Aneru Ibaimana Ena Pihi Eubaina.
9
Weiana aneru ibaimana ehore ena pihi eubaina,
ba au bihiu ha aihana kupai aba eꞌeho hanopakai,
bihiu weiana hanona ꞌuri ꞌourana ꞌakina aꞌena ahaꞌi hauna kina tebena.
2 Ba bihiu weiana ehore ꞌuri ꞌourana ekaikauna,
weiana ꞌuriai hiabu ꞌumuna ekaraꞌau matoha iruba rarina ꞌakina hiabuna nikaraꞌau ꞌabana.
Weiana ꞌuri hiabuna ekaraꞌau beraura mai kupa ebawapuranakia.
3 Weiana hiabu aonai pekau tekarahi teriri hanopaka ahanai,
ia hanona hiabu ebenakia matoha hara nikainaka nahahaiara ꞌabana.
4 Iamo ehina benakia hano tubuna abomo ꞌanoai tiomu tabakia mai matiu ha aꞌi kateaꞌi kiꞌa,
ꞌa maearima weiakia paukia ahakiai Tirama ena maniꞌa ahaꞌi haukia mo kateaꞌi kiꞌanakia.
5 Ia pekau ehina benakia maearima aꞌi kateahu ꞌarinakia,
iamo kateba haiaranakia weiana nawa ima aonai katehaiara ihobona hara nikainaka ena haiara ꞌabana.
6 Wapu weiakia aokiai maearima hanona ꞌari katetabuna iamo aꞌi katetabu ahina,
katenuatae kiꞌa baha pateꞌari iamo ꞌari hanona ia herekiai kebeau pare.
7 Pekau weiakia ihaihakia hanona matoha huari hotikia ꞌabakia tebaꞌorunakia huari kateao,
arakiai hanona taba ha tebauꞌuna matoha obia ibauꞌuna gold ai tebabaina ꞌabana,
wairakia hanona matoha maearima wairakia ꞌabana.
8 Buikia hanona matoha babiꞌe buikia homaꞌakia ꞌabana,
nihekia hanona matoha mahi atana laiona nihekia ꞌabana.
9 Haharakiai hanona auri panabanai teꞌaeanakia,
ia banikia ꞌurukia hanona matoha hoti boꞌona ꞌakina mai koriꞌau tabakia atakia kariota hotiai teberinakia tebeau huari tiao ꞌurukia ꞌabana.
10 Aꞌarekia hanona mai ꞌinikia matoha hara aꞌarekia ꞌabakia,
mai aꞌarekia aokiai hanona mai ekia hiabu maearima nawa ima kateba haiaranakia.
11 Ia hanona mai ekia obia ꞌarana ha,
ꞌuri ꞌourana weiana aneruna,
ia atana Heberu maeakiai hanona Abadon,
ꞌa Helene maeakiai atana Apoluona,
anina hanona Bapururu hauna.
12 Atetua kiꞌa obona koriꞌuaina aba eore,
murinai haeamona atetua kiꞌa obokia rua nahaꞌimanakia katemai.
Aneru Ibaꞌabaihauna Ena Pihi Eubaina.
13 Aneru ibaꞌabaihauna ehore ena pihi eubaina,
ba aia ha aona ꞌuruna hanona Tirama wairanai itara robena gold ai tebabaina haunai ꞌea bani herekiai weia ekarahi.
14 Aia weiana ehore aneru ibaꞌabaihauna pihi eaꞌina hauna ehina bena etibaha,
“Aneru bani weiakia Efarate ate apaꞌuana haianai aba tebirinakia haukia korubu taꞌinakia.”
15 Ba aneru weiakia bani terubunakia,
anerukia weiakia hanona aba tebaꞌoru tibaiꞌima ihau weiana aonai nawa weiana aonai wapu weiana aonai beraura hoana weianai katekarahi hanopaka maearimakia iwate paipana aihau aonai paipa ha kateahu ꞌarinakia.
16 Aneru bani weiakia ekia huari haukia mai hotikia tetuabinakia aiakia aona hanona ikoinai kerepu hinabu rua ꞌabana.
17 Weiana eꞌu mahabanai ai,
hotikia mai huari haukia weiakia hotikia ahakiai temiaꞌau haukia aihanakia,
haharakia iꞌaeakia hanona tebiro,
matoha iruba,
tepurutoni,
mai teaꞌaeabu,
ꞌa hoti arakia hanona matoha mahi atana laiona arakia ꞌabana,
abomo pinakiai iruba,
hiabu,
mai pihara atakia salpa mai irubakia tekarahi.
18 Taba kiꞌa obokia aihau weiakia hoti pinakiai tikarahi haukia tehore hanopaka maearimakia iwate paipana aihau aonai paipa ha teahu ꞌarinakia,
taba weiakia hanona iruba,
hiabu,
mai pihara atakia salpa.
19 Pokina hoti ekia hiabu hanona pinakia ai mai aꞌarekia ai ṯemiaho,
aꞌarekia hanona matoha ꞌerau ꞌabana mai arakia ba weianai maearima teaꞌi kiꞌanakia.
20 Maearima harina taba kiꞌa obokia aihau neiakiai aꞌi teꞌari haukia hanona aꞌi teraona kabe baha,
imakiai tebabainakia tabakia aꞌi temurinakia,
auba kiꞌa obokia ikutiaikia aꞌi teba puanakia,
kaibaꞌuku weiakia gold,
silba,
kopa,
pihara,
mai matiu ai tebabainakia haukia,
weiakia aꞌi ṯeihaiha,
aia aꞌi tioꞌo,
aꞌi tikaꞌa tabakia ikutiaikia aꞌi tehabona.
21 Ekia ahuahu hoakiai,
ekia nepu hoakiai,
ekia nabau hoahoakia kiꞌa obokiai,
mai ekia bainao hoahoakiai aꞌi teraona kabe ꞌapua.