Ioane Puka Iouna Ha Eihana Mai Ikaiabu Hoana.
5
Epua obia imiaꞌaunai emiaꞌau hauna aihana imana itipanai hanona puka iouna ha eaꞌina,
aonai mai kapenai marere tererenakia,
puka kapena hanona ikaiabu hoakia ba weiakia hanona ꞌabaihau hamomo puka kapenai.
2 Ba aneru taburana ha aihana eio aota etibaha,
“Tai mai ena bero hauna kehore puka ahanai ikaiabu hoahoakia neiakia keba paꞌanakia ba kekaikauna?”
3 Iamo hau ha kupai ꞌao hanopakai mai hanopaka baꞌanai ha aꞌi etaina puka iouna weiana kekaikauna abomo aona keihana.
4 Weiana au ahai,
ahai ꞌari kiꞌa baha pokina hau ha aꞌi ebero harai puka iouna weiana kekaikauna abomo aona keihana.
5 Ia kiro hauna ha ehina benaꞌu etibaha,
“Aꞌi kohai,
Iuda itubuna ena Laiona weiana Davida ena rama ramuna hauna ꞌou haukia eahu parenakia hauna,
ia kehore puka iouna ahanai ikaiabu hoakia ꞌabaihau hamomo keba paꞌanakia puka kekaikauna.”
Ioane Mamoe Nahu Eihana.
6 Weiana obia imiaꞌauna ꞌekana ibuanai Mamoe nahu ha ekoroti aihana ihana matoha ꞌuainai teahu ꞌarina ꞌabana,
mauri tabakia bani mai kiro haukia weia tekori kakaiarona,
ia ꞌeana hanona ꞌabaihau hamomo mahana abomo ꞌabaihau hamomo,
mahana weiakia hanona Tirama ena auba ꞌabaihau hamomo euhunakia teao hanopaka ikoinai haukia.
7 Mamoe nahu hanona eao obia imiaꞌaunai emiaꞌau hauna imana itipanai puka iouna weiana eaꞌina.
8 Puka weiana eaꞌina raninai mauri tabakia bani mai kiro haukia harau rua bani hanona Mamoe nahu wairanai tekaipehu.
Ia ha ha mai ekia kita atana hap abomo mai ekia gold puou puoukia aokiai muramura timikia ꞌorimokiai tebabonunakia,
tebaꞌaranakia timikia tehao,
weiakia hanona Tirama ena robe maearimakia ekia bahubaꞌari ai.
9 Weiana hui mahamahana ha teaꞌi taeana tehuiaina tetibaha,
“Oi hanona mai emu bero
puka iouna koaꞌina
abomo ikaiabuna hoahoakia
kobapaꞌanakia.
Pokina oi teahu ꞌariniꞌo,
ba emu ꞌari aruarunai maearima
okawanakia Tirama ꞌeuna,
itubu ikoikiai,
maea ikoikiai,
maearima ikoikiai,
mai hano ikoikiai herekia.
10 Oi ohore obia ꞌarakia haukiai
mai robe akana tibabaina
haukiai obaonakia
eka Tirama taꞌarana kateaꞌi,
mai hanopaka katepoki aina.”
Ikoikiai Tirama Mai Mamoe Nahu Tekuti ainakia.
11 Ba mahaꞌu eao aneru boꞌona ꞌakina aihanakia mai aiakia aona,
ia tehore obia imiaꞌauna mai mauri tabakia bani mai kiro haukia tekori kakaiaronakia,
teboꞌo kiꞌa baha taha taha.
12 Ṯehui aota ṯetibaha,
“Mamoe nahu ꞌuainai
teahu ꞌarina hauna,
bariu mai ena bero,
hiabu,
kepu,
aobero,
mai tabura keaꞌinakia
abomo mariki,
nuabi,
mai banamo keaꞌinakia.”
13 Ba mauri tabakia ikoikiai weiakia kupai,
hanopakai,
hanopaka baꞌana abomo ꞌakupakai mai aokiai ṯemiaho haukia ikoikiai aiakia aona ṯehui ṯetibaha,
“Obia imiaꞌauna ahanai emiaꞌau Tiramana abomo Mamoe nahu herekiai banamo,
mariki,
nuabi,
mai hiabu katemiaho,
bariu keaomo banaibanai.”
14 Weiana mauri tabakia bani teꞌabi tetibaha,
“Amen.”
Ba kiro haukia tekaipehu ia tekuti aina.