Puka Ikaiabu Hoana Ibaꞌabaihau Hamomona Eaꞌi Obona. Aneru Ha Mai Gold Urona.
8
Ba Mamoe nahu Puka ikaiabu hoana ibaꞌabaihau hamomona eaꞌi obona raninai,
kupai ꞌuru ha aꞌi ebua ꞌapua eaomo beraura hoana abirana ha ꞌabana.
2 Weiana Tirama wairanai tikoroti anerukia ꞌabaihau hamomo aihanakia,
ba pihi ꞌabaihau hamomo aneru weiakia tebenakia.
3 Aneru haeai ha emai itara robena herenai ekoroti.
Imanai hanona gold urona ha eaꞌina aonai muramura timina ꞌorimona ṯekinena hauna.
Ba muramura timina ꞌorimona boꞌona tebena mai Tirama ena robe haukia ikoikiai ekia bahubaꞌari kipokia keba haeamonakia gold itarana robena weiana obia imiaꞌauna wairanai hauna ahanai keberuberu ainakia.
4 Weiana aneru imanai muramura timina ꞌorimona niꞌara hiabuna mai robe haukia ekia bahubaꞌari kipokia tekaraꞌau Tirama wairanai.
5 Ba aneru ehore uro weiana eaꞌina,
aonai itara robena irubanai ebabonuna,
ba hanopakai ekapoꞌauna hanona kupa eroꞌu mai eꞌimare,
ꞌuru rarikia tebua,
mai hano ekaukau.
Aneru Bani Ekia Pihi Teubaina.
6 Ba aneru ꞌabaihau hamomo weiakia tebaꞌoru ekia pihi kate ubainakia.
7 Aneru koriꞌuaina ehore ena pihi eubaina,
weiana abara pihara ꞌabakia mai iruba aruaru kipokia teba hamomo teꞌeho hanopaka ahanai abara netibo ꞌabana.
Rani weianai hanopaka iwate paipa aihau aonai paipa ha eꞌara obo mai matiu ikoinai iwate paipa aihau aonai paipa ha eꞌara ore,
haeamona tubu ikoinai teꞌara ore.
8 Aneru ibaruana ehore ena pihi eubaina,
weiana taba ha ihana matoha oeo apaꞌuana ha ꞌabana mai irubana ꞌakuai tekapo uhuna.
Weiana ꞌakupaka iwate paipana aihau aonai paipa ha hanona aruaruai eao,
9 ba ꞌaku aonai mauri tabakia iwate paipana aihau aonai paipa ha hanona teꞌari,
mai aunohi ikoikiai iwate paipa aihau aonai paipa ha hanona tepururu.
10 Aneru ibaihauna ehore ena pihi eubaina,
weiana bihiu apaꞌuana ha niꞌara matoha toti ꞌabana kupai eꞌeho,
ba ate ikoikiai iwate paipa aihau aonai paipa ha mai bei ekia buti ꞌekakia ahakiai eꞌeho.
11 Bihiu weiana atana hanona ‘Mabi’.
Ba bei ikoikiai iwate paipa aihau aonai paipa ha hanona temabi kiꞌa.
Ba maearima boꞌona bei weiana teinu hanona teꞌari,
pokina bei aba emabi.
12 Aneru ibabanina ehore ena pihi eubaina,
weiana beraura iwate paipana aihau aonai paipa ha,
mai nawa iwate paipana aihau aonai paipa ha,
haeamona bihiu ikoikiai iwate paipa aihau aonai paipa ha tepoanakia,
weiana ea iwate paipana aihau aonai paipa ha hanona ewapura,
ba mararani iwate paipana aihau aonai paipa ha,
mai rabi iwate paipana aihau aonai paipa ha hanona aꞌi ea.
13 Ba poꞌi ha aihana kupa baiatanai erobo,
aiana aona eio aota etibaha,
“Kekiꞌa,
kekiꞌa.
Hanopaka ahanai ṯemiaho haukia ikoikiai herekiai hanona kekiꞌa kiꞌa bahana,
pokina aneru haeai aihau ekia pihi aba kateubainakia.”