Shanka jene
20
Ja baritia reken oxe iketianra, israelitabo jawebi jain xoxoyamai Zin mananman nokókana iki, jatianra jawetio basires jain iki Cadessain banékana iki. Jainoaxa Moiséssen poi María mawata iki, jara jainbi miinkana iki.2 Jain onpax yamaketianra, Moisés betan Aarónki jakonmaati jatikaxbi jonibo tsinkikana iki,
3 jaskáxonra Moisés yoikana iki: —¡Ja jatíribi israelitabo Ibon reteabo betan noa mawatara jakon ikeanke!
4 ¿Jaweati ja Ibon jonibo nato jawebi jain xoxoyamai mananman maton bearin? ¿Nobetanbi non wakabo mawátininki mato keenai?
5 ¿Jaweatiki Egiptonkonia pikoxon, nato kikinbires onsá jakonma ikainko maton noa bea iki? Nenora non jawebi banati atipanyamake; higo jiwibo, uva jiwibo, granado jiwibobira neno yamake; ¡Non ja xeati onpaxbira neno yamake! —akinbo.
6 Jatianra jonibo potabaini Moisés betan Aarón jain tsinkíti xobo xepikotinko kabékona iki, jain ikaxa maikibi bekepinon kaman beokana iki. Jatianra Ibon pené jatoki pikota iki,
7 jainxonra Ibon Moisés yoia iki:
8 —Kekóti biwé, jainxon min wetsa Aarónman akinnon, jonibo tsinkiwe. Jaskáaxon jatíbi jato bebonxon, shanka yoiwe onpax jokonhaxonon ixon, jaskáaxon min oinnara ja shankankoniax onpax jokonti iki, jabaon itan wakabaon xeanon ikax —akin.
9 Janbi jaskaati yoira, Ibo bebomea Moisésnin kekoti bia iki;
10 jaskáaxonra Moisés betan Aarónman shanka bebon jonibo tsinkia iki, jainxonra Moiséssen jato yoia iki: —Ninkakanwe, yoitimabó: ¿Maton ja xeanon ixonki nato shankamea non onpax jokonmati iki? —akin.
11 Jaskati yoyo itaananra, Moiséssen jawen meken bochiki sanantaanan, kekótinin rabéakin shanka rishkia iki, jatianra jainoax icha onpax jokona iki. Jaskataitianra jaton wakabo betanbi jonibaon onpax xeakana iki.
12 Ikaxbira Ibon Moisés betan Aarón yoia iki: —Israelitabo bebonmeax mato ikoni eki koshiamaa iken, itan maton ea rabiamaa kopíra, en jato menia mainko nato jonibo betan mato jikiamai —akin.
13 Nato riki ja Meribainoa jene jokonai akin akanai, jainoaxa Iboki israelitabo jakonmai joikana iki, jatianra jawen jakon ja Ibon jato oinmaa iki.
Edomman Israel winómayamaa
14 Cadessainxonbira, Moiséssen jaweti joni joi boaibo Edom apo neskáakin yoiti jato raana iki: “Min wetsa israelitabaonra neskara joi miki raanke: ‘Jaskara atikoma jawékibo noa winotara min onanke.
15 Non rekenbora Egiptonko bokana iki, jainra basibires jakana iki, ikaxbira egipciobaon noa jakonmaakana iki, ja noa akana keskáribira non rekenbo akana iki;
16 jatianra noa akinnon ixon non Ibo yokata iki, jatianra noa saii ikai jan ninkata iki, jaskaxonra westíora ángel raana Egiptonkonia jan noa pikoa iki. Jaskaa ikaxa neno nato min mai senenainko, Cades jeman rama noa ikanai.
17 Min main noa min winómanon ixonra mia non yokatai. Wai banábo ikain itan uva wai ikainra noa winótima iki, min pozobo ikainoa onpaxa non xeatima iki. Ja ponté bainra noa kati iki, ja min mai shitai kamanra ja bainmeax noa wetsaori katima iki’ ”, akin.
18 Ikaxbira Edom apon jato yoia iki: —¡Nokon main winóyamakanwe, mato ikaitianra mato bechitei nokon sontároboya ea kati iki! —akin.
19 Jatianra israelitabaon onantiakin yoia iki: —Ja ani bainra noa kati iki, jatian non axon, iamax non wakabaon min pozomea onpax xeakenra, non mia kopiáti iki. Min main winótininresa noa keenai —akin.
20 Jaskáakanabira Edom apon jato yoia iki: —¡Jawekeskataxbira mato winótima iki! —akin. Jaskataxa israelitabo bechitei jawen koshi sontároboya, itan jatíbi jan reteanantiboya jato akí kaa iki,
21 jawekeskaxonbi jawen main jato winómakashamai. Jaskataitianra jan kati wetsa bai israelitabaon benaa iki.
Aarón mawata
22 Jatíbi Israel jonibora Cadessainoax, Hor mananhori bokana iki.
23 Jain, ja Edom mai senennainxonra, Ibon Moisés betan Aarón yoia iki:
24 “Aarónra mawatai, ja israelitabo en jato menia mainkora jikiamai, ja Meribainoa jene jokonai pataxkeax mato eki jakonmai yoitimaa kopí.
25 Jatian mia, Moiséssen, Aarón betan jawen bake Eleazar Hor manan maxkaten jato botanwe;
26 jainxonra sacerdote ixon saweti jan sawea chopa, Aarón jopemaxon min Eleazar sawemati iki. Jainoaxa Aarón mawati iki”, akin.
27 Ibon jaskaati yoiara Moiséssen aká iki. Jatíbi israelitabaon jishnonbira Hor mananman mapékana iki,
28 jainxonra Moiséssen Aarón jawen chopa jopemaxon Eleazar sawemaa iki. Jainbi ja manan maxkatemeax Aarón mawata iki; jatianra Moisés betan Eleazar ja mananmameax ipakekana iki.
29 Aarón moa mawata onanaxa, israelitabo kimisha chonka nete kaman ja mawata shinanni winikana iki.