Tirama Ena Taꞌaraꞌi Haukia 144,000 Paukia Ahakiai Maniꞌa Teaꞌina.
7
Weiana murinai aneru bani aihanakia,
hanopaka ꞌuni puakia bani tekori abunakia,
hanopaka ena baura bani tehe abunakia,
baura ha aꞌi keabu hano ai ꞌao ꞌaku ꞌao matiu aꞌi keabunakia.
2 Ba aneru haeai ha aihana,
taetana tainai ekaraꞌau mai mauri Tiramana ena taba ha eaꞌina weianai tabakia kebamaniꞌanakia Tirama ꞌeuna.
Weiana eio aota aneru bani weiakia Tirama ehore hiabu ebenakia hanopaka mai akupaka kateaꞌi kiꞌanakia haukia ehina benakia etibaha,
3 “Wai hanopaka mai ꞌakupaka abomo matiu aꞌi katoaꞌi kiꞌanakia keaomo eka Tirama ena taꞌaraꞌi haukia paukia ahakiai maniꞌa ha katahore ꞌauna.”
4 Weiana tebamaniꞌana haukiai ekia boꞌo tetuabina aiakia aona hanona taha ikoinai hinabu hamomo bariabui bani (144,000),
ia hanona Isaraela itubukia harauhaea rua herekiai tekarahi.
5 Paukia ahakiai tebamaniꞌanakia haukia,
Iuda itubunai hanona taha harauhaea rua (12,000).
Ruben itubunai hanona taha harauhaea rua (12,000).
Gad itubunai hanona taha harauhaea rua (12,000).
6 Asere itubunai hanona taha harauhaea rua (12,000).
Napatali itubunai hanona taha harauhaea rua (12,000).
Manase itubunai hanona taha harauhaea rua (12,000).
7 Simeona itubunai hanona taha harauhaea rua (12,000).
Lebi itubunai hanona taha harauhaea rua (12,000).
Isakara itubunai hanona taha harauhaea rua (12,000).
8 Sebuluna itubunai hanona taha harauhaea rua (12,000).
Iosepa itubunai hanona taha harauhaea rua (12,000).
Mai Beniamina itubunai hanona taha harauhaea rua (12,000).
Maearima Toꞌuna Rarina ꞌAkina Mai Ekia Habuni Porekia Tirama Tekuti aina.
9 Taba neiakia murikiai mahaꞌu eao maearima toꞌuna rarina ꞌakina aihana pahatuabinakia aꞌi petaina,
ia hanona hano haeai haeai,
itubu haeai haeai,
rama haeai haeai,
mai maea haeai haeai ikoikiai aokiai tekarahi,
ia ikoikiai hanona obia imiaꞌauna wairanai mai Mamoe nahu wairanai tekoroti,
ekia habuni hanona tehomaꞌa tepore obo,
abomo imakiai hanona matiu raukia matoha tona ꞌariꞌarina ꞌabakia teaꞌinakia.
10 Ba teio aota tetibaha,
“Bamauri hanona aika eka Tirama
obia imiaꞌaunai nemiaꞌau Hauna mai Mamoe nahu herekiai nimai.”
11 Weiana aneru ikoikiai weiakia obia imiaꞌauna,
kiro haukia,
mai mauri tabakia bani tekori kakaiaronakia haukia tehore obia imiaꞌauna wairanai tekaipehu wairakia hano teao Tirama tekuti aina,
12 tetibaha,
“Amen.
Banamo,
mai nuabi,
mai aobero,
mai namo ꞌabina,
mariki,
mai hiabu,
mai tabura
hanona eka Tirama ꞌeuna keaomo
banaibanai.
Amen.”
13 Weiana kiro hauna ha ebakainaꞌu etibaha,
“Habuni homaꞌakia pore obokia tebatotonakia haukia hanona tai?
Abomo aeꞌeai temai?”
14 Au ena ꞌabi abamuena atibaha,
“Hau apaꞌuana e,
oi oꞌiobina.”
Haeamona ehina benaꞌu etibaha,
“Neiakia hanona hau haiara apaꞌuakia aokiai tekabanai harai temai haukia,
ekia habuni hanona Mamoe nahu aruarunai teutunakia ba tebaporenakia.
15 Ua buonai,
Ia hanona Tirama ena obia imiaꞌauna wairanai tikoroti,
abomo ena marea robe aonai ia ena aka tibabaina rabi mai mararani.
Ba obia imiaꞌauna ahanai nemiaꞌau Tiramana kehore ekia iꞌauai keao keꞌaeanakia mai keꞌabanakia.
16 Ia hanona mareꞌa aꞌi kateꞌari mue,
ꞌakokia aꞌi kateꞌororo mue.
Beraura ꞌao hiabu haeai ha ia haukia aꞌi kebapetanakia.
17 Pokina Mamoe nahu obia imiaꞌauna ibuana tohanai nemiaho hauna kehore keꞌimanakia mamoe iꞌimana hauna ꞌabana,
ia kehore keꞌuai ainakia mauri beina ꞌuriai nebuti hauna herenai,
ba Tirama kehore mahakia beikia ikoikiai mahakiai keutu ꞌororonakia.”