Aneru Ha Mai Puka Iouna Papana Ha.
10
Weiana aneru taburana ha aihana kupai eriri nimai hauanina ꞌauhao ai eroꞌabuna,
arana ubinai hanona ꞌopa,
wairana hanona ea matoha beraura,
ia aena ihakia hanona matoha iruba bero berokia ꞌabakia.
2 Imanai hanona puka iouna papana ha aba ikaikau hauna eaꞌina.
Aena itipana hanona ꞌaku ahanai eheꞌau ia awarina hanona hanopaka ahanai eheꞌau.
3 Aneru weiana eio aota matoha mahi atana laiona niꞌarara ꞌabana.
Ba eio raninai,
kupa rani ꞌabaihau hamomo eroꞌu,
roꞌu ha ha ꞌabi tehinana.
4 Ba roꞌu ꞌabaihau hamomo teꞌabiꞌabi nonoa hanona aiakia karerena ṉahoma,
iamo aia ha kupai emai aona etibaha,
“Roꞌu ꞌabaihau hamomo teꞌabi hauna kobunina,
aꞌi korerenakia.”
5 Weiana aneru aihana hauna ꞌaku ahanai mai hanopaka ahanai ekoroti hauna ehore imana itipana etiu taeana kupa.
6 Ba aneru weiana ehore miaho banaibanai Tiramana weiana kupa mai aona tabakia ikoinai mai hanopaka mai aona tabakia ikoinai mai akupaka mai aona tabakia ikoinai ebabainakia Tiramana atanai eꞌabi ꞌuai etibaha,
“Rani hanona aba keore,
Tirama hanona aꞌi kebaiꞌima homaꞌana.
7 Iamo aneru ibaꞌabaihau hamomona ena pihi keubaina raninai,
Tirama ena raona bunina hanona ketohana,
Pou namona neiana hanona ena mahabanai haukia ia taꞌarana teaꞌi haukia ehina benakia.”
Ioane Puka Iouna Papana Eana.
8 Ba aia weiana kupai ao ꞌuaina hauna haeamona ehinabe muenaꞌu etibaha,
“Moao aneru weiana ꞌakupakai mai hanopakai ekoroti hauna imanai puka iouna weiana ekaikau hauna koaꞌina.”
9 Ua buonai aeao aneru weiana herena ba anoina puka iouna papana weiana kebenaꞌu.
Ba ia au ehina benaꞌu etibaha,
“Moaꞌina moana moꞌorumuai hanona kemabi,
ꞌa pinamuai hanona kekuma kuma matoha hoho beina ꞌabana.”
10 Ba aneru imanai puka iouna papana weiana aꞌina ani obona,
weiana pinaꞌuai hanona ekuma kuma matoha hoho beina ꞌabana,
iamo ani obona murinai moꞌoruꞌuai hanona emabi.
11 Ba ehina benaꞌu etibaha,
“Oi hanona mahabanai ꞌabina kohina muena,
weiana maearima haeai haeai,
hano haeai haeai,
maea haeai haeai,
mai obia arakia haeai haeai haukia robakia koahuna.”