2 Jatíbi jabora Moisés betan Aarónki jakonmai yoyo iki neskákana iki: “¡Nato jain jawebi xoxoyamai mananmameax iamai Egiptonkoniax noa mawatara jakon ikeanke!

3 ¿Jaweati nato main Ibon noa bearin? ¿Reteanantiainoax noa mawáketian, non awinbo betan non bakebo non rawikan binon ixon noa bearin? ¡Jakiribi Egiptonko noa kaara jakon iti iki!” ikibo.

4 Jatianra yoianani peokookana iki: “¡Jan noa boti westíora joni koshi imaax jakiribi Egiptonko bononbokanwe!” ikibo.

5 Jatianra Moisés betan Aarón jonibo bebon maiki bekepinon kaman beokana iki,

6 jatianra Josué betan Caleb, ja mai oinni kaibatabo ikax, masá shinanni chexakaakin jaton chopa waxaa iki,

7 jainxonra jatíbi israelitabo jato yoikana iki: —¡Ja non ointana maira kikinshaman jakon iki!

8 Noa jakonhakin Ibon akinnara, ja mai menia noa jain jikiti iki. Ja mainra ja jawékiati yoá kikinshaman icha iki.

9 Jaskara iketian Iboki ramiti yoitimayamakanwe, ja mainmea joniboki rakéyamakanwe, non jatoarestira atibires iki; jaton paranan ikin jan jato koirantira tsoa yamake, noabora jaskarama iki, Ibora non paranan iki nobetan iki. ¡Rakéyamakanwe! —akinbo.

10 Jaskara ikenbira, jonibaon makaman tsakaxon jato retekaskana iki. Jaskákanaitianra jainoax nokoananti carpa xobonko, jawen peneyabi Ibo pikota jatíbi israelitabaon oinna iki,

11 jatianra Ibon Moisés yoia iki: —¿Jawetian kamanki iresabires ixon en jawebi atipanyamaa nato jonibaon shinankin jeneti iki? ¿Jatoibaxon jaskara iosma jawékibo ea aká ikenbiki, jawetian kaman ea ikonhayamai jenékanti iki?

12 Ja mai biamakanon ixonra, jan jato keyoti jakonma isin en jatoki raanai; ikaxbi miara jato xewina ani itan koshi jemaya en imai —akin.

13 Jaskáabira Moiséssen Ibo yoia iki: —Minra, Egiptonkonia min koshi shinanman nato jonibo jato pikoa iki. Min jato jaskáa onanxonra egipciobaon,

14 Canaán main jaa jonibo jato yoikanti iki. Jabaonribira moa ninkata iki, mia Ibo, jato betanbi iká; beibaxon min jato oinmai, itan nai koiman mia jato manaon pania; jainoax neten ja nai koin pania meran mia jato bebon kaai; jatian yamébiribi chii tirí paniaton mia kaaibora ninkakana iki.

15 Ja potábicho nato jonibo min jato keyokin reteketianra, jan mia ninkata wetsa mainmea jonibo ikanti iki:

16 ‘Jato meninoxon yoini mainkora Ibon ja jonibo jato jikimati atipanyamaa iki, jaskákinra jain jawebi xoxoyamai mananmanxon jato retea iki’ ikibo.

17 Jaskara iketian, Ibó, min jato jaskara axonti yoia keskáakin, rama min koshi pikoxon jato oinmawe. Minra yoia iki,

18 mia ishtonbires sináyamai, min noimisti shinan iki kikinshaman ani, jaskara ixon jaton jakonma itan ja yoitimakanabo ikenbi min jato shinanxonyamai, ixonbira jan jakonma aká min oinresyamai, jaton papabaon jakonma aká kopíra jaton bakebo, jaton bababo, jaton bababaon bakebo, itan jaton bababaon baban bakebo min jato masá tenemai.

19 Min noimisti shinan kikinbires ani iketian, nato jonibo jaton jakonma aká jato shinanxonyamawe, Egiptonkoniaxbira nato neno nokotai kaman mia jaton paxkinyamaa iki —akin.

20 Ibonra yoia iki: —Jakon riki, jato ayamanon ixon min ea yokáketianra en jaton jakonma moa shinanxonyamai.

21 Ikaxbira, neskara iki, ea jaara kikin ikon iki, itan nato main jatíbiain ninkakatai iketian ea onankana iki,

22 jan nokon pené oinnabo, Egiptonkoxon itan jain jawebi xoxoyamai mananmanxon jaskara iosma jawéki shinanmanres en akai jan oinnabo, tsoa jonibi jain jaama mananmanxon ichaakin ea jan tanaabo, jainoax ja ati en yoia akáshamai yoitimatabaonra,

23 jato meniti ixon jaton rekenbo en yoini mai, tsonbi ointima iki. Iresabires shinankin ea omisabaonra tsonbi ja mai ointima iki.

