Kupa ꞌUbinai Teio, Haleluia!
19
Neiana murinai,
au ꞌuru ha aona ꞌuruna matoha maearima toꞌuna rarina kupa ꞌubinai teio tetibaha,
“Haleluia!
Hamabanamona.
Bamauri,
nuabi,
mai hiabu
hanona eka Tirama ꞌeuna.
2 Pokina ena bakai hanona
tohana mai ebero.
Tirama ehore rea babiꞌena
apaꞌuana puma ebahoaina,
ena maha porepore babai kiꞌai
hanopaka eaꞌi kiꞌana paunai.
Tirama ena taꞌaraꞌi haukia
teahu ꞌarinakia aruarukia
ꞌarakia aba ebamuena.”
3 Haeamona teio mue tetibaha,
“Haleluia!
Hamabanamona.
Aiara apaꞌuana niꞌara
mai hiabuna nikaraꞌau
aꞌi kepua ꞌapua keaomo
banaibanai.”
4 Ba kiro haukia harau rua bani mai mauri tabakia bani tekaipehu Tirama weiana obia imiaꞌauna ahanai emiaꞌau hauna tekuti aina,
ba teio tetibaha,
“Amen,
Haleluia!”
Mamoe Nahu Ena Hawainibe Tatuna.
5 Ba weia obia imiaꞌaunai aia ha emai etibaha,
“Ena taꞌara tuaꞌina haumi
ikoimiai mai maearima ikoimiai
weiami papana mai apaꞌuana
ia tumariki aina haumi ikoimiai,
eka Tirama hamabanamona.”
6 Ba ꞌuru ha aona,
ꞌuruna matoha mako rarina ꞌakina ꞌao roio rarikia tihara puni ꞌao kupa niroꞌu ꞌuruna rarina ꞌabana teio tetibaha,
“Haleluia!
Hamabanamona.
Pokina Obiapaka aika eka
Tirama hiabu ikoinai hauna
nihore aika nipoki ainaka.
7 Aoka kenamo,
kahaonamo kiꞌa,
ia nuabi kahabena.
Pokina Mamoe nahu ena
hawainibe ranina aba ekaraꞌau,
haeamona keatawana babiꞌena
abomo aba ebaꞌoru.
8 Habuni namona atana linen
erauꞌa mai neꞌimare hauna
tebena kebatotona.”
(Habuni namona weiana anina hanona Tirama ena robe haukia aka berona tebabaina haukia.)
9 Ba aneru ehina benaꞌu etibaha,
“ꞌAbi neiana morerena.
Tebeaubeau benakia Mamoe nahu ena hawainibe tatuna aonai temai haukia hanona tenamo.”
Haeamona eꞌabi mue etibaha,
“Neiakia hanona Tirama pinana ꞌabikia tohakia.”
10 Weiana au aneru weiana aena pokinai akaipehu kakuti aina,
ꞌa ia au ehina benaꞌu etibaha,
“Aꞌi kokuti ainaꞌu!
Au hanona taꞌaraꞌi hauꞌu ꞌabaeaꞌu,
oi ꞌabamu mai uahoꞌabamu Iesu ena pou ṯehinana haukia ꞌabakia.
Tirama ikupaianamo kahakuti aina!
Pokina Iesu ihina pouna hanona mahabanai hiabunai.”
Hoti Porena Ahanai Emiaꞌau Hauna.
11 Epua,
au kupa ekaikau hoti pore obona ha wairaꞌuai aihana,
ahanai emiaꞌau hauna atana hanona ‘AIA IBABUAꞌAU’ mai ‘TOHA TOHANA’ Ia hanona bero paipanai nibabakai mai nehuari.
12 Mahana ihakia hanona matoha iruba neupa ꞌabana,
aranai hanona obia ibauꞌukia boꞌokia,
ia ahanai hanona ata ha irereꞌau ba hau ha ata weiana aꞌi eꞌiobina,
ꞌa ia kipona mo eꞌiobina.
13 Ena habuni homaꞌana ebatotona hauna hanona earuaru obo.
Ia atana tehinana hanona ‘TIRAMA ENA ꞌABI’.
14 Kupa ena huari haukia ia murinai teꞌau,
hoti porekiai temiaꞌau,
habuni namokia atakia linen tebatotonakia,
tepore obo mai terauꞌa.
15 Pinanai hanona kareba nihena eara hauna nikarahi,
ena aka hanona hano haeai haeai haukia keahu ꞌitiꞌitinakia,
ba ia kehore auri ikaiꞌiniai kepoki ainakia.
Hiabu ikoinai Tiramana ena opuere kebatohana ꞌekana bine buabuana ibahari ꞌitiꞌitina ꞌekanai kehe ꞌitiꞌitinakia.
16 Ena habuni ahanai ꞌapena tainai hanona ata neiana ererena,
‘OBIA ꞌARANA HAUKIA IKOIKIAI EKIA OBIA ꞌARAKIA HAUNA MAI OBIA IKOIKIAI EKIA OBIAPAKA.’
17 Ba aneru ha beraura aonai ekoroti aihana,
roborobo kupa baiatanai tirobo haukia ikoikiai eapari ꞌaotanakia etibaha,
“Tomai,
Tirama ena tatu apaꞌuanai tomotoꞌu.
18 Weiana wai hanona obia ꞌarana haukia,
huari poki haukia,
mai tabura haukia bitiokia katoani,
hoti mai hoti ai temiaꞌau haukia bitiokia katoani,
mai maearima ikoikiai weiakia taꞌara tiaꞌi haukia mai taꞌara aꞌi tiaꞌi haukia,
papakia mai apaꞌuakia bitiokia katoani.”
19 Ba aiahu mahina weiana mai hanopaka ena obia ꞌarana haukia mai ekia huari haukia kipokia tetoꞌuna aihanakia,
tenuatae hoti porenai emiaꞌau hauna ena huari haukia kipokia katehuari.
20 Iamo aiahu mahina teahuna teaꞌi maurina,
ena mahabanai hauna baiꞌoina ohi.
Mahabanai hauna baiꞌoina weiana hanona aiahu mahina wairanai bataꞌutaꞌu huri hoahoakia ebabai hauna,
hoahoa weiakiai aiahu mahina maniꞌana teaꞌina mai ena kaibaꞌuku tekuti aina haukia eꞌoi ahinakia.
Weiakia terarua mauri maurikia iruba ꞌobuna weiana pihara mai irubana atana salpa niꞌara banaibanai ꞌekanai tekapo uhunakia.
21 Weiana hoti porena ahanai emiaꞌau hauna ehore pinanai kareba ekarahi haunai ꞌou haukia ikoikiai eahuꞌari orenakia,
ba roborobo ikoikiai bitio weiakiai teani ꞌari.