Kupa Mahamahana Mai Hanopaka Mahamahana.
21
Epua,
mahaꞌu eao kupa mahamahana mai hanopaka mahamahana aihanakia,
pokina kupa koriꞌuaina mai hanopaka koriꞌuaina aba teꞌakauma,
ꞌakupaka abomo wairana ahaꞌi.
2 Ba aiara robena aihana,
Ierusalema mahamahana,
Tirama herenai kupa ꞌubinai eriri emai.
Aihana ihana matoha hawainibe mahamaha babiꞌena tebataitai haraina tebaꞌoruna atawana ꞌeuna ꞌabana.
3 Ba aia ha obia imiaꞌaunai emai aona eꞌabi ꞌaota etibaha,
“Bariu Tirama ena miaho ꞌekana hanona maearima herekiai,
Tirama hanona ia kipokia katemiaho,
ia hanona Tirama ena maearimai kateao,
Tirama kipona hanona ia herekiai kemiaho,
haeamona ekia Tirama ai keao.
4 Ia kehore mahakia beikia ikoikiai mahakiai keutu obonakia,
ba maearima aꞌi kateꞌari mue,
aꞌi kateaokoꞌo mue,
aꞌi katehai mue,
mai aꞌi katehaiara mue,
pokina taba ꞌaiꞌaikia weiakia hanona aba teꞌakauma baihana.”
5 Epua,
obia imiaꞌauna ahanai emiaꞌau Tiramana eꞌabi etibaha,
“Tomobahu,
Au taba ikoikiai aba nababai maha mahanakia!”
Haeamona ehina benaꞌu etibaha,
“ꞌAbi neiana hanona morerena pokina ꞌabi neiakia hanona toha tohakia mai aokia tohakiai kateaꞌi taeanakia.”
6 Ba haeamona ehina benaꞌu etibaha,
“Taba ikoikiai aba ababai orena.
Au hanona Alepa mai Omega,
Koriꞌuaina mai Murihaina.
Iaꞌiramana mai Ibapuana hauꞌu.
Hau ha ꞌakona niꞌororo hauna au kahore mauri beina nebuti ꞌarana ahaꞌi hauna kabena keinu.
7 Ena aꞌikakauma ketabura,
kiꞌa aokiai kekabanai hauna hanona itauna neiakia ikoikiai keaꞌinakia,
ba au hanona ia ena Tirama ai kaeao,
ia hanona au nahaꞌu ai keao.
8 Iamo ꞌubo haukia,
aꞌi tiaꞌikakauma haukia,
aka kiꞌa haukia,
ahuahu haukia,
nabau haukia,
nepu haukia,
kaibaꞌuku ṯekuti aina haukia,
mai baiꞌoi haukia ikoikiai ekia ꞌeka hanona iruba ꞌobuna weiana pihara mai irubana atana salpa niꞌara banaibanai ꞌekana aonai.
Neiana hanona ꞌari ibaruana.”
Ierusalema Mahamahana.
9 Epua,
aneru ha emai hereꞌu,
ia hanona aneru ꞌabaihau hamomo weiakia puou ꞌabaihau hamomo aokiai iaꞌikiꞌa tabakia orekia ꞌabaihau hamomo tebabonunakia teaꞌinakia haukia ꞌabakia ha,
ba ehina benaꞌu etibaha,
“Omai neia,
au kahore hawainibe mahamaha babiꞌena kabaihaniꞌo,
ia hanona Mamoe nahu atawana.”
10 Weiana Auba Robe aoꞌu ebabonu ꞌauna ba aneru eaꞌinaꞌu eaoainaꞌu oeo ha apaꞌuana baꞌona ꞌubinai,
ba aiara apaꞌuana robena,
Ierusalema,
ebaihanaꞌu Tirama herenai kupa ꞌubinai neriri nimai.
11 Tirama ena nuabi hanona aiara neiana ebaea obona,
ena ꞌimare hanona matoha pihara namoabuna atana daiamond ꞌabana,
eiroro kiꞌa matoha karati ꞌabana.
12 Aiara neiana ena ara hanona eapaꞌua mai eroꞌe,
paꞌabina hanona harau haea rua,
paꞌabina ha ha herekiai hanona aneru ha ha tikoroti ṯemiaho haukia ikoinai harau haea rua.
