Aneru ꞌAbaihau Hamomo Iaꞌi Kiꞌakia Tabakia Orekia ꞌAbaihau Hamomo Teaꞌinakia.
15
Epua,
au bataꞌutaꞌu huri hoana haeai ha apaꞌuana kupai aihana.
Aneru ꞌabaihau hamomo imakiai hanona maearima iaꞌi kiꞌakia tabakia kiꞌa obokia ꞌabaihau hamomo teaꞌinakia,
neiakia hanona orekia,
murikiai hanona haeai ha aꞌi kerama,
weiana Tirama ena opuere hanona keore.
2 Haeamona mahaꞌu eao taba ha aihana,
ihana matoha ꞌakupaka weiana eiroro wairai ihobona karati mai irubana ꞌabana.
Maearima weiakia aiahu mahina mai ena kaibaꞌuku mai atana irere ituabina hoana teahu parenakia haukia ikoikiai weia ꞌaku haianai tekoroti,
Tirama kita atakia hap ebenakia hanona imakiai teaꞌinakia.
3 Ia hanona Mose weiana Tirama ena taꞌaraꞌi hauna ena hui ha mai Mamoe nahu ena hui abomo ha tehuiaina tetibaha,
“Obiapaka
hiabu ikoinai Tiramana e,
emu aka teapaꞌua kiꞌa baha,
bataꞌutaꞌu huri akakia nubabai.
Uru ikoikiai ekia Obia ꞌarana e,
emu taeara hanona tebero wairai
abomo toha tohakia.
4 Obiapaka e,
ikoikiai hanona oi
katetaꞌu ainiꞌo,
mai oi
atamu kateaꞌi taeana.
Pokina oi ikupaiamu
hanona orobe.
Hano ikoikiai hanona katemai
oi wairamuai katekuti ainiꞌo.
Pokina oi emu babai berokia
hanona aba tewaira tina.”
5 Neiakia murikiai mahaꞌu eao kupai marea robe aihana ikaikau emiaho,
weiana hanona Tirama ena rauhubu emiaho paraboana.
6 Ba aneru ꞌabaihau hamomo aba tebaꞌoru maearima iaꞌi kiꞌakia tabakia kiꞌa obokia ꞌabaihau hamomo katebabainakia haukia marea robeai tekarahi,
habuni namokia tohakia atakia linen mai ꞌimare ꞌimarekia tebatotonakia,
mai gold ꞌapakia haharakiai teꞌaberenakia.
7 Weiana mauri tabakia bani baiatakiai ha ehore gold puoukia ꞌabaihau hamomo eaꞌinakia aneru ꞌabaihau hamomo weiakia ebenakia,
puou weiakia aokiai hanona Tirama weiana kemiaho banaibanai hauna ena opuere ebonu.
8 Ba Tirama ena nuabi mai ena hiabu paunai iruba hiabuna marea robe aonai ebabonu ꞌauna,
hau ha aꞌi kekatoto ꞌapua keaomo aneru ꞌabaihau hamomo weiakia katehore maearima iaꞌikiꞌakia tabakia kiꞌa obokia ꞌabaihau hamomo katebaore harainakia.