Aiahu Mahikia Rua Tekaraꞌau.
13
Epua,
mahaꞌu eao hanona aiahu mahina ha ꞌakuai ekaraꞌau aihana.
Ia hanona ꞌeana harau haea mai ꞌarana ꞌabaihau hamomo,
ba ꞌeana korikiai hanona mai ekia obia ibauꞌukia harau haea,
ꞌara ha ha ahakiai hanona Tirama ibakiꞌana ꞌabikia atakiai tererenakia.
2 Aiahu mahina weiana aihana ihana hanona matoha puti ꞌaki apaꞌuana atana taiga ꞌabana aena ihakia hanona matoha mahi atana bea aena ꞌabana,
mai pinana ihana matoha mahi atana laiona pinana ꞌabana.
Ba mahi weiana atana dragona hauna ehore kipona ena tabura,
mai ena obia imiaꞌauna,
mai hiabu apaꞌuana aiahu mahina weiana ebena.
3 Aiahu mahina weiana aihana ꞌarana ha hanona matoha imoai eꞌari ꞌabana iamo imoa weiana haeamona enamo,
ba hanopaka maikoinai tetaꞌutaꞌu huri mahi murinai tekaꞌa.
4 Maearima dragona tekuti aina,
pokina ia ehore ena hiabu aiahu mahina ebena,
abomo aiahu mahina tekuti aina,
teꞌabi tetibaha,
“Tai hanona aiahu mahina neiana ꞌabana?
Tai mai ena tabura ia kehuarina?”
5 Aiahu mahina hanona bero tebena apa ꞌabikia,
mai Tirama ibakiꞌana ꞌabikia kehina,
hiabu tebena nawa bariabui rua aokiai hoahoa weiana kebabaina.
6 Pinana ekaikauna Tirama ibakiꞌana ꞌabikia ehina,
mai atana abomo eꞌabi kiꞌa bena,
Tirama ena miaho ꞌekana mai weiakia kupai ṯemiaho haukia ikoikiai abomo eꞌabi kiꞌa benakia.
7 Ia hanona hiabu tebena Tirama ena robe haukia kehuarinakia keahunakia,
ba bero tebena itubu ikoikiai,
maearima ikoikiai,
maea ikoikiai abomo hano maikoinai kepoki ainakia.
8 Maearima ikoikiai hanopaka ahanai ṯemiaho haukia,
weiakia Tirama hanopaka ebakorina murinai atakia Mamoe nahu ena mauri pukanai aꞌi tererena haukia ikoikiai hanona aiahu mahina weiana katekuti aina.
Mauri pukana weiana hanona Mamoe nahu ꞌuainai teahu ꞌarina hauna ꞌeuna.
9 Mai haiana hauna kehore aia neiana keona.
10 Tirama nenuatae hau ha kateaꞌina
katebawapurana raninai,
hau weiana hanona kateaꞌina
katebawapurana.
Haeamona Tirama nenuatae hau ha
akiuai keꞌari raninai,
hau weiana hanona akiuai
kateharana ba keꞌari.
Neiana buonai Tirama ena robe
maearimakia hanona bakiroai
mai aꞌikakaumai katemiaho.
11 Epua,
aiahu mahina haeai ha aihana,
hano aonai ekaraꞌau,
ꞌeana hanona rua matoha mamoe nahu ꞌabana,
ia eꞌabi aiana hanona matoha mahi atana dragona ꞌabana.
12 Ia hanona aiahu mahina weiana koriꞌuaina hauna herenai emiaho ena hiabu ihobonai eaka,
hiabu neianai hanopaka mai ṯemiaho aina maearimana ikoikiai ebahi ahinakia mahi koriꞌuaina weiana ꞌaranai imoa enamo hauna katekuti aina.
13 Aiahu mahina ibaruana ehore bataꞌutaꞌu huri akakia apaꞌuakia ebabainakia,
ha hanona maearima ikoikiai wairakia tohanai iruba weia kupai euhu ririna emai hanopakai.
14 Pokina bero eaꞌina bataꞌutaꞌu huri akakia weiakia aiahu mahina koriꞌuaina herenai emiaho aonai ebabainakia haukiai hanopaka haukia eꞌoinakia.
Aiahu mahina ibaruana ehore hanopaka maearimakia ebahi ahinakia kaibaꞌuku ha katebabaina aiahu mahina koriꞌuaina imarikiaina paunai,
weiana akiuai imoa eaꞌina ba emauri mue hauna.
15 Aiahu mahina ibaruana hauna bero eaꞌina,
kaibaꞌuku weiana mauri maeabuna ebena keꞌabiꞌabi,
mai hiabu ebena kaibaꞌuku kehore maearima kehina benakia weiakia kaibaꞌuku aꞌi katekuti aina haukia ikoikiai kateahu ꞌarinakia.
16 Haeamona aiahu mahina ibaruana ehore maearima ikoikiai ebahi ahinakia,
papakia mai apaꞌuakia,
obia huakia mai uraru haukia,
taꞌara aꞌi tiaꞌi haukia mai taꞌara tiaꞌi haukia,
ikoikiai hanona maniꞌa ha imakia itipanai ꞌao paukia ahakiai kateaꞌina.
17 Maearima maniꞌa weiana aꞌi keaꞌina hauna hanona taba ha aꞌi kekawana mai taba ha aꞌi kekawakawai ꞌapuana,
maniꞌa weiana hanona aiahu mahina weiana atana ꞌao atana irere ituabina hauna.
18 Maearima mai ena aobero hauna ata ituabi neiana keꞌiobina hanona ketaina,
aobero hauna kehore aiahu mahina ata ituabina keraonana,
pokina tuabi tuabi neiana hanona maearima ha atana ituabina ihobona,
tuabi tuabi neiana hanona hinabu ꞌabaihau imabui harau haea reana ꞌabaihau (666).