Marere Keao Epeso ai.
2
Ia eꞌabi etibaha,
“Tirama ena marea Epeso aiaranai hauna ena aneru ṉa korere beni aihona.
Hau weiana bihiu ꞌabaihau hamomo imana itipana aonai eaꞌinakia haeamona gold ramepakia ꞌabaihau hamomo tekoroti baiatakiai nikabanai kabanai hauna ena ꞌabi neiana.
2 Au oi emu babai,
emu aroꞌari mai emu bapahihi hanona aꞌiobinakia.
Haeamona aꞌiobina aka kiꞌa haukia aꞌi oiha haonakia,
weiakia kipokia iuhubeau haukia ai tebaonakia haukia ꞌa ia hanona iuhubeau haukia tohakia ahaꞌi,
ba obahobonakia hanona oꞌiobinakia baiꞌoi haukia.
3 Oi hanona obapahihi,
mai atetua aokiai au ataꞌu paunai obakiro,
aꞌi ohaba ꞌapua.
4 Iamo emu kiꞌa hanona neiana,
emu raonaꞌau koriꞌuaina au hereꞌuai hauna aba ohabona.
5 Ua buonai ꞌeka weianai oꞌeho hauna moraonana,
koraona kabe,
aka weiakia obabai ꞌuainakia haukia kobabai muenakia.
Emu kiꞌai aꞌi koraona kabe raninai,
au hanona kawahi emu ramepa ena koroti ꞌekanai kaꞌi obona.
6 ꞌA emu namo hamona hanona neiana.
Nikolaita haukia ekia hoahoa ꞌarikia aꞌi nuꞌari,
ihobona au abomo ekia hoahoa ꞌarikia aꞌi naꞌari ꞌabana.
7 Mai haiana hauna kehore Auba Robe ena ꞌabi Tirama ena marea maearimakia nehina benakia hauna aiana keona.
Ena aꞌikakauma ketabura,
kiꞌa aokiai kekabanai hauna hanona bero kabena mauri nibaibeni matiuna buabuana keani,
matiu weiana hanona Tirama ena uma nuabina aonai niꞌomu.”
Marere Keao Semurana ai.
8 Ia eꞌabi mue etibaha,
“Tirama ena marea Semurana aiaranai hauna ena aneru ṉa korere beni aihona.
Hau weiana Koriꞌuaina mai Murihaina hauna,
eꞌari haeamona emauri mue hauna ena ꞌabi neiana.
9 Emu hau haiara mai emu uraru hanona aba aꞌiobinakia.
Iamo oi hanona aba kepu haumu.
Maearima weiakia kipokia Iuda haukiai tibaonakia haukia ekia ꞌabi kiꞌa oi heremuai hanona aꞌiobina,
ia hanona Iuda haukia tohakia ahaꞌi,
ia Satani ena marea haukia.
10 Aba kohau haiara iamo haiara weiana aꞌi kotaꞌu aina.
Haiamuai ṉaꞌabi,
Tiaporo kehore wai baika kehobonimi weiana wapura itunai kekaiabunimi ba wapu harauhaea katohau haiara.
Iamo oi hanona emu aꞌikakauma au hereꞌuai hauna koaꞌi ꞌinina keaomo koꞌari reꞌa,
ba au kahore mauri kabeniꞌo matoha ꞌuai hoana kobauꞌuna ꞌabana.
11 Mai haiana hauna kehore Auba Robe ena ꞌabi Tirama ena marea maearimakia nehina benakia hauna aiana keona.
Ena aꞌikakauma ketabura,
kiꞌa aokiai kekabanai hauna hanona ꞌari ibaruanai aꞌi kehaiara ꞌapua.”
Marere Keao Peregamo ai.
12 Ia eꞌabi mue etibaha,
“Tirama ena marea Peregamo aiaranai hauna ena aneru ṉa korere beni aihona.
