23
Jatianra Balaamman yoia iki: —Jainxon yoina menoti kanchis makan tsamá ea neno axonwe, jainxon kanchis waka bake bene itan kanchis carneroribi moa onantiawe —akin.2 Jatianra Balaamman yoia keská Balacnin aká iki, rabéxonbira ja makan tsamanabotiibi, westíora waka bake bene itan westíora carnero jaton diosbo menikin keyokin menokana iki.
3 Jaskaa pekáora Balaamman Balac yoia iki: —Ebé nokoananni Ibo joai oinni ea kaai kaman, nato yoina keyokin non menoa patax banéwe. Jan ea yoia joi onanxonra en mia ninkámati iki —akin.
Balaamman Israel jakonhakin shinanxona
Jatianra tsoa jonibi jain jaama manan keyámatani ikain Balaam kaa iki,
4 jainxonra Diossen oinmaa iki. Jatianra Balaamman yoia iki: —Kanchis tsamára en makan tsamanke, jaskáaxonra ja makan tsamábotiibi westíora waka bake bene itan westíora carnero menikin en menoke —akin.
5 Jatianra Balaamman kexain ja yoiti joi Diossen aká iki, jaskáaxonra yoia iki: —Jakiribi Balac ikain kaxon nato en mia yoia joiribi yoitanwe —akin.
6 Jatianra Balaam jakiribi ja Balac ikain kaa iki, kaxonra nokoa iki jatíbi moabita joni koshibo betan, jainxon yoina menoti makan tsamana patax chankata.
7 Jatianra Balaam ja yoiti joi bia yoii neskata iki:
“Aram, bari pikotaori, iká mananman ea ikenbira,
Moab apo, Balacnin kenamaa ea jainoax joá iki.
‘Jomenwe akinra ea aká iki. Israel jakonma inon ixon, jakonmaakin shinanxoniwe.
Jacobnin jonibo jakonma itin keenxoniwe’.
8 Ikaxbi, ¿Jaweatiki ja Ibon jakonmaakin shinanxonyamai en jakonmakin shinanxonti iki?
¿Jaweatiki Diossen ayamaibi en jakonmakin shinanxonti iki?
9 Nato shanka keyáinxonbira en ointi atipanke,
nato manan keyáma ikaixonbira en oinke:
jatonbiribi jaa jonibo riki,
wetsa jemamea jonibo keskámara ikanai.
10 Mai poto keská ichara ikanai; ¿Tsonki jato toponti atipana?
¿Tsonki onanti atipana jaweti ichaki ikanai ixon?
¡Ja atikeskabiakin akai jonibo ikai keskati ea mawápainnon riki,
jato iká keskati itínra ea keenai!” iki.
11 Jatianra jaskara atima Balaamman aketian Balacnin neskaa iki: —¿Jawe akíki mia iitai? Nokon rawíbo jakonma ikanon ixon jato jakonma shinanxontira en mia bea iki, jaskara ikenbira jakon ikantiakinres min jato shinanxonke —akin.
12 Jatianra Balaamman yoia iki: —En ja yoiti joi Ibon nokon kexain aká yoitibichoresa non shinan abékona iki —akin.
13 Ikaxbira Balacnin teaboresa iki: —Wetsanko kanon kawe, jainxonra jaton peotabo katemakin min ointi iki, jatíbi peotara min ointima iki. Jainxonbi ea jato jakonmakin shinanxoni kawé —akin.
14 Jaskáxonra Pisga manan maxkaten, ja Zofim mai masenenshaman ikain Balacnin Balaam boá iki, jainra yoina menoti kanchis tsamá makan aká iki, jaskáaxonra ja makan tsamábotiibi westíora waka bake bene itan westíora carnero menikin menoa iki.
15 Jainxonra Balaamman Balac yoia iki: —Neno banéwe, nato makan tsamana patax, ea Dios betan nokoanani kaai kaman —akin.
16 Jatianra Ibon Balaam nokoa iki, ja nokoxonra ja yoiti joi jawen kexain aká iki. Jaskaaxonra yoiribia iki: —Balac ikain karibatanwe, ja en mia yoia keskáshamanribi yoitanwe —akin.
17 Jakiribi kaxonra Balaamman Balac nokoa iki, moabita joni koshibo betan ja yoina menoti makan tsamana patax chankata. Jatianra Balacnin yokata iki: —¿Jaweki Ibon mia yoia? —akin.
18 Jatianra Balaam ja joi yoii neskata iki:
“Zipornin bake, Balac,
ea kikinhakin ninkáwe.
19 Diossa noa keskáma iki:
jansoyamarai, wetsa shinanra ayamai.
Westíora jawéki iti yoiara, ikai.
Ja jawéki jato axonti yoixonra, senenhai.
20 Jakon inon ixon jato jakonhakin shinanxonti ea yoia riki;
jakon ikanon ikax Dios jakoni yoyo ikaitianra,
ja bechimai ea jakonmai yoyo iti atipanyamake.
21 Israel, Jacobnin chiní bakebaon jato parannaira, tsonbi oinnama iki,
jato jakonmaairibira tsonbi oinnama iki.
Jaton Ibo Diossa jato betan iki,
jara jaton apo iki.
22 Diossenra Egiptonkonia jato pikoa iki,
búfalo wakan koshi keskaraton.
23 Israel ati jakonma koshonra jawemabi iki;
Jacobnin chiní bakebo ati yobébora jawemabi iki.
Rama riki jatian Israel non neskáakin yoiti:
‘¡Ichabires ratéti jakon jawékira Diossen mia axonke!’ akin ati.
24 Nato jonibo amiskasi wenitara
león keska iki,
yoina reteai kaman tantiamai keskatira,
Israelbo jawen rawíbo jatoaresa oinnama ikax tantitima iki”, iki.
25 Jatianra Balacnin jaskáketian Balaam yoia iki: —¡Nato jonibo jakonma ikanon ixon jato jakonmaakin shinanxontira moa min atipanyamake, jakon ikanon ixon jato jakonhakin shinanxonyamawe! —akin.
26 Jaskaara Balaamman yoia iki: —¿Miaki en yoiyamaa iki, ja Ibon ati yoiabichores en ati atipana? —akin.
27 Jatianra Balacnin yoia iki: —Neri jowé, enra mia wetsanko ioai. Jainxon ja Israelbo jakonma shinanxonaitianra, miabira Diossen amati iki —akin.
28 Jaskaaxonra Balacnin ja Peor manan maxkaten Balaam boá iki, jainxon oinnara ja jawebi jain xoxoyamai manan jatíbiain jishtibires iki.
29 Jainxonra Balaamman ja Balac yoia iki: —Neno ea axonwe kanchis makan tsamá jainxon yoina menoti, jainxon kanchis waka bake bene itan kanchis carnero bene retexon ea bexonwe —akin.
30 Balacninra ja Balaamman yoia keská aká iki, jatianra ja makan tsamanabotiibi, westíora waka bake bene itan westíora carnero bene, menikin menopakea iki.