Mamoe Nahu Ena Maearima Hui Mahamahana Teaꞌina.
14
Epua,
mahaꞌu eao hanona mamoe nahu aihana,
Siona Oeona ahanai ekoroti,
herenai hanona maearima ikoinai taha ikoinai hinabu hamomo bariabui bani (144,000) weiakia paukia ahakiai ia atana mai Hamana atana tererenakia haukia.
2 Ba ꞌuru namona ha aona kupai emai,
ꞌuruna matoha ate boꞌokia tiaru mai kupa niroꞌu ꞌuruna ꞌabana.
ꞌUru weiana aona hanona matoha kita ahu haukia ekia kita atakia hap tipapura ainakia ꞌabana.
3 Ba maearima weiakia tehore Tirama ena obia imiaꞌauna mai mauri tabakia bani mai kiro haukia wairakiai,
hui mahamahana ha teaꞌina.
Tai ha hui weiana kemarere aina aꞌi ketaina ia weiakia haukia 144,000 hanopaka herenai aruarunai ekawanakia haukia mo teꞌiobina.
4 Maearima weiakia hanona babiꞌe kipokia aꞌi tenabau haukia,
ekia mauri aonai hanona kiꞌa herenai teꞌabaea harai,
ia Mamoe nahu aeana niao hanona murinai tiꞌau haukia,
mai hanopaka maearimakia baiatakiai ia ekawanakia,
mai baibeni tabakia koriꞌuaikiai teao Tirama mai Mamoe nahu herekiai.
5 Baiꞌoi ꞌabina ha pinakiai aꞌi tehina,
ia hanona herekia beho ahaꞌi.
Aneru Aihau Bakai Ranina Pouna Tehinana.
6 Epua,
aneru haeai ha kupa baiatanai erobo aihana,
ia hanona Pou namona nemiaho banaibanai hauna eaꞌina,
weiana hanopakai ṯemiaho haukia herekiai keiroro aina,
hano ikoikiai,
itubu ikoikiai,
maea haeai haeai,
mai maearima ikoikiai herekiai.
7 Ia ehore eꞌabi aota etibaha,
“Tirama tomotaꞌu aina mai ia atana tomobanamona,
pokina maearima ikoinai kebabakainakia ranina aba etaina,
ia hanona kupa,
hanopaka,
ꞌakupaka,
mai bei hanoai ṯebuti haukia ebabainakia hauna,
tomokuti aina.”
8 Ba aneru ibaruana ha aneru koriꞌuaina murinai erobo,
eꞌabi aota etibaha,
“Aba eꞌeho!
Babulonia aiara apaꞌuana,
aba eꞌeho.
Ia ehore ena biai hano ikoikiai maearimakia ebainu ꞌarinakia,
bia weiana hanona ena maha porepore hoahoakia.”
9 Ba aneru ibaihauna ha aneru rua teꞌuai haukia murikiai erobo,
eꞌabi aota etibaha,
“Hau ha aiahu mahina mai ena kaibaꞌuku nekuti ainakia,
mai ia pauna ahanai ꞌao imana ahanai mahi ena maniꞌa niaꞌina hauna,
10 ia abomo Tirama ena opuere wainina keinu,
weiana Tirama ia keopuere aina puma kebahoai kiꞌana matoha waini weiana kaputi aonai aba teheina bei kipokia aꞌi tebahaeamona hauna ꞌabana.
Kiꞌa hauna weiana hanona aneru robekia mai Mamoe nahu wairakiai kehaiara iruba mai pihara atana salpa mai irubana aokiai.
11 Iruba weianai tihaiara hiabuna hanona kekaraꞌau toꞌona keaomo banaibanai.
Aiahu mahina weiana mai ena kaibaꞌuku ṯekuti aina haukia ꞌao mahi atana maniꞌana teaꞌina haukia hanona ekia arai ranina ha ahaꞌi,
mararani mai rabi katehaiara mo.”
12 Neiana buonai Tirama ena robe haukia weiakia ena rauhubu ꞌabikia tikaꞌainakia mai Iesu tiaꞌikakaumana haukia hanona bakiroai katemiaho.
13 Ba aia ha kupai aona eꞌabi etibaha,
“ꞌAbi neiana morerena.
Bariu keaomo wairai aonai weiakia Obiapaka aonai tiꞌari haukia hanona tenamo.”
Auba Robe abomo eꞌabi etibaha,
“ꞌAbi tohana,
ekia aroꞌariai katearai,
pokina ekia hoahoa namokia katehore ia kateꞌabanakia.”
Hanopaka Ena Ariari Ranina Ekaraꞌau.
14 Epua,
mahaꞌu eao hanona ꞌauhao ha porena wairaꞌuai aihana,
ꞌauhao weiana ahanai hanona hau ha ihana matoha Maearima nahuna ꞌabana emiaꞌau,
ꞌarana ahanai hanona obia ibauꞌuna gold ai tebabaina hauna,
ba imanai hanona iraburabu tabana ha nihena eara hauna eaꞌina.
15 Ba aneru haeai ha marea robeai ekarahi emai ba ꞌauhao ahanai emiaꞌau hauna eaparina aiana ꞌubiai etibaha,
“Emu iraburabu moaꞌina moariari aina,
pokina witi iarina ranina aba ekaraꞌau,
hanopaka witina hanona aba teꞌoru harai.”
16 Ua buonai ꞌauhao ahanai emiaꞌau hauna ehore ena iraburabu tabana eraburabu aina,
ba witi hanopakai hauna maikoina earina.
17 Ba aneru haeai ha marea robe kupai hauna aonai ekarahi,
ia abomo imanai iraburabu tabana ha nihena eara hauna eaꞌina.
18 Haeamona aneru haeai ha weiana iruba nipoki aina hauna itara robenai emai ba aneru weiana imanai iraburabu nihena eara hauna eaꞌina hauna eaparina,
aiana ꞌubiai etibaha,
“Emu iraburabu moaꞌina hanopaka ena bine haharuanai bine buabuakia moarinakia,
pokina hanopaka ena bine buabuakia hanona aba teꞌaiba harai.”
19 Ba aneru weiana ehore ena iraburabu tabana hanopaka ahanai eraburabu aina,
hanopaka ena bine buabuakia ekabe hurinakia,
eba raronakia ba ekapo utanakia bine buabuakia imutukia ꞌekanai,
weiana hanona Tirama ena opuere ꞌekana.
20 Ba aiara kapenai bine buabuakia imutuna ꞌekanai temutunakia,
ba imutu ꞌekanai aruaru earu ahi,
earu eao ena roꞌe hanona hoti ekoroti pinana ihobona,
ꞌa ena homaꞌa hanona kilometa hinabu aihau.