24 Nokon yonoti Calebbichoresa wetsaresibi shinanya ixon, ea yoiti ixoni ikonshaman senen ike. Jaskara iketianra ja oinni katana mainko jabichores en jikimai, jainxonra jawen chiní bakeboribi en jain jato jamati iki.

25 Matora, bakish jain jawebi xoxoyamai mananhori jato patanbaini aniparo Joshinhori mato kati jake, amalecitabo betan cananeobora ja teshanpanin jake —akinbo.

26 Jatian Moisés betan Aarónra Ibon yoia iki:

27 —¿Jawetian kamanki nato jakonma shinanya israelitabo eki jakonmai yoyo ikanaitian en jato teneti iki? Ea yoii jakonmai yoyo ikanaira en moa ninkáke.

28 Jaskara iketian nokon janenko ea jato yoixontanwe: ‘Ea jiria Ibo ixonra en yoiai, en mato imaara, ja jaskati mato yoyo ikai en ninkata keská mato winóti iki.

29 Jatíbi ja rabé chonkankoniax bebon baritiayabo iketian, onantiankin jaton jane kirika meran wishaabo ikenbi, eki jakonmai yoyo ikábora, mawákanti iki, jatianra jaton yorabo nato jain jawebi xoxoyamai mananman tipiti iki.

30 Wetsabo iamaibira Caleb betan Josuébicho jain jikiti iki, jain iti en mato meniti yoia mainkora, mato westíorabi jikiamanoxiki.

31 Jaskara ikenbira, jabo yoii non rawíbaonra noa bichinai iki mato iantana maton bakebores, jain ikax rarokanon ixon, ja maton omisa main en jato boai.

32 Mato mawata yorabora, jain jawebi xoxoyamai mananman tipinoxiki,

33 jatianra maton bakebaon, chosko chonka baritia senen jaton yoinabo koirankanti iki. Jaskáxonra, nato jain jawebi xoxoyamai mananmameax jatíbi mato mawatai kaman, ea ikonhakasshamaax mato eki koshikashamaa jakonmabo, jabaon kopiáti iki.

34 Ja mai paranaxon oinnira mato chosko chonka nete jain iká iki; jaskara iketianra ja kopíakin chosko chonka baritiaribi maton masá teneti iki: westíora netebo kopíra westíora baritiaboribi iti iki. Jaskáxonra onankanti iki, eki ramiti yoitimatara jakonma iki ixon’.

35 Ea, Ibo ixonra en yoiai, jaskara ati yoia ixonra en senenhati iki: Jaskáakinra nato eki jakonma shinanna jonibo, akonbireskin en jato masá temati iki. Jainoax mawatai kamanra, jain jawebi xoxoyamai mananman boanhatankanti iki —akinra jato aká iki.

36 Paranxon mai ointi, Moiséssen jato raana jonibaonra ja mai ointanax joxon jakonmabires jato yoia iki, jaskáakanara jonibo jakonmaibo yoyo iki, joikana iki,

37 jaskákanketianra ja janso joi beabo, Ibon jato retea mawákana iki.

38 Jatikaxbi mawákanketianra, Josué betan Calebbicho mawáyamaa iki.

39 Ibon yoia joi, Moiséssen israelitabo yoiara jatikaxbi kikinni onisi winikana iki.

40 Jatian wetsa nete xabata yamékirishoko wenitax manan keyá ikain mapetaxa neskati yoyo ikana iki: —¡Moara noa neno ikanai! Ibon noa meninoxon yoia mainko bononbokanwe, noa ochaara ikon iki, jaskara ikaxbi bononbokanwe —iki.

41 Jaskákanainbira Moiséssen jato yoia iki: —¿Jaweakiki Ibon ati yoiabo ayamai mato yoitimai? ¡Ja maton shinanna keská akinbira maton nokoyamai!

42 Bebon boyamakanwe, Ibora moa mato betanma iki. Maton rawíbaonra matoaresti iki.

43 Ja mato bebonra amalecitabo betan cananeobo iki, mato betan reteanankin mato retenoxon mato manaaxa ikanai. Moa maton jenea ikaxa Ibo moa mato betanma iki —akin.

44 Jaskaakin jato yoiabira, ja manan keyábo ikain mapékasi tanákana iki, jaskákanaibira ja Ibon ja senenhabekonti joi jain iká bonanti, itan Moisés jain ikainnoax jawekeskataxbi taxkéyamaa iki.

45 Jatianra ja main jaa amalecitabo betan cananeobo jokonxon, jato betan reteanankin Horma jema kaman israelitabo chibankana iki, akonbireskinra jatoareskana iki.