24
Ikaxbi Balaamman oinna, Israel jakon inon ixon jakonhakin shinanxonti Ibon keen iketianra, wetsatianbo apachoai keskáakin ja joi Balac yoinox, Dios yokati moa kayamaa iki, ja kayamakinra jawebi jain xoxoyamai mananhorires oinna iki.2 Jatian Balaamman ja Israel jonibobires ikax, jawen rarebobo betan carpa peotabaon tsamákana oinketianra, Diossen Shinan jaki joá iki;
3 jatianra jaskara iti yoii Balaam yoyo ika iki:
“Beornin bake, Balaamman yoia joi,
bebankin oinmis joni,
4 jawen shinan wetsakainxonra kikinhakin oinnai,
jatíbi atipana Diossibakeara, joibo biai.
Jainxonra ikamatianbi jaskara itibo oinnai.
5 ¡Israelnin chiní bakebaon carpa xobobora jakonshokobo iki!
¡Israel joní, min carpa peotabora metsáshaman iki!
6 Xebon nenketi joyota keská riki,
metsá joabo paro kexá banaa keská,
áloe joa xobibo Ibon banaa keská,
¡Jene kexá konxán jiwibo nia keská riki mia!
7 Israelra ja xeati,
itan jawen banábo tachiti icha onpaxya iti iki.
Jawen apora, Agag xewina koshi iki;
apo ixon jato ikinna maira ani, itan ninkakatai iki.
8 Egiptonkonia jan jato pikoa, Diossa, jatona
búfalo waka machan keská iki.
Wetsa mainmeabo jawen rawíbora Israelnin keyoti iki;
jatora xao sekenti iki,
jainxonra jawen pian jato tsakati iki.
9 Jawetianki tantii rakatai, jara león keska iki:
jaskara iketianra tsoabi já oxá ratetinin keenyamai.
¡Jan mia jakonhaibora jakonribi iti iki,
jan mia jakonmaira, jakonmaribi iti iki!” ikira iká iki.
Jaskara senenti Balaamman yoia joibo
10 Jaskatai ninkataxa, Balac kikinbiresi Balaamki sinata iki, jaskákinra jawen meken too ayanan yoia iki: —Nokon rawibo jakonma ikanon ixon jato jakonmakin shinanxontira en mia kenaa iki, ikaxbira jakon ikanon ixon, kimishakin min jato jakon shinanxonke.
11 ¡Min xobonko moa jakiribi mia kaara jakon iti iki! Icha jawéki kopíaxon mia ani imatira en mia yoia iki, ikaxbira jaskara ati non shinanna noa Ibon amayamake —akin.
12 Jatianra Balaamman yoia iki: —Ja min joi boí eiba kaa jonibora en moa yoia iki,
13 jatíbi oro itan jatíbi koriki mia jain iká xobonko bochoa min ea meniabira, Ibon ati yoiama ikenbi yoitimakin nokon shinanmanbi, jakon iti, itan jakonma ati en atipanyamake, Ibon ea yoiti yoia joibobichoresa en yoiti iki.
14 Nokon mainra, ea moa kaai; ikaxbira nato jonibaon, min jonibo jato jaskara akí kaipari, kaamatianbi en mia yoiai —akin.
15 Jaskataxa jaskara senenti yoii neskati Balaam yoyo ika iki:
“Ea riki Beornin bake Balaam, neskatira ea yoyo ikai,
bebankin oinmis joni,
16 shinan wetsakainxon Diossen joi en ninkatara,
onantibiresshaman iki,
nokon onan shinanra Diossibakeax joai,
shinan meran oinxon en joi biaira,
koshi Diossen ea menia iki.
17 Rama iti jawékira en oinnai, ja itira ochóbirespari iki:
Israelhibakeaxa westíora wishtin pené pikotai, ja pikotaira Israel jonibaon apo iki.
Moab jonibora jatoaresti iki,
Setnin chiní bakebora jatoaresti iki.
18 Edom maira, reteanankin jatoaresxon bikanti iki, ja jaton rawí Seir, jara iboakanti iki,
Israel jonibaonra ani jawékibo ati iki.
19 Israelnin chiní bakeboibakeaxa, jan jatoaresai koshi joni pikóti iki, janra ja jeman banetabo jato keyotiki”, ikibo.
20 Jaskata pekáora Balaam ja Balac oinnax neskati yoyo ika iki:
“Amalec mainmea jonibora kikin koshibo iki, ikaxbira kikinhakin jatíbi jato keyokanti iki”.
21 Quenita jonibo oinnaxibira neskati yoyo ika iki:
“Caínman chiní bakebaon
xobobora kikin koshibo iki,
onsá jakonmanin anaketian jain jonéti xobobora shanka meranbo iki.
22 Jaskara ikenbira, jatíbi keyokin ras akanti iki,
jaskáaxonra Asiriabaon jato yatanxon boti iki”.
23 Japekáora rama jaskara iti yoii neskati yoyo iká iki:
“¡Jawe iresaipanon! ¿Nato jawékibo
Diossen akaitianki, tsoa mawáyamai jati iki?
24 Paro kexakea Chipreainoa waporobo bexonra, ja Asiria betan Héberhain iká jatíbi jemabo keyokanti iki”, iki.
25 Jaskaa pekáora Balaam jawen xobonko kaa iki, jatianra Balacbiribi jawen mainko moa kaa iki.