2 Ja tsoa jonibi jain jaama manan ikainoaxa, jatíbi jabo Moisés betan Aarónki jakonmaibo yoyo iki peokookana iki.

3 Jainxonra jato yoikana iki: —¡Egiptonkoxon noa Ibon mawámapain iká riki! Jainra nami kenti patáx yakáxon non potókin pikátiai, jaskara ikenbira jatíbi noa piti retemanoxon tsoa jonibi jain jayamainko maton noa bea iki —akin.

4 Jatianra Ibon Moisés yoia iki: —Naikameara oi beai keskáakin en matoki piti bemai. Ja piti biira netetiibi jonibo pikóti jake, ja neten piti senenresa bikanti iki. Yoiti ixonki tsoabaon en ja ati yoia joibo senenhai itan tsoabaonki senenhayamai ixonra en oinkasai.

5 Ja sokota nete itínra, ja maton xobonko boti bikin, ja maton bipachoai bebon rabéakin maton biti iki —akin.

6 Moisés betan Aarónman israelitabo jato yoia iki: —Ja Iborin Egiptonkonia jan mato pikoa ixonra yantánpake maton onanti jake,

7 yamékirira Ibon ratéti jawéki aká maton ointi iki, jaki jakonmai mato yoyo ikaira moa ninkáke. Jaskara iketian, ¿Noaki tsoabo iki maton noa jakonmakin yoiti? —akin.

8 Jainxonra Moiséssen yoiribia iki: —Yantanra Ibon mato nami meniai maton pinón ixon, jatian yamékirira icha pan mato meniai, mato jakonmai jaki yoyo ikaira moa jan ninkake. Jaskara iketian ¿Noa tsoabo iketianki maton noa jakonmakin yoiai? Nokira mato jakonmai yoyo iamake, Ibokira mato ike —akin.

9 Jainxonra Moiséssen Aarón yoia iki: —Jatíbi israelitabo Ibo bebon bekanon jato yoiwe, janra jakonmai mato yoyo ikaibo moa ninkáke —akin.

10 Aarón israelitabo betan yoyo ikaitian, tsoa jonibi jain jaama mananhori jatíxonbi oinkinra, nai koinman Ibon pené pikota merakana iki.

11 Jatianra Ibon Moisés yoia iki:

12 —Israelitabo eki jakonmai yoyo ikanaira en ninkake. Jato betan yoyo ikin neskara jato yoiwe: ‘Yantanaitianra maton nami pinoxiki, jatian yamékirira pototai kaman maton pan pinoxiki. Jaskáxonra ea riki maton Ibo Dios iki ixon maton onanti iki’ —akin.

13 Ja yantánbira koma keska codornizbo bea iki, jabora ja ikana peotabo ikanain tsamata iki, jatianra yamékiri ja ikana katemai nibí maana kikin kextó tsamata iká iki.

14 Ja nibí koinnax keyata pekáora, nibí matsiax chorisha keská joxoshamantonin ja tsoa jonibi jain jaama mai bepoa iká iki.

15 Jawerin ixon onanyamaaxa israelitabo ja oinnax yoianankana iki: “¿Jatian natoki jawe iki?” iki. Jatianra Moiséssen jato yoia iki: —Natora ja jawékiati pan Ibon mato menia iki.

16 Jaskara ati Ibon yoiara neskara iki: Jaweti joniki maton xobonko iki, maton piti senenbores westíorabaon bikanwe, rabé litrobo tanibires westíorabaon bikanwe —akin.

17 Israelitabaonra jaskara aká iki. Wetsabaon bebonchaa biketianra jatíribibaon ichamacha bia iki,

18 jatí icha bikanti shinanxon jato yoiatiibo; jatianra jan icha biabaona texeyamaa iki, itan jan ichama biaboribi jawebi maxkáyamaa iki. Westíorabaonra jatí icha piti maxkatatiibo bikana iki.

19 Jatianra Moiséssen jato yoia iki: —Tsonbira bakish ati jawebi texeatima iki —akin.

20 Jaskara ikenbira, jatíribibaon Moisés ninkáxonyamakin bakish neten ati texeakana iki; ja texea benxoakanara xena bochoax pisi poata iki. Jatianra Moisés jatoki sinata iki.

21 Yamékiritiibira pinoxon ja maxkata senenbores bikana iki, ja biamakanabora bari xanan aká charata iki.

22 Ikaxbira ja sokota nete itin, rabé tsamábo ja piti bikana iki, chosko litrobora westíorabaon bia iki; jaskákanketianra jaton koshibo Moisés yoii bokana iki,

23 jatianra Moiséssen jato yoia iki: —Jaskara atira Ibon yoia iki. Bakisha tantiti nete iki, Ibo mekéxoni tantiti riki. Ja maton yoaa akasai rama yoa akanwe, ja maton kobiankasai rama kobinhakanwe, jainxon jatíbi ja texeabo bakish ati benxoakanwe —akin.

24 Moiséssen jaskáati yoia iketianra, ja texeabo wetsa neten ati benxoakana iki, jara pisiamaa iki, itan xenayamaribia iki.

25 Jatianra Moiséssen jato yoia iki: —Ja piti rama jawékiakanwe, Ibo mekéxoni tantiti nete riki, rama netera jainoa maton biainko jawebi maton nokotima iki.

26 Sokota nete senenresiki maton jawékiati biti, ikaxbi ja kanchis netera, jan tantiti netebiribi iki, ja netenra jawebi maton merayamai —akin.

27 Jatianra jatiribibo ja kanchis nete itin jaweshoko benai boxon, jawebi nokoyamakana iki.

28 Jatianra Ibon Moisés yoia iki: —¿Jawetian kamanki nokon esébo itan jan axeti en mato onanmaa joibo ayamai mato yoitimakaresti iki?

29 Ea Ibon mato yoia shinankanwe, jan tantiti netera en mato menia iki; jaskara iketian riki sokota nete itin rabé nete piti en mato meniai. Jaskara iketianra ja kanchis iti neten maton xobonkobi mato iti iki, jainoax mato pikótima iki —akin.

30 Jaskara iketianra ja kanchis nete itin jonibo tantia iki.

31 Ja jawékiati bixon israelitabaon janeara iká iki maná. Jara iká iki cilantro bimi keska joxo, itan mishkinya aká pan keska bata.

32 Japekáora Moiséssen jato yoia iki: —Jaskara ati Ibon yoiara neskara iki: ‘Jain rabé litro jikiaitonin maná bochoaxon maton chiní bakebo benxoaxonkanwe, Egiptonkonia pikoxon tsoa jonibi jain jaama mananmanxon jaskara en mato pimani oinkanon ixon’ —akin.

33 Jatian Aarónra yoia iki: —Tasá bixon, jain rabé litro maná napówe. Jaskáaxon Ibo bebon awé, maton chiní bakebaona iti jain benxokaabanon —akin.

34 Jaskáati Ibon Moisés yoia iketianra, ja senenhabekonti joi jain iká bonanti bebon, ja tasá Aarónman aká iki.

35 Israelitabaonra, chosko chonka baritia senen, ja jain jonibo jakana Canaán mai nokotai kaman, maná pikana iki.

36 Israelitabaon jan maná toponai rabé litro ikaira iká iki “gomer”, westiora “efara” chonka gomer ikátiai.