2 Jatianra Zipornin bake, Balacnin, israelitabaon jaskara amorreobo aká oinna iki.

3 Jainoaxibira israelitabo kikinbires icha oinnax Moabhainoa jonibo jatoki kikinbiresi rakékana iki.

4 Jaskakinra Moab jonibaon Madiánhainoa joni koshibo yoia iki: “Waka benen xobi wainkonia akai keskaakinra, jatíbi nato jonibaon non mainmea jawékibo noa keyonankanti iki”, akin. Jatianra Balac Moab apo iká iki,

5 jaskara ixonra Beornin bake Balaam kenama iki, jatianra jaa iká iki Petor jemanko, Éufrates paro patax, Amav mainko. Balacninra jawen joi boaibo Balaam yoiti yoia iki: “Egiptonkoniax beaxa nato main jatíbiain janbiskanke, ramara ebebon tsamákanke.

6 Ishton jowé, nato jonibo ea jakonmakin shinanxoni, jabora noa bebon koshi ikanai. Min jato jaskáaketian jawekeska ixon en jatoaresti iki, jaskáaxonra nato mainmea en jato potati iki”, akin akanti.

7 Jatianra Moab betan Madián joni koshibaon, jakonmakin jato shinanxonketian jan kopiáti koriki bokana iki, jatianra Balaamhiba nokóxon ja Balacnin bomaa joi yoikana iki.

8 Jatianra Balaamman jato yoia iki: —Nato yamé neno banékanwe. En jaskara atin Ibo keenaira bakish en mato yoiti iki —akin. Jatianra Moab joni koshibo já betan baneta iki.

9 Ikaxbira jaki pikóxon Diossen Balaam yokata iki: —¿Ja mí betan ikáboki tsoa jonibo iki? —akin.

10 Jatianra Balaamman yoia iki: —Zipornin bake, Moab apo, Balacnin ea yoiti jato raanabo riki,

11 Egiptonkoniax bea jonibora nato main jatíbiain janbiske ikira ikai. Jato betan reteananxon jatoaresxon jawen mainmea jato potanon ixon jato jakonmakin shinanxoni, ea ishton katinra Balac keenai —akin.

12 Jatianra Diossen Balaam yoia iki: —Ja jonibo jakonmakin shinanxoni jato betan kayamawe, ja jonibo jakon ikanon ixon jan jato yoiara ea iki —akin.

13 Wetsa nete xabáketianra Balaam wenita iki, jatianra ja Balacnin jaiba jato raana joni koshibo jato yoia iki: —Maton main moa jakiribi botankanwe. Ea mato betan katinra Ibo keenyamai —akin.

14 Jatianra ja Moabhainoa joni koshibaon, jakiribi Balac ikain boxon yoikana iki: —Balaamra nobetan jokashamake —akin.

15 Ikaxbira Balacnin teakin jenepakeyamaa iki, jaskákinra ja rekenhakin jato raanabo bebonbires icha, itan wetsa joni koshi kikinbo jato raana iki.

16 Jabaonra Balaam oinni boxon yoikana iki: —Zipornin bake, Balacnin, mia joi bemaara neskara iki: ‘Eapari ninkawe, eara kayamai iamai jowé.

17 Jayá ikax kikin iresama ani itibora en mia meniti iki, jainxonra jatíbi min ea yokatabo en mia axonti iki; ikaxbi jowé, nato jonibo jakonma ikannon ixon jakonmaakin jato shinanxoni’, ikira ike —akin akana iki.

18 Ikaxbira Balaamman jato yoia iki: —Jatíbi oro itan jatíbi koriki, ja iká xobon bochoa ea Balacnin meniabira, en jawebi atima iki, nokon Ibon ati yoiama iketianra, ani itan maxko jawéki inonbi en atima iki.

19 Jaskara ikenbi, nato yaméribipari neno banékanwe, jaweki rama ea Ibon yoiai ixonpari oinbanon —akinra jato aká iki.

20 Jatianra yamé jaki pikóxon, Ibon Balaam yoia iki: —Mia benai ja jonibo bekana iketian, wenitax jato betan katanwe, ikaxbira ja en ati yoiabobichores min ati iki —akin.

