Babulonia Aiara Apaꞌuana Aba Eꞌeho.
18
Neiakia murikiai aneru haeai ha aihana kupai eriri emai.
Ia ena hiabu hanona eapaꞌua kiꞌa baha weiana ena nuabi ehore hanopaka maikoinai ebaea obona.
2 Aiana taburanai eio aota etibaha,
“Babulonia aiarana apaꞌuana
aba eꞌeho,
aba eꞌeho!
Ia hanona tiaporo mai
auba kiꞌa obokiaa ikoikiai ekia
kaimue ꞌekanai eao,
roborobo ꞌopukia mai
ꞌarikia aꞌi tiꞌari haukia
ekia paparoꞌai eao.
3 Pokina hanopaka maearimakia
ikoikiai ia kipokia nabau
hoahoakia kiꞌa obokia tebabai
matoha ena bia pahihinai
teinu ꞌari ꞌabana.
Hanopaka ena obia ꞌarana haukia
abomo ia kipokia aba tenabau,
haeamona hanopaka ena
kawakawa haukia hanona
enuatae kiꞌa tabakia
weiakia arakia rarikiai
ekia obia aba tebapaꞌuanakia.”
4 Ba aia haeai ha aona etibaha,
“Eꞌu maearima e,
aiara naiana aonai
tomokarahi tomai.
Ia kipokia kiꞌa akakia
aꞌi tomobabai haeamo marikina.
Ia kipokia iaꞌikiꞌana pumana
aꞌi tomohoai haeamona marikina.
5 Pokina ena kiꞌa hanona
aba eroꞌana eaomo kupa,
mai Tirama hanona ia ena babai
kiꞌa ikoikiai niraona ꞌininakia.
6 Ena baibeni ihobonai
katobeni muena.
Taba ebabaina hauna ꞌarana
rani rua katohorena.
Emi ꞌere aokiai muramura
pahihina ebaꞌoruna
katoinu ihobonai,
ia ena ꞌere aonai
muramura pahihina katobaꞌoruna
hanona ena tabura katoba
kabanaina rani rua.
7 Ia kipona taba weiakia
ꞌarakia rarikia enuatae kiꞌa
mai ena nuabi ebena ihobokiai mo
katobahaiarana mai katobahaina.
Pokina kipona aonai
niapa netibaha,
‘Au hanona obia ꞌarakia
babiꞌeꞌu mo ha ṉamiati,
au hanona wapu ahaꞌi,
mai au hanona aꞌi kahai ꞌapua.’
8 Ua buonai wapu hamona aonai
ia iaꞌikiꞌana akakia ikoikiai
ketabu ahinakia,
ꞌari,
hai mai arobo.
Haeamona ia hanona iruba aonai
keꞌara obo.
Pokina Obiapaka Tirama
ia nibabakaina hauna hanona
etabura kiꞌa baha.
9 “Hanopaka ena obia ꞌarana haukia ia kipokia tenabau mai ena kepu teaonamoai haeamo haukia hanona iruba weiana hiabuna nikaraꞌau kateihana raninai katehai ꞌari kiꞌa baha.
10 Ena hau haiara paunai,
katetaꞌu kiꞌa atauꞌai katekoroti katehai kateꞌabi,
‘Ekiꞌa kiꞌa baha,
ekiꞌa kiꞌa baha.
Babulonia aiara apaꞌuana
mai taburana e,
beraura hoana hamona ꞌakimo
aonai puma ohoaina.’
11 “Hanopaka ena kawakawa haukia abomo katehai ꞌari kiꞌa baha,
pokina ekia kawakawa tabakia hanona hau ha aꞌi kekawanakia.
12 Kawakawa tabakia weiakia hanona gold mai silba,
pihara namoabukia mai kutu ꞌimareꞌimarekia,
habuni namoabukia,
habuni apupukia,
habuni nibinibikia taꞌetaꞌekia,
habuni birokia,
matiu timikia namokia haeaihaeai,
mahi atana elepant ꞌeanai tebabai tabakia ikoikiai,
matiu ꞌarakia rarikia haukia,
kopa,
auri mai pihara pahihina namonai tebabainakia tabakia,
13 weiakia aniani timikia ibanamokia muramurakia atakia sinemon mai spaisi,
muramura timikia ꞌorimokia atakia insense mai mira,
mai muramura taburana hauani katetarona hauna,
waini mai olibe hohona,
parawa namokia,
witi,
poromakau mai mamoe,
hoti,
mai kariota,
taꞌaraꞌi haukia,
mai maearima ekia mauri.
