamákanketianra, Joássen neskáakin jato yoia iki: —¿Matoki ja Baal akinni beax, jaon parana iki reteanankasi iki? ¡Jaskara iken, nete xabatamatianbi tsoa inonbires, ja Baalnin paranan ikaibo mawápainnon riki! Ja jawen makan tsama reonankana iketian, ja Baal dios ikax ibanon janbix koshiax kopikaati —akin jato aká iki.

32 Jainxonra jatianbi Gedeón, Jerobaal akin janekin peokana iki, jainoaxa ikana iki: “¡Baal ibanon janbix koshiax kopikaati!” iki. Ja Gedeónmanra, Baalnin makan reonaana iká iki.

33 Jatianra jatíbi madianitabo, amalecitabo, jainoax bari pikotaiori iká jonibo Jordán paro shitabaini boax, Jezreel mai teshanpain tsamákana iki.

34 Ikaxbira Gedeón, Ibon shinanman iboaa iki, jainxonra Abiezernin rarebobo tsinkíkanon ixon, carnero machan xoon aká iki;

35 jaskáaribaxonbira jatíbi Manasés jonibo tsinkiti bekanon ixon, jato kenati jonibo raana iki. Jainoaxa Aser jonibo, Zabulón jonibo, itan Neftalí joniboribi jabé tsinkiti bekana iki.

36 Jainxonra Gedeónman Dios yoia iki: “Ja minbishaman yoia keskáakin ikonkon ja israelitabo ea min jato pikomakasai onankaskinra,

37 westíora carnero bichi raniabi, jainxon trigo xemekanainko en akai. Ja bichi raniabi yamékirishoko nibikan mechaa ikaxbi, mai manxanshaman iketianra en onanti iki, ikon riki min ea ja Israel jonibo pikomakasai ixon, ja minbi yoia keskáakin”, akin.

38 Jatianra jaskarashaman winota iki. Jatian Gedeónman yamékiri wenixon, carnero bichi raniabi potsiara westíora taza bochoshoko nibí jene baneta iki.

39 Jaskáaribaxonbira, Gedeónman yoia iki: “Jakiribi en mia tea, eki sináyamawe. Ikaxbi ea keenai riki ja akinbicho tanatinin. Nato bichi raniabira rama manxanshaman ikaxbi, maibiribi nibikan mechaa iti iki”, akin.

40 Jatianra ja yamé Diossen jaskara imaa iki. Jainoaxa ja nete xabáketian ja bichi raniabi manxanshaman ikaxbi, maibiribi nibikan mechaa iká iki.