2 “Ja israelitabo jato yoiwe, jakiribi banetax Pi-hahirot bekeiba ikanon, Migdol betan aniparo naxaran, ja Baal-sefón bekeiba. Ja aniparo kexá jaton chopa peotabo akáx jain ibakanon.

3 Jaskáketianra faraónman shinanti iki: ‘Israelitabaonra jawerano kati onanyamake. Tsoa jonibi jain jaama mananman benotaxa boantankanai’, ixon.

4 Ikaxbi en imaara jawen keena keskáres akin faraónman mato chibanti iki; jatianra faraón jatíbi jawen sontároboyabi jato akin, nokon koshi en pikoa jishtiti iki, jatianra egipciobaon ea riki Ibo iki ixon onankanti iki”. Jaskáti jato yoia keskáakinra israelitabaon aká iki.

5 Jaskákanketianra israelitabora moa jabáke akin Egipto apo keshankana iki. Jatianra moa botankanon ixon jato raanribixonbi apon jawen joni koshiboyaxon jato jaskara anoxon wetsa keska shinan aríbakana iki: “¿Ikaxbi jaweati ja israelitabo non jato raanarin, noa tee axonkin jenekanon ixon?” iki.

6 Jatianbira janmeax reteananti kabáyonin niniai carrobo benxoati faraónman jato yoia iki, jaskáaxa jato chibani kakin jawen sontárobo ioa iki.

7 Jatíbi Egiptonkonia carrobo ikainoara sokota pacha kikin jakonshaman carrobo bia iki, jainoaxibi ja carrobotiibira westíora sontárobaon joni koshi kaa iki.

8 Ibon imaa jawen keena keská akin israelitabo faraónman chibantira imaa iki, koshi shinanman jato pikoa ikenbira jato chibani kaa iki.

9 Egipciobora jatíbi jaton sontároboya, carrobaon itan cabayobaon israelitabo chibani bokana iki, jatianra aniparo kexá, Pi-hahirot patax, Baal-sefón bekeiba tsamákanketian jato nokokana iki.

10 Israelitabaon oinna, faraón itan egipciobo ochómaitianra, ikonbiresi rakékana iki, jatianra jato akinnon ixon Ibo yokákana iki.

11 Jatianra Moisés yoikana iki: —¿Egiptonko jain miinmeeti yamaketian, jainoa pikoxon tsoa jonibi jain jaama mananmameax mawánon ixon min noa bearin? ¿Jaweati min noa jaskaarin? ¿Jaweati min noa Egiptonkonia pikoarin?

12 Neskákanaketianra moamabi Egiptonkoxon non mia yoia iki: ‘Noa meeyamawe, non ixonresbanon egipciobo yanka teexonkin. ¡Tsoa jonibi jain jayamainkoniax mawátitianbi, iboaxon yanka yonokanai noa ikákayara jakon iti iki!’ —akin.

13 Ikaxbira Moiséssen jato yoia iki: —Rakéyamakanwe. Koshiakin shinankanwe ramara maton oinnai mato xabaanoxon Ibon akai, rama maton oinnai egipciobora jawetianbi maton oinwetsayamanoxiki.

14 Jawe iamakanwe, Ibora mato kopi reteananai —akin.

15 Jatianra Ibon Moisés yoia iki: —¿Jaweatiki akinnon ixon, min ea yokatai? ¡Chitíyamai bebon bokanon ixon israelitabo jato yoiwe!

16 Min kekoti wakexon, min poyan sananxon aniparo oken ibékontiakin chopewe, ibakanon mai manxaman israelitabo shitati.

17 Egipciobaon jaton keena keská anon ixon en jato imaara mato chibani bokanti iki; jaskáaxonra faraón, jatíbi jawen sontároboyabi jawen carrobo, itan kabáyonin boaiboyabi jato akin, nokon koshi en jishtiati iki.

18 Jaskáakin ja faraón, jawen carrobo itan jawen kabáyonin boaibo akin en nokon koshi pikoketian oinxonra, egipciobaon eara Ibo iki ixon onankanti iki —akin.

19 Jatianbira Diossen ángel betan nai koin pania, israelitabo bebon kaai iitibi jato pekáo iká iki.

20 Jaskatax, ja nai koin pania, egipcio sontárobo betan israelitabo naponbekon iká iki; ja nai koinman akára egipciobo jato yamekan mapoa iki, jaskara ixonbira israelitaboribi jato joekan tenaa iki. Jakopíra egipciobaon israelitabo chibanshinkinbi jato nokoti atipanyamakana iki.

21 Jatianra Moiséssen jawen meken aniparoori sanana iki, jatianra bari pikotaiorikea niwe koshi Ibon bemaa ja yamé payáshinaiton, aniparo chopea oken ibékona iki. Jaskaaxonra aniparo mai manxan Ibon imaa iki,

22 jatianra jene chike keyá mekayao itan mexkao oken ibékona naxaran, mai manxanshamaman, aniparo israelitabaon shitakana iki.

23 Jatíbi ja kabáyonin boaibo betanra faraónman carrobo jato pekáo kaa iki, ja aniparo naponbekon senenra jato chibankana iki;

24 ikaxbira ja nete xabataitian ja chii tiritai pania meraxon, itan nai koin meranxon Ibon oinxon imaa, egipcio sontárobo jatonbinix ratéyoni janbiskana iki;

25 jaton carro taebora ras aka iki, jaskataitianra shokores bebon bokana iki. Jatianra egipciobo neskati yoyo ikana iki: —Jabánon akanwe, israelitabo akinira, Ibo nobetan reteananai —iki.

26 Ikaxbira Ibon Moisés yoia iki: —Min meken aniparoori sananwe, ja ipachoai keskáribi jene inon, egipcioboki itan jaton carroboyabi ja kabáyonin boaiboki maanon ixon —akin.

27 Moiséssenra jawen meken aniparoori sanana iki, jatianra ja nete xabataitian, ja ipachoai keskáribi jene iká iki. Jabákasaibira egipciobo Ibon jato aniparo mapomaa iki.

28 Ja ipachoai keskáribi jene ikenra, carrobo betanbi ja kabáyonin boaibo jenen jato mapoa iki, jatíbi sontárobo ja israelitabo chibani aniparo meran boabora, jenen jato keyoa iki. Westíora sontárobira texeyamaa iki.

29 Jaskákankebira, jene chike keyá mekayao itan mexkao oken ibékona naxaran israelitabaon mai manxaman aniparo shitakana iki.

30 Ja netenra egipciobaon mekenmamea israelitabo Ibon xabaa iki, jatianra egipcio mawatabaon yora aniparo kexá israelitabaon oinna iki.

31 Jaskáakin Egiptonkoniabo akin jawen ani koshi Ibon pikoa oinxonra, israelitabaon ja oinmakin já bebonxon rabikana iki, jaskatax Iboki itan jawen yonoti Moiséski koshikana iki.