2 “Israelitabo en jato meniti, Canaán maiki jawekeska iki ixon ointi jaweti joni ranwe. Westíora tsamá ja rarebobires ikainnoa, koshi shinanyabo westíorabo jato ranwe”, akin.

25 Chosko chonka nete senen jaskara jain ikábo oinyontaananra,

26 Cadessain boríbakana iki, jain jawebi xoxoyamai Parán manan ikain. Jain ikana iki Moisés, Aarón itan jatíbi israelitabo. Jatianra jaskara oinnabo jato yoikana iki, itan ja mainmea bimibo jato oinmakana iki.

27 Moiséssa yoikana iki: —Jain min noa raana mainra noa katanke. Ikonshaman kikinbires icha ja jawékiati yoára ja main jake, natora jain ikai yoaa bimibo iki.

28 Ikaxbi jain jaa jonibora koshibo iki, kikinbires ani jemabo riki, ja jemabaon iká xobobora kikin koshiakin akábo iki. Jainxonribira jain non oinke, ja ani joni Anacnin chiní bakebo ikax ani jonibo.

29 Ja Néguev mainra amalecitabo jake, jatian ja manan keyabo ikain jakanabo riki hititabo, jebuseobo, itan amorreobo, jatíribi cananeobaon jatira aniparo patax iki, itan Jordán paro ikain iki —akin yoikana iki.

30 Jatianra Moisés bebon iká jonibo netémaxon Calebnin jato yoia iki: —¡Jaskara iketian ja mai jato bichinti riki! ¡Ja maira non jato bichinti atipanke! —akin.

31 Jaskataibira já betan botanabaon jato yoia iki: —¡Atima riki, ja jonibora non jato peoti atipanyamake! Jabora noa xewina koshibo iki —akin.

32 Jatianra ja oinni botainbakana mai yoikinbi, israelitabo jakonmakin yoikana iki. Neskarara yoikana iki: —Ja non ointana maira tsoabi jain jatima ikax jain jaax mawáti iki, jainoa non oinna jonibora jatíbi kikin anibo iki.

33 Jainxonra non oinribiibake ani jonibo, ja Anacnin chiní bakebo. Jato patax ixon non oinnara chanpotioshokobo noa iibake, jatian jabaon oinnara noa jaskáribi iibake —akin akana iki.