2 jaskákinra Ibon, Jabínman jato ikínnon ixon menia iki, jara Hazor jemamea koshi ikax cananeo apo iká iki. Jawen sontárobaon koshin janera Sísara iká iki, jara iká iki Haroset-goimhain jaa.

3 Jabínra iskon pacha yami carroya iká iki, jaskákinra israelitabo rabé chonka baritia akonbireskin jato masá tenemaa iki, jatianparira jato akinnon ixon Ibo yokákana iki.

4 Jatianribira israelitabo, westíora profeta ainbaon koshi jikitaanan jato ikinna iká iki. Jara Lapidotnin awin, jawen jane Débora iká iki.

5 Jakopíra israelitabo join ikax jato akinnon ikax Déboraiba bokátikanai, ja Déborara xebon naman yakati axea iká iki, (jakopíra jain, “Déboran xebon”, akin onankana iká iki). Jara Efraín mananman Ramá betan Betel naxaran iká iki.

6 Wetsa netera, Neftalí jonibaon jemamea Abinoamman bake, Cedesain jaa joni Barac janeya, Déboranin ja kenati jato raana iki, joketianra neskáakin yoia iki: —Israelbaon Ibo Diossenra neskara yoike: ‘Minronki Neftalí jonibo betan Zabulón jonibo chonka waranka, Tabor mananman jato tsinkiti iki.

7 Enra mibé reteananon ixon, Jabínman sontárobaon joni koshi Sísara, jawen carroyabi sontárobo, Cisón weain jomai. Ikaxbira en amaa min jabo jatoaresti iki’, iki ixon —akin aká iki.

8 —Jatianra Baracnin yoia iki: mia ebébi kaaitianra ea kati iki. Ikaxbi mia ebé kayamaitianra ea katimaribi iki —akin.

9 Jatianra Déboranin yoia iki: —Jakon riki eara mibé kati jake. Ikaxbira min onanshamana iti jake, ja rama min akaitonra min jawebi ayamai, Ibonbi amaara westíora ainbaon jawen joniboyabi Sísara reteti iki, jaskáaxa rabikaati iki —akin. Jatianra Débora, Barac betan Cedesain kaa iki.

10 Jainxonra Zabulón betan Neftalí jonibo, Baracnin jato kenaxon tsinkia, chonka waranka joni ikana iki. Jatianra Débora jato betan kaa iki.

11 Cedes ochóma, Zaanaim teshanpainra Heber quenita joni, jabé quenitaboibakeax pikotax carpa peotaax jaa iká iki, jara Moiséssen rayosen Hobab jonibaon chiní bake iká iki.

12 Jatian Barac, Tabor mananman joá ninkáxonra Sísaranin,

13 jatíbi jawen iskon pacha yami carroyabi sontárobo tsinkia iki, jaskáaxa jato betanbi Haroset-goimhainoax Cisón weain kaman kaa iki.

14 Jatianra Déboranin Barac yoia iki: —¡Moa bokanwe, ramara Ibon ja Sísara miki menikamai! ¡Min sontárobo bebonra Ibo kaai! —akin. Jatianra Barac, jawen chonka waranka sontároboya Tabor mananmameax, ipakea iki.

15 Baracnin sontárobo, moa Sísaranin sontárobo itan carromeabo betan moa reteanankanainbira, Ibon akonbireskin jato raké shinan yatanmaa iki. Jaskatira Sísararibi, jawen carromeaxbi pakétaanan taenbires jabati kaa iki.

16 Jaskákanaitianra ja sontárobo jaton carroyabi, Baracnin Haroset-goimhain kaman jato chibana iki. Ja netera nin westíora Sísaranin sontárobi, texetimaakin jato retekin keyokana iki.

17 Jatianra Sísara, jabati taenbi kaax, Jaelnin xobonko nokota iki, jara Heber quenitanin awin iká iki. Jabín, Hazorhainoa apo Hebernin kaibobo betan moa jakon iká ikaxa, joáx jain nokota iki,

18 janra jowé ataanan neskáakin yoia iki: —Rakéyamai neno jowé, nokon ibó —akin. Jaskáa Sísara jikiketianra, Jaelnin jonekin ani rakótinin mapoa iki;

19 jainxonra Sísaranin ikonbiresi nomikin, Jael onpax yokáketian, bichi pisha kepentaanan, jain leche benxoa ixon ja xeamaa iki, japekáora maporibia iki.

20 Jainxonra Sísaranin yoia iki: —Xobo xepotiain banéwe, jawe keska ixon tson inonbires joxon mia yokáti iki, tsoabiki neno chichó yamaa akin, jatianra yamarake akin min ati iki —akin aká iki.

21 Ikaxbi Sísara, ikonbiresi paxkina ikax kikini oxaa iki. Jatianra Jaelnin martillo betan jiwi kensho jan carpa xobo tewanai bia iki, biax netéshamanax Sísara ikain kaxonra, maikibi kataxbainkin, jawen impé itinko tasaa iki. Jaskaaxonra Sísara retea iki.

22 Jatian Baracbiribi, Sísara benai nokóketian Jaelnin jowé ataanan neskáakin yoia iki: —Jowé, ja min benai iitai en mia oinmanon —akin. Jaskáa Barac xobo meran jikixon, moa Sísara mawá rakata meraa iki, jawen maponko jiwi kenshon maikibi tasaxon retekana.

23 Jaskáaxonra ja netebaon, Ibon cananeobaon apo Jabín, Israelbo bebonbi kikin namanbires imaa iki.

24 Jatianra Israelbaon, ja apo Jabín keyoai kaman, itikomabiresbo imaxonkana iki.