Babiꞌe Ha Mai Mahi Ha Atana Dragona.
12
Epua,
hoa apaꞌuana ha kupai ewaira tina.
Babiꞌe ha ena habuni ibatoto hanona beraura,
mai nawa hanona ia ꞌapuna baꞌakiai,
mai bihiu harauhaea rua hanona ena obia ibauꞌunai ṯemiaho aranai ebauꞌuna.
2 Ia hanona mai nuana ba mai haiarana nihai ihobona aba kemauri.
3 Ba hoa haeai mo ha kupai ewaira tina.
Mahi ha weia atana dragona ꞌerau ꞌabana rarina ꞌakina birona weia ꞌarana ikoinai ꞌabaihau hamomo,
ꞌarana ha ha ahakiai hanona obia ibauꞌukia,
haeamona ꞌeana hanona ikoinai harau haea.
4 Aꞌarenai kupa bihiukia iwate paipana aihau aonai paipa ha kupai etaro ahinakia hanopakai ekapo ꞌaunakia.
Mahi weiana hanona babiꞌe aba kemauri hauna wairanai ekoroti,
nibaiꞌima babiꞌe miori kebaramana hanona keana.
5 Ba babiꞌe emauri nahuna hanona hau papana,
miori weiana hanona hanopaka maearimakia ikoikiai auri ikaiꞌininai kepoki ainakia,
ba miori hanona teaꞌi parena teaoaina Tirama herena mai ena obia imiaꞌaunai.
6 Babiꞌe hanona ebeau ꞌakaumana eao hanoꞌakunai,
Tirama ꞌeka ha aba ebaꞌoruna ia ꞌeuna,
weia ia kateiha ꞌinina keao wapu ikoinai taha hamomo hinabu rua imabui harau haea (1,260).
7 Epua kupai huari erama,
Mikaela mai ena aneru kipokia mahi atana dragona tehuarina,
mahi weiana ena aneru kipokia tehore Mikaela tehuarina.
8 Iamo mahi ena tabura hanona aꞌi etaina,
ba ekia ꞌeka kupai hauna tebaꞌakaumana.
9 Mahi rarina ꞌakina weiana hauna kupai tekapo ahina.
(Ia hanona ꞌerau ꞌaiꞌaina weiana atana hanona Tiaporo ꞌao Satani,
hanopaka maikoina niꞌoi ahina hauna.)
Ia hanona tekapo ahina eriri hanopakai mai ena aneru kipokia.
10 Ba aia ha rarina ꞌakina kupai aona eꞌabi etibaha,
“Bariu eka Tirama ena bamauri,
ena hiabu,
mai ena obia aiarana,
mai Keriso ena hiabu hanona
aba tewaira tina,
pokina uahoꞌabaka ekaiahinakia
hauna,
weiana rabi mai mararani
Tirama wairanai ekaiahinakia
hauna hanona aba tekapo ahina.
11 Uahoꞌabaka tehore Mamoe nahu
ena ꞌari aruarunai mai
ꞌabi tohana ihinana paukiai
tiaporo weiana teahu parena.
Ia kipokia ekia mauri hanona
aꞌi teraonaꞌau aina
iamo tenuatae kateꞌari.
12 Ua buonai tomoaoanamo kiꞌa,
wai kupa mai kupai
ṯomiaho haumi.
Iamo wai hanopaka
mai ꞌakupaka heremiai
hanona kekiꞌa kiꞌa baha,
pokina Tiaporo hanona
aba eriri ewahi heremi,
niopuere kiꞌa baha,
pokina eꞌiobina ena rani hanona
aba ekoꞌo koꞌo.”
13 Dragona weiana eꞌiobina ia hanona aba tekapo ahina eriri hanopakai hanona ia ehore babiꞌe weiana miori ebaramana hauna ebatetuana.
14 ꞌA babiꞌe hanona poꞌi apaꞌuana ha banina rua tebena,
weiana ia kehore kerobo keao hanoꞌakuna ena ꞌeka ha,
aba tebaꞌoruna weia kateiha ꞌinina ihau aihau mai abirana ha aonai,
ꞌerau weiana ia aꞌi ketabu ahina.
15 Ba ꞌerau weiana pinanai hanona bei emama ahina matoha ate ꞌabana weiana babiꞌe murinai earu eao kearu ꞌakaumana.
16 Iamo hanopaka ehore babiꞌe ebaraina,
hanopaka pinana ekaikauna tou beina weiana dragona pinanai earu emai hauna maikoinai etono ꞌau orena.
17 Dragona hanona babiꞌe eopuereai kiꞌana,
ba eao babiꞌe nahuna ikoikiai kehuarinakia.
(Weiakia hanona Tirama ena rauhubu ꞌabikia tikaꞌaina haukia mai Iesu ehina pounakia ꞌabikia tiaꞌi taeana haukia.)