2 Jainoaxa iribakana iki: “Moisés betanbichora Ibo yoyo ikama iki; nobetanribira yoyo ika iki”, ikibo. Jaskákanaira Ibon ninkata iki.

3 Ikon riki, Moiséssa iká iki nato netemea kikinshaman rabíshinanhoma joni.

4 Jaskara ikenra Moisés, Aarón itan María, Ibon jato yoia iki: “Mato kimisha jainoax nokoananti carpa xobonko botankanwe”, akin. Jatianra ja kimishabi jain kaa iki.

5 Jatianra nai koin kextokan Ibo paketa iki, jaskati joaxa ja carpa xobo xepikotinko itoshia iki; jainxonra Aarón betan María kenaa iki, jaskaa já bebon bekanketianra,

6 Ibon jato yoia iki: “Nato en mato yoiai ninkákanwe: Westíora profeta mato xaran iketianra, já betan yoyo ikin en jaskara itibo oinmai, jainxonra namá meranbo en yoyo akai;

7 ikaxbi nokon yonoti Moisés betanra ea jaskáyamai. Jára jatíbi nokon yonotibo bebonbires senen joni iki,

8 jaskara iketianra beibananax ninkátibires join, ea já betan yoyo ikai. Jatian jan ea beibanxon oinnai ikenbiki, ¿Jaweaki mato jaki jakonmai yoyo ikai?” akin.