Débora betan Barac bewaa
5
Ja netebaonra, Débora betan Abinoamman bake Barac neskati bewakana iki:2 “Jatíxonbi Ibo rabikanwe,
Israelhainra reteanankasai jonibo japarikanke,
itan reteanantiain kenakaatax boxon
atipana joniboribi japarike.
3 ¡Ja apobaon ea ninkáxonkanwe!
¡Ja koshi jikixon,
jato ikinnaibaon ea ninkáxonkanwe!
¡Iboki, ea bewabanon!
¡Israelbaon Dioskira ea bewai!
4 Ibó, mia Seírhainoax pikonontian,
itan Edom main mia kanontianra,
nai betan mai shakota iki,
itan naikoinmameax
oi manaa iki.
5 Ibó, mibebonra, mia
Israelbaon Dios iketian mananbo shakota iki,
jainoax Sinaíribi shakota iki.
6 Anatnin bake Samgar itan Jael janontianra,
ja ochó boaibo bain boi jenékana iki,
jatianra pontema bainbi nireskana iki.
7 Ja Israelhainoa jemabora moa jatíbi jenekana iká iki.
Jatianra ea wenita iki,
ea Débora, westíora Israelbaon tita ikax.
8 Maxkáyamaraa iki,
bená dios katotaibo,
ja jema xepotiain reteanankanainbi,
ikaxbira westíora yami panatibi yamaa iki,
nin westíora tsatsitaxobi yamaa iki,
ja chosko chonka waranka Israel jonibaona.
9 ¡Nokon shinanra,
ja Israel joni koshibo betan iki,
itan ja jemamea jonibo,
ja reteanani kati kenaaketian atipana ikábo iki!
¡Jatíxonbi Ibo rabinon akanwe!
10 Ja burro awin manxantanitonin peyakaabaon,
jainoax ja mato rakóti jakonshaman kakaax yakatabaon,
itan ja mato ochó boaibaonra maton yoiti iki.
11 ¡Jain ja yoinanin onpax xeainkoxonbi,
itan ja tsan ikai platillobo maketai meranbi,
Ibonra jato ake iki, ikanwe,
jawen jemaboyaxonbira
Israelnin jatoareske iki, ikanwe!
12 ¡Jishtenwe Débora, jishtenwe,
jishténtaanan westíora bewá bewawe!
¡Jainoax mia Barac,
Abinoamman baké,
wenítaanan min presoabo botanwe!
13 Jatianra israelitabo koshi jonibo betan reteanani bokana iki,
jainoaxa Ibon sontároboribi
eon parana iki bekana iki,
reteananai jonibo betanra reteanankana iki.
14 Jaweti Efraínman joniboresa mai teshanpain bokana iki,
jatianra jato pekáo Benjamínman sontárobo boá iki,
jainoxa Makirnin joni koshibo ipakekana iki,
Zabulónman jato ikinai joni koshiboribira bokana iki.
15 Jainoaxibira Isacarnin joni koshibo,
Débora betan bokana iki,
jatian Isacar iká iki Barac akinnai,
jaskatira manan teshanpa pekáo kaa iki.
Ja Rubenman sontárobo ikonbires koshi shinanyabo ikenbiki,
16 ¿Jaweaki nato neno carnerobo tsinkitainko,
ja koiranaibaon carnero kenaitian ninkákasi mato banetarin?
¡Ja Rubenman sontarobora,
ikonbires koshi shinanya jonibo jaríbake!
17 Galaadbiribi Jordán paro keiba iká iki;
Danra, wapórobo tsamatainko baneta iki,
jatian Aserbiribi, aniparo kexá banetax,
moa jainoax taxkeyamaa iki.
18 Ikaxbi ja Neftalí jonibo betan Zabulón jonibora,
reteanani onsáinbiribi ikana iki.
19 Jatianra apobo bekana iki ja Taanac ikain,
Meguido wean patax,
jatian cananeo apobobiribi
reteananti shinanya ikax bekana iká iki,
ixonbira jawe koríkibi, nin kopí jawékibi boyamakana iki.
20 Naikanmea wishtinbora,
jato ikanainoaxbi Sísara betan reteanankana iki;
21 ja moatian wean,
Cisón weanmanra jatíbi jato keyo boá iki.
¡Minra koshi jonibo ikenbi jato keyoti iki!
22 ¡Cabayobaon maitibora tsaran iiboankanai!
¡Ishtoshamanra kabayobo taróx iibainkanai!
23 Jatianra Ibon ángelnin yoiai:
‘¡Ibanon Meroz betan jawen joniboki,
kikinbires jakonma paketi!’
Ja koshi jonibo ikaxbi,
Ibo akinni joyamaa iken, ixon.
24 ¡Jatíbi ainbobo xaranmeaxa,
ja quenita joni Hebernin awin Jael
bebonbires jakon iti iki!
¡Ja jain tsamákana ainbobo xewinbainbiresa jakon iti iki!
25 Sísaranin onpax yokáketianra,
Jaelnin, ¡Jakonshaman tazónman leche sero menia iki!
26 Ja akai kamanra,
jawen mexkao jiwi kensho bixon,
jawen mekayaobiribi jan teeti mazo bia iki,
jainxonra mapoki rishkikin toexon
jawen impé itinko Sísara tasaa iki.
27 Chexakaati yoshoaketanaxa,
Jaelnin taenaman paketax Sísara tarameta iki;
ja jain paketainoaxbira mawata iki.
28 Sísaranin titara, masá tenei,
ventanan kepentaanan neskata iki:
‘¿Jawekopiki, jawen carro nokóyamai basiai?
¿Jawekopíki, jawen reteananti carro jomenyamai basiai?’ iki.
29 Ja yonokaatai bebon onan ainbobaon yoiara,
ja joiribi janbi banekin yoiribia iki:
30 ‘Natotianra reteananxon bia jawékibo jato menia bii ikanai.
Ja retenana jonibaonra westíorabaon,
westíora iamaxon rabé ja yanka yonoti ainbobo bikanai,
Sísaranara westíora iamax rabé chopa meskó jisá iti iki;
ja reteanankin jatoaresa jonibaonara,
jaton texonko ati meskó jisá yomanbaon kewea iti iki’.
31 ¡Jatíbi min rawibo, jaskáakin jato keyoa ibanon Ibó,
ikaxbi jan mia noiabo ibakanon,
jatíbi jawen koshiaxonbi barin tenai keskati peneti!” iki.
Japekáora chosko chonka baritia senen, ja main jakonbires jakana iki.