Paꞌabina ha ha ahakiai hanona Isaraela itubuna harau haea rua atakia ha ha tererenakia.
13 Paꞌabi aihau hanona taetana tainai,
ha aihau hanona tototaina tainai,
ha aihau hanona ahitaina tainai,
ha aihau hanona tibotaina tainai.
14 Aiara apaꞌuana arana ena koriꞌau piharakia hanona harau haea rua,
ahakiai Mamoe nahu ena iuhubeau haukia harau haea rua atakia tererenakia.
15 Aneru weiana ehina benaꞌu hauna imanai hanona ikaiꞌini ha gold ai tebabaina hauna eaꞌina,
ba aiara apaꞌuana,
mai ena paꞌabi,
mai ena ara kehobonakia.
16 Aiara ebakorina ꞌuniꞌunina bani baiatakia hanona teihobo,
ena homaꞌa mai ena mata abomo ihobo,
ikaiꞌiniai aiara ehobona ba ena homaꞌa etabu ahina hanona kilometa taha rua hinabu rua (2,200),
ena roꞌe abomo teihobo.
17 Aneru ehore ara ena imukia ehobona hanona meta imabui harau haea ꞌabaihau (66),
aneru hanona maearima ekia hobohobo ihobonai ua ehobo aihona.
18 Ara hanona pihara namoabuna atana daiamond ai ebakorina,
ba aiara apaꞌuana hanona gold tohanai ebabaina eiroro kiꞌa matoha karati ꞌabana.
19 Aiara ebakorina arana ena koriꞌau piharakia hanona pihara namoabukia haeaihaeai ikoinai harau haea rua ai ebataitainakia,
pihara namoabukia atakia hanona neiakia,
koriꞌuaina hanona daiamond,
hauna eiroro,
ibaruana hanona sapaia,
hauna epurutoni,
ibaihauna hanona kalakedo,
hauna eꞌapuro,
ibabanina hanona emerald,
hauna ekupa,
20 ibaimana hanona sadonu,
hauna ebirobiro,
ibaꞌabaihauna hanona rubi,
hauna ebiro,
ibaꞌabaihau hamomona hanona krusolito,
hauna ewaima,
ibaꞌababanina hanona berulio,
hauna ekupa,
ibaꞌababani hamomona hanona topasio,
hauna eiroro,
ibaharau haeana hanona krusoparaso,
hauna ekupakupa,
ibaharau haea hamomona hanona huakinto,
hauna epurutoni,
mai ibaharau haea ruana hanona ametuso,
hauna eꞌapupu.
21 Ara paꞌabikia harau haea rua ba paꞌabi ha ha hanona kutu porekia rarikia ꞌimare ꞌimarekiai tebabainakia.
Aiara ibuana taearakia ikoikia hanona gold tohana ꞌabaeana,
teiroro kiꞌa matoha karati ꞌabana.
22 Au aiara weiana aonai Marea Robe ha aꞌi aihana,
pokina Obiapaka hiabu ikoinai Tiramana mai Mamoe nahu hanona aiara Marea Robena.
23 Aiara apaꞌuana weiana hanona beraura ꞌao nawa eakia aꞌi nenuatae,
ia ahanai aꞌi kerara,
pokina Tirama ena nuabi hanona aiara nibaeana Mamoe nahu hanona aiara ena ramepai niao.
24 Hanopaka maearimakia aiara eanai katekaꞌa,
haeamona hanopaka ena obia ꞌarana haukia hanona ekia nuabi haeai haeai kateaoainakia ia aonai.
25 Paꞌabi hanona rani ikoinai aꞌi katekaiabu ꞌapuana,
pokina rabi hanona weia ahaꞌi.
26 Hanopaka maearimakia hanona ekia nuabi tabakia mai ekia obia tabakia aiara weiana aonai katekatoto ainakia.
27 Iamo ꞌopu tabana ha aꞌi ketoto mai hoahoa kiꞌa obokia tebabai haukia ꞌao baiꞌoi haukia ha hanona aiara weianai aꞌi kekatoto ꞌapua,
iamo weiakia atakia Mamoe nahu ena mauri pukanai tererenakia haukia mo katekatoto.