Reken iká bimibo Dios meniti
26
Min Ibon, ja iboanon ixon mia menia mainko jikiax moa jain jaxonra,2 ja main min banaa reken iká bimibo min tsekaa, westíora tasakan axon min boti iki, jain jawen jane iti ja Ibo Diossen katotainko.
3 Jatianra jain iká sacerdote min kaxon yoiti iki: ‘Ramara en akai nokon Ibo Dios bebonxon onantiakin yoikin, ja non rekenbo akonkin meniti ixon Ibon yoini mainkora ea moa jikike’, akin.
4 Ja min menia tasá bixonra sacerdotenin, jainxon min Ibo Dios jawéki meniti makan tsamana bebon ati iki;
5 jatianra min Ibo Dios bebomeax neskara joibo mia yoyo iti iki:
‘Nokon reken papa arameobora, westíora tsamá ichamashoko wetsankobo boanhatanaibo iká iki,
Egiptonko boaxa jain jaai banékana iki,
jainoaxa ani jema banetax,
kikin koshi itan kikin icha kaikana iki.
6 Jaskara ikenbira, egipciobaon noa jakonmaakana iki,
akonbireskinra noa masá tenemakana iki,
jakonmaakinbires yonokinra, noa onitsapimakana iki.
7 Jatianra ja non reken papabaon Ibo Dios, noa akinnon ixon non yokata iki,
jatianra non yokatabo noa jan ninkáxona iki,
jan oinnara noa jawebiomabires iká iki,
ja non akai teebora jakonma iká iki,
jaskáakin noa akana non masá teneaibora, jakonmabires iká iki;
8 jawen ani koshira pikoa iki,
jaskáaketianra jawetianbi jaskara iosma ani onsá jawékibo winota iki,
jaskara meranoara, Egiptonkonia pikoxon,
9 nato neno noa bea iki, jaskáaxonra jatíbitian jain icha jawékiati,
jaainko noa bea iki.
10 Jaskara iketian riki, ja main banaa reken iká bimibo ea Ibon menia rama en bea’, iki. Japekaora jatianbi min Ibo Dios bebon ja tasá akáx, jan oinketian rabii mia chirankooti iki.
11 Jaskaa pekáora min fiesta atiki, mia itan ja min rarebobo, jatíbi jakon jawékibo min Ibo Diossen mia menia kopí. Mia raroaitianra Levitabo betan wetsankoniax joax mato xaran jaa joniboribi, miibetan raroti iki.
Jawéki chonkankonia westíorabo meniti
12 Jawetianki jawen kimisha iti baritia nokotai, jatian riki jatíbi jawéki chonkankonia westíorabo meniti, jaskara iketian, jatíbi min bimibo chonkankonia westíorabo bipakexon, janbiribi tsamanxon min meniti iki, ja Levitabo, itan ja wetsankoniax joax maton main jaabo, ja kachianabo jainoax benomatabo, abákanon jaton jemanxon jatíbi jaton keenakeskáakin pikin ixon,
13 jaskáakin axonra ja min Ibo Dios bebonxon min yoiti iki:
‘Moara nokon xobomea en tsekaa bimibo, jato menitibiribi janbiribi apakexon en jato
menipakeke, ja en jato meniabo riki, Levitabo,
wetsankoniax joax non main jaabo, ja kachianabo, jainoax benomatabo, jatíbi jabora min ati yoiabo senenhakin en jato iboamake, yoitimayamaira ja min ati yoiabo senenhai jawebi ea shinanbenoyamake.
14 Jainoara en jawebi piama iki,
mawákana kopí onisai ikax keráspari inontianbira en akáma iki,
mawábaon kayaboribira en meniama iki.
Nokon Ibo Diossé, miara en yoiti ixona iki,
jatíbi min ati yoiabora en senenhaa iki.
15 Naikanxonbi oinwe, ochaoma min jakon xobonkoxonbi,
jaskáaxon, min joni israelitaboyabi ja min noa menia mai, jakonhakin noa shinanxonwe,
jainra jatíbitian icha jawékiati jake, non rekenbo jaskara axonti min yoini keskáakin
awé’, akin.
Israel riki, Diossen jonishamanbo
16 Nato esébo itan ja senenhati joibo senenhai axenon ixonra, min Ibo Diossen rama mia yoike, min shinanyaxonbi, itan min kayayaxonbi akonkin shinanxon senenhawe.
17 Onantiakinra min rama yoike, ja Ibo Diossa nokon Dios iki ixon, jainxonra min yoike jan yoiabo senenhati, ja jawen esébo, ja jawen joibo, itan ja jato senenhamati jawen koshi joibo, jatíbitian já yoiti ixontira min yoike.
18 Ramara Ibonribi onantiakin yoike, mato Israel joniboronki iki jawen jonishamanbo, ja moatianbi mato jaskaati yoini keská, jainxonra yoike jatíbi jan yoia joibo maton senenhaxonti.
19 Jan aká wetsa jemabo xewina kikinman rabikaatai, itan jakonman ninkakaatai westíora jemara mia imai, jatianra jaskara iti jan yoia keská mia ikai, ja min Ibo Diossen jonishamanbiribi”.