21 Wetsa nete xabaketianra Balaam wenita iki, jawen burron peyakaaxa ja moabita joni koshibo betan kaa iki.

22 Jawen burron peyakaax Balaam kaaitianra, rabé jawen yonoti jabé kaa iki. Ja kaaitianra Dios jaki sinata iki, jatianra Ibon ángel bai napon chankata iki, bechitekin jan kaai bai xepoi.

23 Jatian ja Burro awinman oinna, Ibon ángel espada tsomaya bai napo iketianra, ja bainmeax wetsaori kaa iki; ikaxbira jakiribi ja kaai bain kanon ixon Balaamman rishkia iki.

24 Japekáora uva nii meran bai ikain, makan chike okén ibékona naxbámashoko ikain ja Ibon ángel chankata iki.

25 Jatian ja Ibon ángel oinnax ja makan chikéki kataxamekinra, ja burro awinman Balaamman kishi bitaxa iki. Jatianra Balaamman ja burro awin jakiribi rishkia iki.

26 Ikaxbira ja Ibon ángel jato bebon rekenkainax, jaweraobi katikoma bai naxbámashoko ikain chankata iki.

27 Ja burro awinra ja Ibon ángel ointaanan, main chirankota iki. Jatianra Balaam sinata iki, jaskáxonra jiwin rishkia iki.

28 Jatianbira Ibon ja burro awin yoyo imaa iki, Balaam neskaakin yoinon ixon: —¿Enki mia jawea? Nato rama akáyanixa kimishakin min ea rishkike —akin.

29 Jatianra Balaamman aká iki: —Miara eki shiroai, chichika tsomaya ixonra, ramabi en mia retekeanke —akin.

30 Jaskáabira ja burro awinin yoia iki: —Ea riki mia jatíbitian mia jan peyaka burro awin, minra kikinhakin onanke, jawetianbira miki ea neskati yoitimatama iki —akin. Jatianra Balaamman aká iki: —Ikon riki —akin.

31 Jaskáketianra Ibon jawen ángel Balaam oinmaa iki, westíora espada tsomaya bai napo chankata. Jatianra Maikibi bekepinon kaman Balaam beota iki,

32 ikaxbira Ibon ángelnin yoia iki: —¿Jaweatiki kimishaakin ja burro awin min rishkia? Ea riki ja min bai xepoi joá, ja mia jain kaaira nokon keenma iki.

33 Ja burro awininra ea oinna ike, jaskatira ea ranwini kimishai wetsaori kake. Wetsaori kayamaketianra en mia retekeanke, ixonbira ja burro awin en ayamakeanke —akin.

34 Jatianra Balaamman ja Ibon ángel yoia iki: —Eara ochake, ea bai xeponaanira mia jain iki ixonra en onanama ike. Ea kaai min oinna jakonma iketianra, ea banéti iki —akin aká iki.

35 Ikaxbira Ibon ángelnin yoia iki: —Miara kati atipanke ja jonibo betan, ikaxbira ja en yoiti yoiabichores min yoiti iki —akin.

Jatianra Balacnin jaiba raana joni koshibo betan Balaam kaa iki,

36 jatian moa Balaam kaai ninkataxa, já bechii Balac kaa iki, ja Arnón paro patax iká jemanko, ja Moab mai senenainko,

37 jatianra jain kaxon yoia iki: —Akonbireskinra en mia kenamaa iki; ¿Jawekeskatiki mia jokashamaa iki? ¿Ja icha jawéki mia en meniti yoiabo, en mia meniti jisámaki min shinanna iki? —akin.

38 Jatianra Balaamman yoia iki: —Eara neno iki, mia oinnira ea moa joke. Ikaxbira nokon shinanmanbi yoyo iti en atipanyamake, jaskara yoiti ea Diossen yoiabichoresa en yoiti atipanke —akin.

39 Jaskataxa Quiriat-huzot ikain Balac betan Balaam kaa iki,

40 jainxonra wakabo betan carnerobo retexon jaton diosbo menixon, jatíribi ja Balaam betan jawen joni koshi já chibani beabo meniti Balacnin jato yoia iki.

41 Jatian moa nete xabáketianra, Balaam benai Balac kaa iki, nokoxonra Bamot-baalhain mapémaa iki, jainxonra ja israelitabo jain ikana peotabo katemakin ointi atipana iki.