Mamoe Nahu Puka Ikaiabu Hoakia ꞌAbaihau Eaꞌi Obonakia.
6
Epua Mamoe nahu aihana,
puka iouna ahanai ikaiabu hoakia ꞌabaihau hamona hauna eaꞌina,
ia ehore ikaiabu hoana koriꞌuaina eaꞌi obona.
Ba mauri tabakia bani ꞌabakia ha aiana aona,
matoha kupa niroꞌu ꞌabana,
eꞌabi etibaha,
“Omai.”
2 Mahaꞌu eao hanona wairaꞌuai hoti porena ha aihana,
ba ahanai emiaꞌau hauna hanona hunu ha imanai eaꞌina,
obia ibauꞌuna ha tebena,
ba hotiai ebeau ahi,
ihaihana matoha arawai hauna,
ia ehore ꞌou haukia eba ꞌehonakia,
haeamona mai hiabuna niao boꞌona kebaꞌehonakia.
3 Mamoe nahu ikaiabu hoana ibaruana eaꞌi obona raninai mauri tabana ibaruana aiana aona,
eꞌabi etibaha,
“Omai.”
4 Ba hoti ha ekarahi hauna hanona ebiro.
Ahanai emiaꞌau hauna hanona hiabu tebena baibua hanopakai keaꞌi parena,
weiana maearima kipokia ꞌabakia kateahuahu ꞌarinakia.
Ia hanona kareba apaꞌuana ha tebena.
5 Ba Mamoe nahu ikaiabu hoana ibaihauna eaꞌi obona raninai,
mauri tabana ibaihauna aiana aona,
eꞌabi etibaha,
“Omai.”
Ba mahaꞌu eao hanona hoti ꞌumu obona ha aihana,
ahanai emiaꞌau hauna hanona puma ihobokia tabana ha imanai eaꞌina.
6 Ba matoha aia ha ꞌabana mauri tabakia bani baiatakiai aona,
eꞌabi etibaha,
“Moao emu aka mobabaina,
arobo rarina kerama.
Weiana maearima wapu hamona niaka monina niaꞌina hanona witi kaputi hamona kekawana,
mai maearima wapu hamona niaka monina niaꞌina hanona aniani atana bali kaputi aihau kekawanakia,
iamo olibe matiukia mai bine haharukia aꞌi koaꞌi kiꞌanakia.”
7 Ba Mamoe nahu ikaiabu hoana ibabanina eaꞌi obona raninai,
mauri tabana ibabanina aiana aona,
eꞌabi etibaha,
“Omai.”
8 Mahaꞌu eao hanona hoti hauna aꞌaeabuna ha aihana,
ahanai emiaꞌau hauna atana hanona ꞌAri,
mai ꞌari haukia ekia ꞌeka hanona ia murinai niꞌau.
Hiabu hanona terarua tebenakia,
ba hanopaka maearimakia iwate paipa bani aonai paipa ha hanona kateahu ꞌarinakia,
maearima weiakia hanona huari aonai karebai kateꞌari,
arobo aonai mareꞌa ai kateꞌari,
inawai kateꞌari,
mai hanopaka ena ahuahu mahikiai kateꞌari.
9 Mamoe nahu ikaiabu hoana ibaimana eaꞌi obona raninai,
mahaꞌu eao itara robena baꞌanai Tirama ena ꞌabi buonai mai ena ꞌabi ihina pouna paunai teahu ꞌarinakia haukia aubakia aihanakia.
10 Ia hanona teio aota tetibaha,
“Taba ikoikiai Obiapakana e,
oi hanona orobe mai toha tohana,
rani tabanai hanopaka haukia kobakainakia,
puma kobahoainakia emai ꞌari aruarumai paunai?”
11 Weiana habuni homaꞌakia pore obokia ha ha tebenakia,
ba ehina benakia katebaiꞌima rani papana kehomaꞌa ꞌapua keaomo ꞌabakia taꞌaraꞌi haukia mai uahoꞌabakia Keriso ena aka tibabaina haukia iahuꞌarikiai ia teahu ꞌarinakia ihobona,
weiana ituabikia ranina ketaina.
12 Ba Mamoe nahu aihana ikaiabu hoana ibaꞌabaihauna eaꞌi obona raninai,
kanokau rarina ekaꞌa hano eibiu kiꞌa,
beraura ewapura habuni ꞌumuna ꞌabana,
haeamona nawa hanona ebiro aruaru ꞌabanai eao,
13 mai bihiu kupai teꞌeho hanopaka ahanai matoha baura rarina eabuꞌau ꞌororo buabuana aꞌi teꞌaiba haukia ebaꞌehonakia ꞌabana.
14 Kupa abonamo eꞌakauma matoha ꞌire teouna ꞌabana,
haeamona oeo mai kereibua ikoikiai ꞌekakiai teibiu.
15 Ba hanopaka ena obia ꞌarana haukia,
obia haukia,
huari poki haukia,
kepu haukia,
hiabu haukia,
taꞌaraꞌi haukia,
haeamona taꞌara aꞌi tiaꞌi haukia ikoikiai hanona oeo urikia aokiai mai oeo piharakia baiatakiai tepihi.
16 Ia tehore oeo mai pihara apaꞌuakia teaparinakia tetibaha,
“Tomoꞌeho tomobahu abunamai,
obia imiaꞌauna ahanai nemiaꞌau Hauna wairanai mai Mamoe nahu ena opuere herekiai tomoba buninamai.
17 Pokina ekia opuere wapuna apaꞌuana aba ekaraꞌau.
Tai he kekoroti?”