Tirama Ena Opuere Puoukia ꞌAbaihau Hamomo Tebakiki Oioinakia.
16
Epua,
aia ha marea robeai aona aneru ꞌabaihau hamomo ehinabe ꞌaotanakia etibaha,
“Tomoao,
Tirama ena opuere puoukia ꞌabaihau hamomo haukia katobakiki oioinakia hanopaka ahanai.”
2 Ua buonai aneru koriꞌuaina eao ena puou hano ahanai ebakiki oina,
ba tua kiꞌa obokia mai haiarakia maearima weiakia aiahu mahina ena maniꞌa teaꞌina haukia mai ena kaibaꞌuku tekuti aina haukia ahakiai terama.
3 Aneru ibaruana ehore ena puou ꞌaku ahanai ebakiki oina,
ba ꞌaku ebaebo matoha ꞌari hauna aruaruna ꞌabana,
ba taba weia ꞌaku aonai ṯemiaho haukia ikoikiai teꞌari.
4 Aneru ibaihauna ehore ena puou ate mai bei hanoai ṯebuti haukia ahakiai ebakiki oina,
ba tebaebo aruaru ai teao.
5 Ba bei nipoki ainakia aneruna aiana aona eꞌabi etibaha,
“Robe Tiramana e,
oi nomiaho mai ꞌuainai
omiaho haumu,
emu bakai neiakiai kiꞌa haukia
puma obahoainakia hanona
obero kiꞌa baha.
6 Pokina ia tehore emu
robe haukia mai mahabanai haukia
teahu ꞌarinakia aruarukia
tebakiki oinakia,
ba oi ohore aruaru obenakia
kateinu hanona ekia kiꞌa
ꞌarana obamuena.”
7 Ba aia ha itara robenai emai aona eꞌabi etibaha,
“ꞌE,
ꞌabi tohana,
Obiapaka
hiabu ikoinai Tiramana e,
oi emu bakai weiana kiꞌa haukia
puma obahoainakia hanona tohakia mai tebero.”
8 Aneru ibabanina ehore ena puou beraura ahanai ebakiki oina,
ba beraura bero tebena irubanai maearima kebaꞌaranakia.
9 Hiabu rarina ꞌakina ehore maearima ebaꞌaranakia,
ba Tirama weiana maearima iaꞌikiꞌakia neiakia ebaramanakia hauna atana teururu aina haeamona raona kabe aꞌi tenuatae aina mai ia aꞌi tebanamona.
10 Aneru ibaimana ehore ena puou aiahu mahina ena obia imiaꞌauna ahanai ebakiki oina,
ba mahi weiana ena obia aiarana maikoina ewapura abuna,
weiana maearima tehaiara kiꞌa baha paunai maeakia teꞌurinakia,
11 mai ekia haiara mai ekia tua paukiai Tirama weiana kupai nemiaho hauna teururu aina,
mai ekia aka kiꞌai kateraona kabe hanona aꞌi tenuatae.
12 Aneru ibaꞌabaihauna ehore ena puou Eufrate atena apaꞌuana ahanai ebakiki oina,
ba ate beina eꞌororo ꞌau,
taetana tainai obia ꞌarana haukia ekia taeara ebaꞌoruna katemai.
13 Ba auba kiꞌa obokiaa aihau aihanakia ihakia matoha hobi ꞌabakia,
ia hanona mahi atana dragona hauna pinanai,
mai aiahu mahina pinanai,
mai mahabanai hauna baiꞌoina pinanai tekarahi.
14 Ia hanona tiaporo aubakia kiꞌa obokia,
hoa mai bataꞌutaꞌu huri akakia tibabai,
ba ia hanona tikarahi hanopaka maikoina ena obia ꞌarana haukia katebararonakia Hiabu ikoinai Tiramana ena bakai wapuna apaꞌuana kemai raninai katehuarina.
15 Weiana aia ha aona eꞌabi etibaha,
“Tomobahu,
au hanona bainao hauna ꞌabana kawahi.
Hau ha enoꞌa nemiaho mai ena habuni ebatotona nemiaho hauna hanona enamo,
weiana ia hauna ꞌabaeana aꞌi kekabanai kabanai,
haeamona mako wairakiai aꞌi kehaumaea.”
16 Ba auba kiꞌa obokia aihau weiakia tehore obia ꞌarana haukia tebararonakia ꞌeka weiana Heberu maeakiai atana teaparina ‘Aramagedono’ haunai.
17 Aneru ibaꞌabaihau hamomona ehore ena puou maeabu aonai ebakiki oina,
ba marea robe aonai obia imiaꞌauna ahanai aia ha emai eꞌabi ꞌaota etibaha,
“Aba eore.”
18 Ba kupa eꞌimare,
eroꞌu,
ꞌuru rarikia tebua,
mai kanokau kiꞌa obokia ꞌakikia tekaꞌa,
kanokau ua homana ha aꞌi ekaꞌa ꞌapua uaꞌi baha ꞌakinai maearima hanopakai erama raninai emai mo bariu,
kanokau neiana hanona kiꞌa obona tohana.
19 Weiana aiara apaꞌuana atana Babulonia hanona epaꞌa paipana aihau,
mai hano ikoikiai aiarakia apaꞌuakia hanona tepururu.
ꞌA Tirama hanona Babulonia aiara apaꞌuana ena kiꞌa eraona ꞌinina,
ba ia ehore ena kaputi ai Babulonia ebainuna,
kaputi weiana hanona Tirama ena opuere kiꞌa obona waininai ebonu ꞌauna.
20 Ba kereibua ikoikiai teꞌakauma,
mai kobio hanona wairakia ahaꞌi.
21 Abara kupai teꞌeho matoha pihara apaꞌuakia,
ekia puma hanona kilogram imabui ꞌabana hanona kupai teꞌeho maearima teahu kiꞌanakia,
ba maearima tehore Tirama teururu aina pihara abarana weiana paunai,
pokina ena iaꞌikiꞌa neiana hanona ekiꞌa kiꞌa baha.