2 —Non kaibobaon janenko en mato yoiai riki; Siquemhainoa jonibo maton jen imati, westíora jonibicho koshi jikiara jakon iti iki ixon, jatianra jatíbi Jerobaalnin kanchis chonka bakebo itima iki —akin.

3 Jatianra ja Abimelec jaton kaibo iketian, jawen joi ninkáxonkin jen akana iki. Jatianra jawen kaibobo Siquemhainoabo jato betan jaboribi bokanon ixon jato yoii bokana iki.

4 Jaskáaribaxonbira, Baal-berit rabikanai xobonkonia kanchis chonka plata koríki bixon, Abimelec menikana iki. Ja koríkininra Abimelecnin jaweti jakonma jonibo já chibani bokanon ixon bia iki, ja jonibora jabé bokana iki,

5 ja Ofráin, jain jawen papa Jerobaal jakátiainko, jainxonra Abimelecnin jawen kanchis chonka wetsabo, westíora makankibicho jato retepakea iki. Ja Jerobaalnin chiní bake Jotamra, jonetax jabichosoko kishpinna iki.

6 Japekáora, jatíbi Siquemhainoabo betan Bet-miloainoabo tsinkikana iki, encina jiwi itan iresama makan patax ja Siquemhain, jainxonra Abimelec apo janekana iki.

7 Jaskara onanaxa Jotam, jatixonbi ninkátii Gerizim manan bochiki kaax, kikin koshin saí ika iki: “¡Eapari ninkákanwe Siquem jonibó! ¡Jatianra matoribi Diossen ninkáxonti iki!

8 Iitibira jiwibo apoya itin keenkana iki, jainxonra olivo jiwi jaton apo imakaskin yokákana iki.

9 Ikaxbira keenyamakin olivo jiwin jato yoia iki, jiwibaon apo jikiaxbira ea moa xenii jeneti iki, jara jonibo itan Dios jakon ninkakamai iki, akin.

10 Jatian jiwibaon higuera jiwi apo imakaskin yokákana iki.

11 Ikaxbi keenyamakin higuera jiwin jato yoia iki, jiwibaon apo jikiaxbira ea moa batashaman, itan noeshaman bimii jeneti iki, akin.

12 Jatianronki jiwibaon uva apo imakaskin yokákana iki.

13 Ikaxbi keenyamakin uva jiwin jato yoia iki, jiwibaon apo jikiaxbira ea moa uva bimii jenéti iki, jankaya joniboyabi Dios raromai ikenbi, akin.

14 Ja senenainbira, jiwibaon moxa jiwi apo imakaskin yokákana iki.

15 Jatianra moxan jato yoia iki, jabo ikoni jaton apo já itin keena ikax, jatikaxbi jawen ota naman ikanti; ikaxbi jaton apo já itin keenyamakanaitianra, jaibakeax chii pikóxon, ja Líbanoainoa konxanbo keyoti iki, akin.

16 Ramara en mato yokatai: ¿Ja Abimelec apo imakinki, maton akonkin shinanxon itan atikeskabiakin imaa iki? ¿Jainoax ja Jerobaal iki jawen rarebo betanbi, jan mato aká keskáribiakin noibaxonki maton jato jakonhaa iki?

17 Jaskara ikenra, nokon papa mato kopí, jawen jati onsá meranbo winota iki, mato madianitabaon iboa iketian pikonoxa reteanana iki;

18 matobiribi jaskáyamakin, nokon papan kaiboboki ramiti mato yoitimaa iki, jainxon jawen kanchis chonka bake westíora makainbicho perakanxon maton retea iki. Jaskáxonra maton Abimelec apo janea iki, Jerobaalnin jawen yonoti betan bakea, maton rarebo iketianresa maton jaskáa iki.

19 Ikaxbira rama en mato yoiai: Akonkin itan atikeskabiakin ja Jerobaal jawen rarebo betanbi jakonhaa ixonra, Abimelec betan mato jakonribi iti iki, jainoax jaribi mato betan jakon iti iki;

20 ikaxbi jaskarama iketian, ibanon Abimelec meranoax chii pikóxon, Siquemhainoabo betan Bet-miloainoabo, jato jatíbi keyokin, jawekeska ikax iti iki, Siquemhainoax betan Bet-miloainoax chii pikóxon jábiribi retekin”, akin jato aká iki.

21 Jaskáakin jato yoia pekáora, Jotam jawen wetsa Abimelecki raketai kopí jabati Beerhain jaai kaa iki.

22 Ja Abimelecninra, israelitabo kimisha baritia senen iboaxon jato ikinna iki.