2 Ja ainbora, moa xobomeax pikota pekáo wetsa joni betan benoti atipanke,

3 ikaxbi ja wetsa pekáo bia jawen benen atiki, omisxon enra mia potai iki iká kirika wishá menixon, jawen xobomea raankin, iamax ja chiní bia jawen bene mawáti iki,

4 jatianra jawen reken bene ikátonin, jaskara kerás iketian jakiribi ja ainbo biti atipanyamake, jaskara akára Ibon oinna ja omistibires jawéki aká iti iki, ja iboati mai ja maton Ibo Diossen mato menia, iresabires jakonma imayamakanwe.

5 Wanoa bená ikaxa, joni reteanantiain katima iki, westíora baritia senenra ja senenhati wetsa teebo maton amatima iki; jaskataxa jatio basi jawe ayamai jawen xobon iti iki, jawen awin raromati kopí.

6 Mia ribinkana tsoabi jawen mekemanbi jan reneti, itan jawen reneti makan jato bichinyamawe, maton jaskaara ja mato ribina kopí jawen jati maton bichina keská iti iki.

7 Jabé israelita joni ikenbi yatanxon jawen yanka yonoti iti, iamax jaon maronoxon boaitian meraxonra, ja joni moa reteti iki, jaskáaxonra matoibakea jakonma maton keyoti iki.

8 Lepra isin jaketian, sacerdote Levitabaon mato yoiabo akonkin senenhakanwe. Jabo jaskara ati en yoia keskáshamanra jatíbi maton ati iki.

9 Egiptonkoniax pikotax mato bain kaaitian, maton Ibo Diossen María aní shinankanwe.

10 Jaribi banenoxon ribinkin mibé jonin mia jawéki bichinaitian, jawen xobon jikixon ja kopíai kaman iti jawen jawéki, jawebi bichinyamakanwe.

11 Jemanxonbi manakanwe, ja mato potaxonai jawéki abanon janbi pikokin ixon.

12 Jawebioma joni ixon, ja mato ribinkin bichinai kopíai kaman, jawen rakóti matoiba iti mato meniaitian biax, yametai kaman jayá iamakanwe;

13 jan oxai rakoti iketianra moa bari jikiaitian maton banexonti iki. Jatianra jan mato jakon inon ixon shinanxonti iki, jaskáaxonra maton Ibo Dios bebonxon jakon jawéki maton aká iti iki.

14 Jawékioma ikax onitsapitai joni yonoax jawékia iamakanwe, basiamakin kopiákanwe, maton kaibo iamax wetsankonia joa joni inonbi, maton jemanko jaa jaskáayamakanwe.

15 Teeketian bari jikiamabi ja netenbi kopiákanwe, jawebioma ikaxa jan jati kopi ja koriki maxkáke. Maton jaskáyamaketianra matoki jakonma shinanni, Ibo keshani saí iti iki, jatianra ja ocha maton iboati iki.

16 Jaton bakebaon jakonma aká kopira, ja papabo retetima iki, jaton papabaon jakonma aká kopíra bakebo retetima iki, westíorabora jaton ocha kopíbiribi mawáti iki.

17 Wetsankoniax joá joni, itan ja kachianabo atima keskáakinbo ayamakanwe, benomaataton mato ribinaitian, ja kopíai kaman matoiba iti jawen chopa bichinyamakanwe.

18 Egiptonko kikinni yanka yonokaataibo mato ikátiai shinankanwe, jainoara maton Ibo Diossen mato tsekaa iki; jaskákinra jatíbi ja nato jawékibo senenhati en mato yoiai.

19 Maton wainkonia trigo tsekakin, westíora senbó bimi benoax banéxon biamakanwe; ja mato betan jaa wetsankoniax joa jonin bibanon, iamaxon ja kachianatonin bibanon, iamax ja benomaataton bibanon, jatianra jatíbi maton tee akainkobo, maton Ibo Diossen mato jakon shinanxonti iki.

20 Olivos jiwinkonia aceituna tsekakin, ja moa maton jainoa tsekaa ponyain maton benoa aceitunabo tsekanoxon benayamakanwe; ja wetsankoniax joa jonibaon bibanon ja aceitunabo, ja benomaatabaonribi bibakanon.

21 Ja uva jawen jiwinkonia tsekakin maton benoabo binoxon, ja jiwibotiibi jakiribi benayamakanwe, ja uva banetabora wetsankoniax joa jonibaon biti iki, kachianabo betan benomatabaonribira biti iki.

22 Shinankanwe matoribira Egiptonko kikinni yanka yonokaataibo iká iki; jaskara kopíra en mato yoiai, jatíbi ja ati en yoiabo maton senenhanon ixon.