Marere Keao Sadi ai.
3
Ia eꞌabi etibaha,
“Tirama ena marea Sadi aiaranai hauna ena aneru ṉa korere beni aihona.
Auba ꞌabaihau hamomo weiakia Tirama ena aka tibabaina haukia mai bihiu ꞌabaihau hamomo eaꞌinakia hauna ena ꞌabi neiana.
Au emu babai hanona aꞌiobinakia,
robamu teahuna tetibaha,
‘Tirama ena marea neiana hanona nimauri,’
iamo oi hanona aba oꞌari.
2 Ua buonai monoꞌa,
heremuai ṯemiaho tabakia aba kateꞌari baihana haukia mobataburanakia,
pokina emu babai beroꞌauna ha eꞌu Tirama wairanai aꞌi atabu ahina.
3 Taba oaꞌina mai ona hauna moraona ꞌinina,
mokaꞌai haraina,
abomo emu kiꞌai moraona kabe.
Iamo aꞌi konoꞌa raninai au hanona bainao hauna ꞌabana kawahi,
eꞌu wahi beraurana hoana hanona aꞌi oꞌiobina.
4 Iamo naia Sadi ai hanona Tirama ena maearima baika ekia habuni aꞌi tebaꞌopunakia weiakia hanona ekia hoahoa tenamo,
ia hanona mai ekia bero habuni porekia katebatotonakia au kipokia katakaꞌa haeamo.
5 Taeara ihobonai ena aꞌikakauma ketabura,
kiꞌa aokiai kekabanai hauna hanona habuni porena kebatotona,
ia atana abomo mauri pukanai aꞌi kakakina,
ꞌa Hamaꞌu wairanai mai ena aneru wairakiai ia atana kahinana.
6 Mai haiana hauna kehore Auba Robe ena ꞌabi Tirama ena marea maearimakia nehina benakia hauna aiana keona.”
Marere Keao Piladelpia ai.
7 Ia eꞌabi mue etibaha,
“Tirama ena marea Piladelpia aiaranai hauna ena aneru ṉa korere beni aihona.
Erobe mai ꞌabi tohana hauna,
mai Davida ena ki eaꞌina hauna,
ia taba ekaikauna hanona hau ha aꞌi kekaiabuna,
haeamona ia taba ekaiabuna hanona hau ha aꞌi kekaikauna hauna ena ꞌabi hanona neiana.
8 Au hanona oi emu babai aꞌiobina.
Moihana,
au paꞌabi ha oi wairamu ai aba akaikauna,
weiana hau ha kekaiabuna hanona aꞌi ketaina.
Aꞌiobina emu tabura hanona aꞌi eapaꞌua,
iamo eꞌu ꞌabi aba oꞌima haraina mai ataꞌu aꞌi obuniaina.
9 Moihana,
weiakia kipokia Iuda haukiai tibaonakia haukia hanona tibaiꞌoi,
ia hanona Iuda haukia tohakia ahaꞌi,
ia Satani ena marea haukia.
Au kahore maearima weiakia kamaiainakia oi aemu pokinai katekaipehu,
kateꞌiobina au hanona oi naraonaꞌau ainiꞌo.
10 Pokina oi ohore eꞌu bahiahi ꞌabina weiana atetua aokiai kobapahihi hauna aba oꞌima haraina,
ua buonai au kahore oi abomo kaꞌima harainiꞌo hanopaka ena atetua ranina kemai aonai,
weiana hanona maearima ikoinai kahobonakia hanopaka neiana ahanai.
11 Au hanona aba kawahi,
emu aꞌikakauma aonai kotabura harai,
weiana hau ha aꞌi mehore emu ꞌuai hoana ꞌaramu ai obauꞌuna hauna aꞌi mepuhu boiniꞌo.
12 Ena aꞌikakauma ketabura,
kiꞌa aokiai kekabanai hauna hanona eꞌu Tirama ena marea robe kupuanai kabaona,
ba ia hanona ꞌeka weiana aꞌi kehabona.
Au kahore ia ahanai eꞌu Tirama atana,
mai eꞌu Tirama ena aiara,
weiana Ierusalema mahamahana,
eꞌu Tirama herenai weia kupa ai keriri hauna atana karerenakia,
mai au ataꞌu mahamahana abomo ia ahanai karerena.
13 Mai haiana hauna kehore Auba Robe ena ꞌabi Tirama ena marea maearimakia nehina benakia hauna aiana keona.”
Marere Keao Laodikea ai.
14 Ia eꞌabi mue etibaha,
“Tirama ena marea Laodikea aiaranai hauna ena aneru ṉa korere beni aihona.
Amen pokina hauna,
aia ibabuaꞌauna hauna,
mahanai eihana ehina pouna hauna tohana,
mai Tirama ebabainakia tabakia ikoinai pokina hauna ena ꞌabi hanona neiana.
15 Au hanona oi emu babai aꞌiobina,
oi hanona aꞌi oꞌamari mai aꞌi ohiabu.
Au eꞌu nuatae hanona kohiabu toha ꞌao koꞌamari toha.
16 Iamo oi hanona ohiabu hiabu,
aꞌi ohiabu toha mai aꞌi oꞌamari toha.
Ua buonai au kahore pinaꞌu ai kaꞌatoti ahiniꞌo.
17 Oi nuꞌabi notibaha,
‘Au hanona kepu hauꞌu,
eꞌu taba teboꞌo,
taba ha aꞌi akapu.’
Iamo aꞌi oꞌiobina oi hanona okiꞌa kiꞌa baha,
kateaokoꞌoai kiꞌaniꞌo,
nouraru,
mahamu tekiꞌa,
abomo maihaumu.
18 Au oi narobeniꞌo,
hereꞌuai gold kokawana aba irubai tebamaha mahana hauna,
ba kepu haumu tohamuai koao.
Hereꞌuai habuni porena abomo kokawana kobatotona,
weiana mai haumu emu haumaea kepua,
mai hereꞌuai maha muramurana kokawana,
weianai mahamu koutunakia ba taba koihanakia ketaina.
19 Au naraonaꞌau ainakia haukia hanona narikenakia mai naꞌatinakia,
ua buonai bero akakia konuataeai kiꞌa bahanakia,
mai kiꞌai koraona kabe.
20 Moihana,
au hanona paꞌabi ꞌakonai akoroti,
naharahara.
Hau ha aiaꞌu keona abomo paꞌabi kekaikauna raninai,
ia ꞌeunai kakatoto herenai kataniani mai ia au hereꞌuai kataniani.
21 Ena aꞌikakauma ketabura,
kiꞌa aokiai kekabanai hauna hanona bero kabena eꞌu obia imiaꞌauna ahanai katamiati haeamo,
ihobona au atabura,
kiꞌa aokiai akabanai,
ba Hamaꞌu ohi ena obia imiaꞌauna ahanai tamiati haeamo ꞌabana.
22 Mai haiana hauna kehore Auba Robe ena ꞌabi Tirama ena marea maearimakia nehina benakia hauna aiana keona.”