2 Jatianra Moiséssen akinnon ixon yokati jonibo saí ikana iki, jaskákanaitianra Moiséssen jato Ibo yokáxona iki. Jatianra ja chii tiritai moa nokaa iki.

3 Jaskara kopíra Taberá akin jain janekana iki, jainoax jatoki Ibon chii tirita kopí.

4 Jatíbi meskó jonibo israelitabo betan ikábora, pitiakinres shinanaibo ikana iki. Jatianra ja israelitabo moa jaton shinan biax winianan neskati yoyo ikana iki: “¿Tsonpariki noa nami meniai non pinon?

5 ¡Egiptonko ixon kopímabi non yapa pikátiaira non shinanresai! Jainxonribira non pikátiai pepinobo, melónbo, puerrobo, cebollabo itan ajobo.

6 Jaskara ikátiibira rama noa pitin mawati iitai, wetsa jawékira non oinyamai maná bichoresa jake”, ikibo.

7 (Ja manára iká iki cilantro bimi keská; panshintani chexeya, bepon keská,

8 xenia harina aká bata pan keská noera iká iki. Ja biira jonibo boa iki, bixonra renekana iki, jaskáribiakinra chachikana iki, jaskáaxonra xoikana iki, pan keskáakinbo axon.

9 Yaméra, jaton carpa peota pekaten nibí maannaitian, manáribi maanna iki.)

10 Jatianra Moiséssen ninkata iki jaton awinboyabi bakebo jaton xobo xepikotinkoniax israelitabo winiaitian. Jatianra Ibo ikonbiresi sinata iká iki. Jaskakanaira Moiséssen keenmaribi iká iki,

11 jaskákinra Ibo yoia iki: —¿Jaweatiki min ea ramiai, ea min yonoti ikenbi? ¿Jawekopi eki jakonmaakinkayaki nato jonibo kopí min ea masá tenemai?

12 ¿Eaki jaton papa iki, eaki jaton tita iki, ja xoma akai bakebo atin ikóxon, ja jaton rekenbo min meniti yoini mainko kaman jato boti min ea yoiti?

13 ¿Jatíbi nato jonibo pimatiki jaweranoa en nami biti iki? Ea yoii beira winikanai: ‘Non pinon noa nami meniwe ikira ikanai’.

14 Jatíbi nato jonibo nokon koshinbi enbicho jato botira moa en atipanyamake, nokonara kikinbires tee iki.

15 Jaskáakin ea aakaskin, min ea moa reteakayara jakon iti iki, akonkin ea noibakinra min ea jaskáati iki. Jatianra ja ichabires atikoma jawékiainbo moa ea itima iki —akinbo.

16 Jaskataibira Ibon yoia iki: —Kanchis chonka israelita joni koshibo ea tsinkixonwe, jonibaon koshi iti atipana min onannabo, jainxon Dios nokoti carpa xobo xepikotinko jato bewé, jainxon miibetan ea manabakanon.

17 Jain paketax ea miibetan yoyo iti iki, jatianra nato jonibo jato boti tee iketian jabaon mia akinti, jatíribi min shinan en mia menia bixon, en jato meniti iki. Jaskataxa miabicho itima iki.

18 Jainxon jonibo yoiwe bakish nami piti iketian Dios bebon jakon inox chokikanon. Winianan neskati yoyo ikanaira en moa ninkáke: ‘¡Noa namia ipainon riki non pinon! ¡Egiptonko ikaxa noa kikin jakon ikátiai!’ iki ikanai. Maton pinon ixonra en mato nami meniai,

19 jatianra westíora, rabé, pichika, chonka, rabé chonka neteres ati itima iki.

20 Westíora oxe kamanra maton nami piti iki, maton rekinman jokonai kaman, itan mato jaki kerasai kaman. Ibo jato xaran ikenbi omisa kopíra jaskara ikanti iki, jainoaxa winianan ebebomeax neskati yoyo ikanke: ‘¿Jaweaki Egiptonkoniax noa pikotarin?’ ikibo —akin aká iki.

21 Jatianra Moiséssen yoia iki: —Ja ebé boaibora sokota pacha waranka reteanannai jonibo iki, ¿Jaskara ikenbiki westíora oxe kaman nami pimati min noa yoiai?

22 ¿Jaweranoki icha carnero itan icha waka iki, ja retexon jatíbi non jato senenhakin pimati? Aniparonkonia jatíbi yapa non jato meniabira, senentima iki —akin.

23 Jaskákenbira Ibon yoia iki: —¿Nokon atipana koshi maxkoshoko iketian en atipanyamaaki min shinanai? Ramara min oinnai en yoia joiki senenai o iamakiai ixon —akin.

24 Jaskara Ibon yoiara Moiséssen jonibo yoia iki, jatianra kanchis chonka israelita joni koshibo tsinkia iki, jaskáaxonra Diossen carpa xobo katemakin jato joyonna iki.

25 Jatianra nai koinman pakéxon Moisés Ibon yoyo aka iki; ja iká pekáora jatíribi Moiséssen shinan bixon, ja kanchis chonka joni koshibo jato menia iki. Ja shinan jatoki joatianbira, profetabo keskati yoyo iki peokookana iki; ikaxbira jakiribi moa iwetsayamakana iki.

26 Ja kanchis chonka jonibo xarameara rabé joni katókana iki, jara iká iki jawen jane Eldad, wetsanara Medad iká iki, jabora Diossen carpa xobonko kayamai ja ikana peotabo ikainbi banékana iki. Ikaxbira, jatokiribi ja shinan joá iki, jaskáketianra ja peotabo ikainoax profetabo keskatiribi yoyo iki peokookana iki.

27 Jaskákanaitianra wetsa baken ishto kaxon Moisés yoia iki: —¡Peotabo ikainoaxa Eldad betan Medad, ja profetabo ikai keskati yoyo ikanai! —akin.

28 Jatianra bake ranontianbi Moisés akinnai Nunman bake Josuékan yoia iki: —¡Nokon ibó, Moisés, jaskara ayamakanon jato yoiwe! —akin.

29 Ikaxbi Moiséssen yoia iki: —¿Minki ea washitai? ¡Jatíbi jawen jonibo Ibon jawen shinan jato menipainon riki jatikaxbi profeta ikantiakin! —akin.

30 Jatianra Moisés betan ja joni koshibo jaton peotabo ikain boribakana iki.

31 Jan codorniz isábo benon ixonra, Ibon aniparorikea niwe bemaa iki, ja isábo beaxa ja ikana peotabo ikain itan ja katemai manna iki, jawen pextinra iká iki, westíora nete kaxon rebesti jaton peotabo katemai iaketana, jatian ja tsamatara iká iki westíora metro keyá.

32 Jatíbi ja nete abaikin itan jatíbi ja yamé jainoax ja wetsa nete xabatatonra jonibaon codorniz isábo bia iki. Ja ichama codorniz isábo biabaonara iká iki chonka tsamabo, jara choshinon ixon jaton peota katemakin tsamankana iki.

33 Israelitabaon codorniz isábo nami pikin peokenbira, jatoki kikinni sináxon Ibon jato masá temaa iki, jaskáaxonra icha joni jato mawámaa iki.

34 Jaskara ikenra ja jainoax ikana janekana Quibrot-hataava iki aká, ja pitiakinres shinanaibo mawatabora jain miinkana iki.

35 Ja jonibora Quibrot-hataava ikainoax boax, Hazerothain nokotax jainbi banékana iki.