Rea Babiꞌena Apaꞌuana Ena Puma Kehoaina.
17
Epua,
aneru ꞌabaihau hamomo weiakia puou ꞌabaihau hamomo teaꞌinakia haukia ꞌabakia ha emai hereꞌu ehina benaꞌu etibaha,
“Omai,
au kahore rea babiꞌena apaꞌuana ena puma kehoaina hauna kabaihaniꞌo,
ia hanona bei boꞌona ꞌarakiai nemiati.
2 Hanopaka ena obia ꞌarana haukia rea babiꞌena weiana kipokia tenabau,
hanopaka maearimakia abomo ia kipokia tenabau matoha biai teinu ꞌari ꞌabana.”
3 Ba Auba Robe aoꞌu ebabonu ꞌauna,
aneru weiana ehore eaoainaꞌu hanoꞌakuna,
weia babiꞌe ha aihana,
aiahu mahina ha birona ahanai emiaꞌau.
Mahi weiana hauna maikoinai ata tererenakia weiakia hanona ꞌabi kiꞌa obokia Tirama herenai,
mahi weiana ꞌarana hanona ꞌabaihau hamomo ꞌeana harau haea.
4 Babiꞌe weiana hanona habuni apupuna mai birona ebatotona,
gold mai pihara namoabukia ꞌimare ꞌimarekiai,
mai kutu ꞌimare ꞌimarekiai ebataitaina,
imanai hanona gold ꞌerena ha,
aonai hanona ena aka kiꞌa obokia mai ena nabau hoahoakia ꞌopukiai ebonu.
5 Ia pauna ahanai hanona ata bunina ha tererena,
‘BABULONIA APAꞌUANA,
HANOPAKA ENA REA BABIꞌEKIA IKOIKIAI MAI TABA KIꞌA OBOKIA MAIKOINAI HINAKIA.’
6 Ba babiꞌe weiana aihana hanona Tirama ena robe haukia mai Iesu pouna tehinana haukia eahu ꞌarinakia mai aruarukiai einu ꞌari.
Aihana raninai ataꞌutaꞌu huri.
7 Ba aneru weiana ehina benaꞌu etibaha,
“Aehoma buonai nutaꞌutaꞌu huri?
Au kahore babiꞌe naiana ꞌabina bunikia mai mahi weiana ahanai emiaꞌau ꞌarana ꞌabaihau hamomo ꞌeana harau haea hauna anina kabaꞌiobiniꞌo.
8 Ba aiahu mahina naiana oihana hauna hanona ꞌuainai emiaho,
ia bariu hanona aꞌi nemiaho,
ia hanona ꞌuri ꞌourana weiana aꞌena ahaꞌi haunai kekaraꞌau kemai,
ba keao kepururu baihana.
Maearima weiakia hanopaka erama emaimo bariu hanopakai temiaho haukia,
weiakia atakia mauri pukana aonai aꞌi tererenakia haukia,
mahi weiana kateihana hanona katetaꞌutaꞌu huri,
pokina ia hanona ꞌuainai emiaho,
bariu aꞌi nemiaho,
haeamona kemai mue.
9 “Maearima mai ena aobero hauna hanona neiana obona keobo,
aiahu mahina arana ꞌabaihau hamomo hanona oeo ꞌabaihau hamomo,
aiara weiakia babiꞌe epoki ainakia,
mai obia ꞌarakia haukia ꞌabaihau hamomo.
10 Weiakia haukia ima hanona aba tepururu,
ia ha hanona bariu nemiaho,
ha hanona aꞌi nimai baha,
ia weiana kemai raninai rani papana mo kemiaho.
11 Aiahu mahina weiana ꞌuainai emiaho ia bariu aꞌi nemiaho hauna hanona obia ꞌarana hauna ibaꞌababanina,
weiakia ꞌabaihau hamomo haukia ꞌabakia ha,
ba ia abomo kepururu.
12 “Aiahu mahina ꞌeana harau haea weiakia oihanakia hanona obia ꞌarakia haukia harau haea,
iamo obia ꞌarakiai haukia weiakia ekia aiara aꞌi tiaꞌi bahanakia,
ia aiahu mahina kipokia obia hiabuna kateaꞌina beraura hoana hamona aonai.
13 Obia ꞌarana haukia weiakia harau haea ikoikiai ekia raona hanona kehamona,
ba ekia tabura mai ekia hiabu aiahu mahina katebena.
14 Ba ia haukia hanona Mamoe nahu katehuarina,
ia Mamoe nahu kehore keahu ꞌitiꞌitinakia,
pokina ia hanona obia ikoikiai ekia Obiapaka mai obia ꞌarana haukia ekia Obia ꞌarakiai hauna,
ia tiꞌabana haukia weiakia eaparinakia mai etinaꞌanakia,
mai aia ibabua ꞌau haukia hanona Mamoe nahu kipokia huari aonai ekia ꞌou haukia kateahu ꞌitiꞌitinakia.”
15 Weiana aneru haeamona ehina benaꞌu etibaha,
“Bei weiakia oihanakia ahakiai rea babiꞌena emiaꞌau,
hanona maearima haeai haeai,
rama haeai haeai,
hano haeai haeai,
mai maea haeai haeai haukia.
16 Aiahu mahina mai ꞌeana harau haea oihanakia haukia hanona rea babiꞌena weiana ꞌarina aꞌi kateꞌari,
ena taba ikoikiai kateaꞌi obonakia maihauna katehabona,
bitiona kateana,
iruba ai katehuhuna keꞌara obo.
17 Pokina Tirama obia ꞌarana haukia weiakia aokiai hanona nuatae ehorotina ena raona ikoinai katebaorena,
weiana aokia katebahamomona ekia hiabu aiahu mahina katebena keobia aina,
keaomo Tirama ena ꞌabi ketohana.
18 Babiꞌe weiana oihana hauna hanona aiara apaꞌuana,
weiana hanopaka ena obia ꞌarana haukia ikoikiai nipoki ainakia.”