Pou Hina Haukia Rua.
11
Epua,
hiribo ha matoha ikaiꞌini ꞌabana ebenaꞌu ba ehina benaꞌu etibaha,
“Omikiri,
Tirama ena marea robe mai itara robena kohobonakia,
abomo aonai maearima tibahubaꞌari haukia kotuabinakia.
2 ꞌA marea robe ara aonai ena iꞌaea huri ꞌekana atapakai hauna hanona aꞌi kohobona,
pokina Tirama ena maearima ahaꞌi haukia aba ebenakia ia hanona nawa bariabui rua aiara robena katehe hai ehe haina.
3 Iamo au pouꞌu ihinana haukia rua hiabu kabenakia,
pute habunikia weiakia aokoꞌo katebaiha baihaina haukia katebatotonakia,
weiana wapu taha hamomo hinabu rua imabui harau haea (1,260) weia mahabanai ꞌabina katehinana.”
4 Neiakia hanona olibe matiukia rua mai ramepa rua hanopaka ikoinai Obiapakana wairanai tekoroti haukia.
5 Ba hau ha kenuatae terarua keaꞌi kiꞌakia raninai,
terarua pinakiai iruba katekarahi weiakia ekia ꞌou haukia keahu ꞌari orenakia,
weiana maearima tabana iaꞌi kiꞌakia kenuatae aina hanona ia abomo ua keꞌari aiho.
6 Ia terarua hanona mai hiabukia kupa katekaiabuna,
weiana ekia mahabanai ꞌabina ihinana beraurakia aokiai hanona abara aꞌi ketibo.
Abomo mai hiabukia bei ꞌaki katebahaeaina aruaruai keao,
weiana katenuatae raninai atetua ibaramana akakia haeai haeai hanopakai kateba ramanakia.
7 Ekia pou hina ꞌabina weiana katebaorena kepua murinai,
aiahu mahina weiana ꞌuri eꞌoura kiꞌa aonai kekaraꞌau hauna kehore terarua kehuari benakia keahunakia keahu ꞌarinakia.
8 Weiana terarua teꞌari hauanikia hanona aiara apaꞌuana Ierusalema airabuanai katenoti.
Weiana hanona terarua ekia Obiapaka matiu ibiri ropo ubinai eꞌari ꞌekana,
aiara weiana ꞌabi ibabatainai atana tehinana,
Sodoma ꞌao Aikupito.
9 Wapu aihau mai abirana ha aonai maearima haeai haeai,
itubu haeai haeai,
maea haeai haeai,
mai hano haeai haeai haukia katemai ꞌari hauanikia weiakia rua kateihanakia,
iamo katehina benakia aꞌi kate horenakia.
10 Hanopaka haukia hanona hau rua ekia ꞌari paunai kateaonamo kiꞌa baha,
abomo maearima ha ha beruberu tabakia katebaibeni,
pokina mahabanai haukia weiakia rua tehore hanopaka haukia tebahaiara kiꞌanakia.
11 Iamo wapu aihau mai abirana ha weiakia teore murinai,
mauri nibaibeni maeabuna Tirama herenai emai terarua aokiai etoto,
weiana temikiri tekoroti.
Uaꞌa teihanakia haukia ikoikiai hanona tetaꞌu kiꞌa.
12 Ba aia apaꞌuana ha kupai emai teona,
eapari etibaha,
“Tomokaraꞌau tomai neia.”
Weiana terarua hanona iꞌoatakia haukia wairakiai ꞌauhao ha aonai tekaraꞌau teao kupa.
13 Beraura hoana weianai kanokau apaꞌuana ha ekaꞌa,
weiana aiara apaꞌuana iwate paipana harau haea aonai paipa ha maikoina hanona ebapururuna,
abomo kanokau ehore maearima ikoinai taha ꞌabaihau hamomo (7,000) ebaꞌarinakia.
Maearima harina weiakia aꞌi teꞌari haukia hanona tetaꞌu kiꞌa baha,
kupa Tiramana atana teaꞌi taeana.
14 Weiana hanona atetua kiꞌa obona ibaruana,
aba ekapo raina.
Iamo tomobahu,
atetua kiꞌa obona ibaihauna hanona aba kemai.
Aneru Ibaꞌabaihau Hamomona Ena Pihi Eubaina.
15 Epua,
aneru ibaꞌabaihau hamomona ehore ena pihi eubaina.
Weiana aia apaꞌuakia kupai teꞌabi tetibaha,
“Hanopaka ipokiaina hiabuna
hanona aba eka Obiapaka
mai ena Keriso ꞌeukiai eao.
Ia hanona obia ꞌaranai eao
hanopaka kepoki aina
keaomo banaibanai.”
16 Weiana kiro haukia haraurua bani Tirama wairanai ekia obia imiaꞌaukiai temiaꞌau haukia teꞌumuti tekuti Tirama tebanamona tetibaha,
17 “Obiapaka
Hiabu ikoinai Tiramana e,
oi nomiaho mai ꞌuainai omiaho.
Ai ṯahore namo ꞌabina ṯabeniꞌo.
Pokina emu hiabu apaꞌuana
aba oaꞌina.
Emu obia aiarana nupoki aina.
18 Hano haeai haukia teopuere,
iamo oi emu opuere
ranina ekaraꞌau.
Ba aba teꞌari haukia
oi emu bakai aonai
katewaira tina kobabakainakia
ranina aba ekaraꞌau.
Emu taꞌaraꞌi haukia
weiakia mahabanai haukia,
mai emu maearima robekia,
mai oi atamu timariki aina
haukia papakia eaomo apaꞌuakiai
epua,
ikoikiai ꞌarakia
namokia kobenakia
ranina aba ekaraꞌau.
Abomo hanopaka teaꞌi kiꞌana
haukia kobapururunakia
ranina aba ekaraꞌau.”
19 Weiana murinai aneru Tirama ena marea robe kupai hauna tekaikauna,
ba ena rauhubu mauana marea robe aonai hauna aihana.
Weiana kupa teꞌimare,
ꞌuru rarikia tebua,
kupa eroꞌu,
kanokau ekaꞌa,
mai abara etibo pihara ꞌabakia.