Horma jema jato bichinkana
21
Atarim bain israelitabo beai yoikanai ninkataxa, Néguev mainmea Arad jeman jaa cananeo apo jato betan reteanani kaxon jatoaresxon, jaweti jato yatankana iki.2 Jatianra jaskara ati ixon israelitabaon Ibo yoia iki, jaskáakanketian Ibon jato akinna jatoaresxon jaton mai bichinxon, jatíbi jaton jemabo ras atira iká iki.
3 Ja yokákanara Ibon israelitabo jato axona iki, jaskáaxonra cananeobo jatoaresnon ixon jato akinna iki, jatianra israelitabaon cananeobo keyokin retea iki, jaton jemaboribi keyokin ras akana iki, jaskara iketian jain janekanara Horma iká iki.
Bronce rono
4 Israelitabora Hor mananhinoax pikóbaini Joshin aniparonko bokana iki, Edom main winónaketianra wetsaori mayábaini bokana iki. Bain boira jonibo moara noa akinyamai ikax,
5 Dios betan Moiséski jakonmai yoyo iki peokookana iki. Neskatira yoyo ikana iki: —¿Jaweati Egiptonkonia maton noa pikoarin? ¿Jawebi jain xoxoyamai mananmameax mawánon ixon maton noa pikoarin? Noara onpax betan pitioma iki. ¡Nato jakonma pitínra noa moa jatsanke! —ikibo.
6 Jaskákanaitianra Ibon retemis ronobo jatoki raana iki, jabaonra jato natexa iki, jatianra icha israelitabo mawákana iki.
7 Jatianra Moiséssiba kaxon yoikana iki: —¡Iboki itan miki jakonmai yoyo ikaxa noa ochake! ¡Noibakea ronobo bomanon ixon Ibo yokáwe! —akin. Jatianra Israelitabaon jakonma akábo moa shinanyamanon ixon, Moiséssen Ibo yokata iki,
8 jatianra Ibon yoia iki: —Ja ronobo keská westíora rono awé, jaskáaxon jain bandera ati jiwin chankanwe. Jaweratoki ja ronon natexai, ja natexatonra ja jiwin rono chankata ointi iki, jatianra mawáyamai moa benxoti iki —akin.
9 Westíora bronce ronora Moiséssen aká iki, jaskáaxonra ja bandera ati jiwin chankana iki, jatianra ja ronon natexaton ja bronce rono oinnax mawáyamaa iki.