Tirama Ṯekuti aina Kupai.
4
Taba neiakia murikiai,
mahaꞌu eao kupai paꞌabi ha ikaikau wairaꞌuai ekoroti aihana.
Ba aia weiana ehinabe ꞌuainaꞌu ꞌuruna matoha pihi ꞌuruna ꞌabana hauna eꞌabi etibaha,
“Mokaraꞌau omai neia,
taba neiakia murikiai katerama haukia kabaihaniꞌo.”
2 Au hanona beronai mo Auba Robe aoꞌu ebabonu ꞌauna,
ba wairaꞌuai hanona obia imiaꞌauna ha kupai aihana mai hau ha imiaꞌau weiana ahanai emiaꞌau.
3 Emiaꞌau hauna ihaihana hanona ea kiꞌa baha matoha pihara namoabukia atakia daiamond hauna eiroro mai rubi hauna ebiro haukia ꞌabana,
ꞌopa ehore obia imiaꞌauna weiana ekakaiarona,
ihaihana hanona ea kiꞌa matoha pihara namoabuna atana emerald hauna ekupa ꞌabana.
4 Obia imiaꞌaukia ikoinai haraurua bani obia imiaꞌauna apaꞌuana tekai kakaiarona abomo kiro haukia haraurua bani obia imiaꞌaukia weiakia ahakiai temiaꞌau,
habuni pore obokia tebatoto mai ꞌarakiai hanona obia ibauꞌukia gold ai ibabai haukia tebauꞌunakia.
5 Obia imiaꞌauna weianai hanona kupa ꞌimarekia,
ꞌuru rarikia mai kupa niroꞌu ꞌurukia aoꞌo.
Obia imiaꞌauna wairanai ramepa ꞌabaihau hamomo teara mai upa upakia.
Neiakia hanona Tirama ena auba teꞌabaihau hamomo.
6 Abomo obia imiaꞌauna wairanai hanona ꞌaku nemiaho,
eiroro waira ꞌakinai matoha pihara namoabuna atana kristal ꞌabana.
Ibuanai hanona mauri tabakia ikoinai bani obia imiaꞌauna tekori kakaiarona,
ia wairakiai mai murikiai hanona maha ꞌabaeana teka kaiaronakia.
7 Mauri tabana koriꞌuaina hanona ihana matoha mahi atana laiona ꞌabana,
ibaruana hanona ihana matoha poromakau nahu ꞌabana,
ibaihauna wairana hanona ihana matoha maearima wairakia ꞌabana,
ibabanina hanona ihana matoha poꞌi nirobo ꞌabana.
8 Ia mauri tabakia bani weiakia hanona ha ha banikia ꞌabaihau,
ba banikia weiakia aokiai mai kapekiai hanona mahakia mo ꞌabaeana.
Ia hanona mararani mai rabi aꞌi tiarai ia tiꞌabi toꞌona ṯetibaha,
“Erobe,
erobe,
erobe.
Obiapaka hiabu ikoinai Tiramana hanona erobe.
Ia hanona ꞌuainai emiaho,
bariu nemiaho,
haeamona wairai kemai hauna.”
9 Mauri tabakia neiakia tihore mauri banaibanai Tiramana obia imiaꞌauna ahanai emiaꞌau hauna herenai nuabi mariki mai namo ꞌabina tibena aonai,
10 kiro haukia haraurua bani tihore obia imiaꞌauna ahanai emiaꞌau hauna wairanai tikaipehu mauri banaibanai Tiramana ṯekuti aina.
Ekia obia ibauꞌukia ꞌarakiai tibauꞌunakia haukia tiaꞌi obonakia obia imiaꞌauna wairanai tibaenotina,
ba tiꞌabi ṯetibaha,
11 “Emai Obiapaka emai Tirama e,
oi hanona mai emu bero
nuabi mai mariki mai hiabu
koaꞌinakia.
Pokina oi ohore taba ikoikiai
obaramanakia.
Emu nuatae paunai taba ikoikiai
terama ba ṯemiaho.”