Shankamea onpax
17
Jatianra jatíbi israelitabo tsoa jonibi jain jaama manan Sin ikainoax moa bokana iki, ja bain boira pontébainyamai jainpari Ibon iti yoiainkobo ikí, tekitekibaini bokana iki. Boaxa Refidimhain ikana iki, ikaxbira jonibaon xeati jain onpax yama iká iki,2 jaskara iketianra, jaweatibira min noa jaskaa riki akin Moisés akí, neskákana iki: —¡Ja xeati onpax noa meniwe! —akin. Jatianra Moiséssen jato neskaa iki: —¿Jaweatiki maton ea yokákin teai? ¿Jaweatiki maton Dios tanai? —akin.
3 Ikaxbira jonibo kikinni nomia iki, jaskatira Moiséski jakonmai yoyo ikana iki. Jaskákinra yoikana iki: —¿Jaweati Egiptonkonia min noa pikoarin? ¿Non bakebo betan non yoinaboyabiki min noa nomi retemai? —akin.
4 Moiséssenra akinnon ixon onísanan Ibo yokákin, yoia iki: —¿Nato jonibo jaweapan? ¡Shokochaa iwanxonra ea makanman tsakaxon retekeankanke! —akin.
5 Jatianra Ibon yoia iki: —Jaweti Israel joni koshibo betan ja jonibo bebon kawanwe. Jan min Nilo paro rishkiyantana kekótiribi boé, jaskara iketian moa jato bebon katanwe.
6 Shankankoxonra Horeb mananmanxon en mia manai. Ja shanka min rishkia onpax jokonaitianra jonibaon xeati iki —akin. Moiséssen jaskaaitianra Israel koshibaon oinna iki,
7 jaweatibira noa jaskaa riki iki israelitabo jainoax ikanketianra, Meribá akin jain janekana iki, jainxonra Masáh akinribi janekana iki, Dios tanai jainoax jaki jakonmakana iketian, jaskatira ikana iki: “¿Iboki nobé iki, iamax nobémarin?” iki.
Amalecitabo betan reteanana
8 Jatianra amalecitabo israelitabo betan reteanani Rifidimhain bokana iki.
9 Jatianra Moiséssen Josué yoia iki: —Jaweti joni katotax amalecitabo betan reteanani katanwe. Diossen kekóti tsomáyara bakish ea manan bochiki ikai —akin.
10 Jatianra Moiséssen yoia keská Josuénin aká iki, jaskatira amalecitabo betan reteanani kaa iki. Ja bokanaitianra, Moisés, Aarón, itan Hur, manan bochiki bokana iki.
11 Jatian Moiséssen jawen poyan bochiki sananketian, israelitabaon amalecitabo betan reteanankin jatoaresa iki; ikaxbi jawen poyan naman aketianra, amalecitabaonbiribi jatoaresa iki.
12 Ikaxbi Moisés ponpaxkinketianra, jan yakánon ixon makan bexon já naman akana iki. Jaskaaxonra Aarón betan Hurkan jawen poyan oken tewanbekona iki. Jaskatax Moiséssen ponyan bari jikinon kaman jainbi iká iki,
13 jaskáaxonra Josuénin amalecita sontárobo reteanankin jatoaresa iki.
14 Jatianra Ibon Moisés yoia iki: —Ja shinanti inon ixon, nato reteanantiain jatíbi jaskara ikábo kirika meran wishawe; jainxon ja shinankantimaakinra amalecitabo jatíbi en jato keyoai, jaskáakin Josué yoiwe —akin.
15 Jatianra Moiséssen makan bonchonhakin tsamana iki, jaskáaxon janeara iká iki “Ibo riki nokon bandera”, iki iká.
16 Jainoax neskata iki: “¡Ibon banderara en tsomake! ¡Amalecitabo betanra Ibo reteananai, jainoax jaton chiní bakebo betanribi iikaresti iki!” iki.