Keriso Kipokia Kateobia Ihau Taha Hamona.
20
Epua,
aneru ha kupai ekarahi eriri emai aihana,
imanai hanona ꞌuri ꞌourana aꞌena ahaꞌi hauna kina mai tabiri apaꞌuana ha eaꞌinakia.
2 Ia ehore mahi atana dragona weiana ꞌerau ꞌaiꞌaina hauna eaꞌina,
mahi weiana hanona Tiaporo ꞌao Satani,
ba tabiriai ebiri ꞌinina ihau ikoinai taha hamona kemiaho aina.
3 Aneru weiana ehore mahi weiana ꞌuri ꞌourana aꞌena ahaꞌi hauna aonai ekapo utana ba ekaiabu ꞌinina,
mai ahanai rauhubu hoana ehorotina,
weiana ia hanopaka maearimakia aꞌi meꞌoinakia keaomo ihau taha hamona,
weiana murinai hanona kerubuna kemiaho rani papana.
4 Epua,
obia imiaꞌaukia aihanakia,
ahakiai temiaꞌau haukia hanona hiabu teaꞌina katebabakai.
Haeamona weiakia Iesu pouna tehinana mai Tirama ena ꞌabi tehinana paukiai ꞌakokia tekabe hurinakia haukia aubakia aihanakia.
Ia hanona aiahu mahina weiana ꞌao ena kaibaꞌuku aꞌi tekuti aina mai ena maniꞌa paukia ahakiai ꞌao imakia ahakiai aꞌi teaꞌina haukia.
Ia hanona temauri mue Keriso kipokia teobia ihau ikoinai taha hamona.
5 Neiana hanona ꞌariai mikirimue koriꞌuaina.
(ꞌAri haukia harina maikoina hanona aꞌi temauri mue eaomo ihau ikoinai taha ha ekabanai.)
6 Maearima weiakia mikiri mue koriꞌuaina aonai katemiaho haukia hanona tenamo mai terobe.
ꞌAri ibaruana hanona ena hiabu ahaꞌi ia herekiai,
ꞌa ia hanona Tirama mai Keriso ekia robe akakia ibabaikia haukiai kateao,
mai kipokia kateobia haeamo keaomo ihau ikoinai taha hamona.
Satani Iruba ꞌObunai Tekapo Uhuna.
7 Ba ihau ikoinai taha hamona keore murinai hanona Satani ena wapura ꞌekanai katerubuna.
8 Satani kekarahi keao hanopaka maikoinai hanopaka maearimakia keꞌoinakia,
weiakia itubu rua Gog mai Magog kebatoꞌunakia huari kateao.
Ekia boꞌo hanona keboꞌo kiꞌa baha matoha poe ꞌanona ꞌabana.
9 Hanopaka maikoinai tekabanai teao Tirama ena maearima ṯemiaho ꞌekana mai ena raonaꞌau aiarana tekori kakaiarona.
Iamo iruba kupai eriri ꞌeho huari haukia weiakia maikoinai ebaꞌara obonakia.
10 Ba tiaporo weiana ia eꞌoi ahinakia hauna hanona weia pihara mai irubana atana salpa niꞌara ꞌobuna aonai tekapo uhuna,
aiahu mahina mai mahabanai hauna baiꞌoina tekapo uhunakia ꞌekana.
Weia teaihau puma kate hoaina mararani mai rabi keaomo banaibanai.
Obia Imiaꞌauna Apaꞌuana Porenai Emiaꞌau Hauna Ena Bakai.
11 Epua,
obia imiaꞌauna apaꞌuana pore obona ha mai ahanai nemiaꞌau hauna aihana.
Hanopaka mai kupa hanona wairanai tekaobo tai ha aꞌi eiha muenakia.
12 Ba ꞌari haukia aihanakia apaꞌuakia mai papakia Tirama ena obia imiaꞌauna wairanai tekoroti,
ba aneru puka tekai kaunakia,
baiatakiai puka haeai ha abomo tekaikauna weiana hanona mauri pukana.
ꞌAri haukia ekia babai puka aokiai irere ihobokiai eba bakainakia.
13 ꞌAku aonai teꞌari haukia ꞌaku ehore euhu ꞌaunakia,
haeamona ꞌari mai ꞌari haukia ekia ꞌeka tehore ekia ꞌari haukia teuhu ꞌaunakia.
Ba maearima ikoinai hanona ha ha ekia babai ihobohobokiai ebabakainakia.
14 Murinai ꞌari mai ꞌari haukia ekia ꞌeka abomo iruba ꞌobuna aonai tekapo uhunakia.
Iruba ꞌobuna weiana hanona ꞌari ibaruana.
15 Maearima weiakia atakia weia mauri pukana aonai irere ahaꞌi haukia ikoikiai hanona iruba ꞌobuna aonai tekapo uhunakia.