Moiséssen bewá
15
Jatianra Moisés betan israelitabo Dios kikin shinanni neskati jaki bewakana iki:“Ibokira ea bewai,
jatoaresara ratétibires iki,
kabayoboyabi jonibora aniparo chichó jato potaa iki.
2 Ea jaki bewaira Ibo iki,
jara nokon koshi itan ea jan kishpinmai iki.
Já nokon Dios iketianra en rabiai,
ja nokon papan Dios iketianra en rabiai.
3 Ibora, kikinbires reteananai iki ¡Ibo riki, jawen jane!
4 Ibonra faraónman carroboyabi jawen sontárobo,
aniparo chichó jato potaa iki;
¡Jawen sontárobaon koshi onan oficialbora,
aniparo joshin ikainoa jato jenen keyoa iki!
5 Makan ikai keskatira, aniparo xaman bokana iki,
aniparo nemin ikainra jato jenen mapoa iki.
6 Ibó, ja min mekayaokea mekenman atipana koshinra,
ja rawíbo min jato keyokin beshéa iki.
7 Mia akí beabora
min ani koshin jato bitaxa iki;
min siná ketéketianra,
pei taxo choshi ikai keskati jabo tiríkana iki.
8 Sináxon min xoon akara, jene jainbicho tsinkita iki;
ani bechonra keyá chiké keska iká iki;
¡Ja aniparo chichó naponbekon xabá ikára taxkéyamaa iki!
9 Rawikanra shinanna iki:
‘Nokoaikamanra en jato chibanai,
jato bichinabo jato menipakexonra en jakon shinanti iki.
Espada tsekataananra,
nokon mekenman en jato keyoti iki’ ixon.
10 Ikaxbi min xóon aketianra, aniparo jenen jato xea iki;
plomo ikai keskatira jene onsatainko jikikana iki.
11 Ibó,
¡Mia keska wetsa diossa yamake!
¡Tsoabira jakon itan koshi mia keska yamake!
¡Ratéti jawéki onsábora min akai!
¡Miaresiki rabiti!
12 ¡Min koshi pikoketianra
jato main xeaa iki!
13 Min noimis shinanmanra ja min kishpinmaa jonibo min jato akinboai;
min koshi shinanmanra min xobonko min jato boai.
14 Jaskara onanaxa maibotiibi saki ikanti iki,
filisteobora chexakaati jaton yora yoshokanti iki,
15 Edomhainoa sontárobaon koshibora jaton koshi shinan yamati iki,
Moabhainoa joni koshibora raketi saki ikanti iki,
jatíbi cananeobora jaton koshi shinan keyóti iki.
16 Ibó,
¡Ratébakanon!, ¡Rakébakanon!
min koshi poyanman akára,
¡Makan ikai keskati koshikantima iki,
min jonibo winotai kamanra jaskara ikanti iki,
ja jonibora mina iti min jato imaabo iki!
17 Ibó,
mia jain iká mananman jakannon ixon noa bowé,
jain janoxon min katota ikainko,
ja min mekenmanbi aká xobonko.
18 ¡Ibora jatíbitianbires jato jan ikinnai iki!” iki.
Maríanin bewá
19 Jatian ja faraónman carroboyabi ja kabáyonin boai jonibo aniparo meran weíkanketianra, Ibon aniparo jene jato mapomaa iki; ikaxbi israelitabobiribi mai manxaman aniparo shitakana iki.
20 Jatianra ja profeta ainbo María, Aarónman poi, shaka ati biax kaaitian, jatíbi ainbobaon sakóananbi shaka ati aabainkin chibankana iki,
21 neskáakin jan jato bewaxonaitian:
“Ibo kikin shinankin bewaxonkanwe,
jatoaresara ratétibires iki,
kabayoboyabi jonibora aniparo chichó jato potake”, iki ikaitian.
Moka onpax
22 Jatianra Moiséssen aniparo joshin ikainoax israelitabo wetsanko kati jato yoia iki. Jatianra tsoa jonibi jain jaama Sur mananman bokana iki, kimisha nete bain bokinbira, onpax nokoyamakana iki.
23 Marain nokóxon, onpax xeakaskanabira, moka iká iki. Ja kopíra Mara akin jain janekana iki.
24 Jonibora Moiséski jakonmai yoyo iki peokokana iki, jatianra yokákana iki: “¿Jaweki non xeai?” akin.
25 Jatianra Ibon akinnon ixon, Moiséssen yokata iki, jaskáaketianra Diossen jiwishoko oinmaa iki. Ja jiwishoko Moiséssen jenenko akára moa onpax jakon iká iki. Jainxonra Ibon jato tanaa iki, jaskakinra ja senenhakanti esé itan jaskati jati esé jato menia iki.
26 Jatora yoia iki: “Ea maton Ibo ixon jatíbi en mato yoia maton akonkin ea ninkáxonkin, maton nokon keena keska aketian, jainxon ea ninkáxonkin ja senenhati joi itan ja esé, maton senenhaketianra, ja egipciobo aní jan masá teneti jawekeska isinbi en matoki raantima iki, eara mato isinketian jan mato benxoai maton Ibo iki”, akin.
27 Japekaora Elimhain nokókana iki, jainra iká iki chonka rabé jene jokonai, itan kanchis chonka xebonribi, jain onpax jaketianra ja patax tsamakana iki.