25
Jawetianki joni rabe join ianananbekonai, jatianra ja joi benxoai joni koshibo tsinkita bebon kati jake, jabaon jato oinxonon ikax, jatianra jan jakonma akáma onanxon, jabaon yoiti iki natonra jakonma akáma iki ixon, jatian jan jakonma akábiribira, natonra masá teneti jake ixon yoikanti iki.2 Jan jakonma aká kopi rishkiti ikenra, main rakanxon ja jakonma aká betan senenribi, já bebonxon rishkiti joi benxoaitonin yoiti iki.
3 Jawekeskaxonbira chosko chonka winomatan jato rishkitima iki, mato keskáribi joni ixonbira bebonbires masá teneax, jakonmairaton shinanmeenake.
4 Wakan bero xemeaitian xenexshamakanwe.
Wayonman jane keyómatima
5 Jawen wetsa betan ja xobonbicho jabékona ixonbi, wetsan mawákin jawe bakebi potabainyamaketianra, ja benomaata ainbo, wetsa joni jawen benen rareboma betan benotima iki. Jawen beneitsara jawen bene iti biti iki, jaskáaxonra ja beneitsa ixon ati jawekibo jabé senenhati iki.
6 Ja ainbobaon reken bakera, jawen wetsa mawataton janen ati iki, jaskáaxonra Israel jonibo xaranmea jawen jane keyómatima iki.
7 Ikaxbi ja joni jawen awinwetsa betan wanokashamaitianra, jainxon jato joi benxoaxonkanainko ja ainbo kati iki, jainxonra joni koshibo yoiti iki: ‘Nokon beneitsara jawen wetsan jane Israel jonibo xaranmea keyóyamai jatin keenyamai; ja nokon beneitsa ixon atira jan ebé senenhakashamai’, akin.
8 Jatianra ja jemamea joni koshibo, ja joni kenaax jabé yoyo ikanti iki, ja ainbo betan wanotinin kikinni keenyamaitianra,
9 ja joni koshibo bebonxonbi jaki ochómakainxon, jawen awinwetsan ja jonin taenkonia jawen sandalia bichinxon, betoshba axon yoiti iki: ‘¡Jawen wetsa bakeaxonkashamai jonira jaskaati iki!’ akin.
10 Jatianra Israel jonibo xaran, ja jonin rarebobo janekanti iki, ‘zapatoyaomabo’, akin.