14 Taba tikawakawai haukia weiakia katehina bena katetibaha,
‘Babulonia e,
taba namokia onuatae ainakia
haukia teꞌakauma,
mai emu obia tabakia mai
emu nuabi tabakia ikoikiai
hanona aba teꞌakauma,
ba aꞌi kotabu ahi muenakia.’
15 “Kawakawa haukia taba weiakia ia herenai tekawa kawainakia ba monikiai teobia haukia atauꞌa ꞌakinai katekoroti,
katetaꞌu haiara weiana kiꞌa obona paunai katehai ꞌari kiꞌa baha.
16 Kateꞌabi katetibaha,
‘Ekiꞌa kiꞌa baha,
aiara apaꞌuana herena
ekiꞌa kiꞌa baha.
Habuni namoabukia,
apupukia,
mai birokia
obatotonakia,
gold,
pihara namoabukia ꞌimarekia,
emu obia tabakia neiakia
ikoikiai hanona aba tepururu.’
“Aunohi kapena haukia ikoikiai mai teheꞌau tiharima haukia ikoikiai,
aunohi ai tiaka haukia ikoikiai mai ekia mauri ꞌakuai tikaoao aina haukia ikoikiai atauꞌai katekoroti.
18 Ia niꞌara hiabuna nikaraꞌau kateihana raninai kateio katetibaha,
‘Aiara tabana hanona
aiara apaꞌuana neiana ꞌabana?’
19 Arakiai apuroro katehore ꞌaunakia katehai ꞌari kiꞌa baha katetibaha,
‘Ekiꞌa kiꞌa baha,
aiara apaꞌuana herenai
ekiꞌa kiꞌa baha,
mai ekia aunohi ꞌaku kapenai
haukia ikoikiai oi emu
obia tabakiai kepu haukiai teao,
ꞌa beraura hoana hamona ꞌakimo
aonai oi aba opururu.
20 Tomoaonamo.
Kupa,
mai Tirama ena robe haumi,
mai iuhubeau haumi,
mai mahabanai haumi e,
tomoaonamo kiꞌa baha,
Tirama ehore ia puma ebahoaina
pokina ia wai heremiai
ebabai kiꞌa paunai.’”
21 Ba aneru taburana ha ehore iata rarina ꞌakina ha eaꞌi taeana ꞌaku aonai ekapo uhuna ba eꞌabi etibaha,
“Taeara neiana ihobonai
Babulonia aiara apaꞌuana
ꞌaku aonai katekapo uhuna,
ba aꞌi kateiha muena.
22 Kita atana hap tipapura aina
haukia ekia ꞌuru namokia,
mai hui aꞌitaea haukia,
marori mai pihi ubai haukia
ꞌurukia namokia oi aomuai
aꞌi kateo muena.
Oi aomuai aka haeai haeai
tibabai haukia ha
aꞌi katetabu ahi muena.
Oi aomuai tona tiorina ꞌuruna
aꞌi kateo muena.
23 Ramepa eana ha oi aomuai
aꞌi keꞌara mue.
Hawainibe mahamaha hauna
mai babiꞌena aiakia oi aomuai
aꞌi kateoꞌo muenakia.
Neiakia katerama pokina
emu kawakawa haukia hanona
hanopaka ena maearima
apaꞌuakiai teao,
oi emu nepuai hanona
hanopaka maearimakia
oꞌoi ahinakia.
24 Babulonia aiara apaꞌuana
hanona puma ehoaina
pokina ia aonai mahabanai haukia
mai Tirama ena robe haukia
aruarukia tetabu ahinakia,
mai hanopaka ahanai
teahu ꞌarinakia haukia
ikoikia aruarukia.”