Hau weiana kareba mahana abira abira teara eaꞌina hauna ena ꞌabi neiana.
13 Emu miaho ꞌekana hanona aꞌiobina,
Satani ena obia imiaꞌauna hanona naia.
Iamo oi ohore au ataꞌu oaꞌi ꞌinina,
baiatamiai Antipa aia ibabua ꞌau hauna au pouꞌu ehinana hauna,
ba Satani ena miaho ꞌekana weianai teahu ꞌarina aonai abomo emu aꞌikakauma au hereꞌuai hauna aꞌi obuniai aina.
14 Iamo emu kiꞌa baika hanona neiakia.
Maearima baika naia hanona mahabanai hauna Balam ena baꞌiobi ꞌabikia tikaꞌai ohonakia,
hau weiana ehore Balak ebaꞌiobina,
ba ena baꞌiobi baiꞌoina weianai Isaraela haukia tebabai kiꞌa,
weiana ia tehore kaibaꞌuku ibarobekia anianikia teani mai nabau hoahoakia kiꞌa obokia tebabainakia.
15 Taeara ihobonai mo baika naia heremiai hanona Nikolaita haukia ekia baꞌiobi ꞌabikia baiꞌoikia abomo tikaꞌai ohonakia mai kiꞌa ihobokiamo tibabainakia.
16 Ua buonai tomoraona kabe.
Keahaꞌi raninai,
au kipoꞌu kawahi biai,
pinaꞌu karebanai kahu ꞌarinakia.
17 Mai haiana hauna kehore Auba Robe ena ꞌabi Tirama ena marea maearimakia nehina benakia hauna aiana keona.
Ena aꞌikakauma ketabura,
kiꞌa aokiai kekabanai hauna hanona aniani atana mana baika tebuni haukia ia kabena,
abomo au kahore pihara porena ha ahanai ata mahamahana ha irereꞌau hauna ia kabena.
Pihara iaꞌina hauna mo kipona ata weiana keꞌiobina.”
Marere Keao Tuatira ai.
18 Ia eꞌabi mue etibaha,
“Tirama ena marea Tuatira aiaranai hauna ena aneru ṉa korere beni aihona.
Tirama Nahuna weiana mahana ihakia hanona matoha iruba neupa ꞌabana,
aena hanona matoha kopa neꞌimare ꞌimare ꞌabana hauna ena ꞌabi neiana.
19 Au hanona oi emu babai aꞌiobina.
Emu raonaꞌau,
emu aꞌikakauma,
emu baraibarai,
mai emu bapahihi hanona aꞌiobinakia.
Haeamona bariu emu babai neiakia hanona emu babai ꞌaiꞌaikia tetara haonakia.
20 Iamo emu kiꞌa hanona neiana,
oi hanona babiꞌe weiana atana Isabela kipona mahabanai babiꞌenai nibaona babiꞌena hanona noiha haona.
Ia ena baꞌiobiai eꞌu taꞌaraꞌi haukia nibakaꞌa kiꞌanakia niaoainakia maha porepore akakia kiꞌa obokia tibabai haeamona kaibaꞌuku ibarobekia anianikia tiani.
21 Au hanona ia ena rani aba ha abena ena maha porepore hoahoakia weiakiai keraona kabe.
Ia aꞌi nenuatae.
22 Ua buonai au kahore inawa itaranai kakapo ꞌauna weia kehaiara ꞌari kiꞌa baha,
haeamona weiakia ia kipokia tinabau haukia aꞌi kateraona kabe raninai,
ia abokiamo kabahaiara kiꞌa bahanakia.
23 Ia nahuna abokiamo kahuahu ꞌarinakia.
Weianai hanona Tirama ena marea haukia ikoikiai kateꞌiobina,
au hanona maearima aokia mai ekia raonaraona bunikia natabu ahinakia hauꞌu,
mai au kahore wai ha ha emu babaimo ihobokiai ꞌarami kabamuena.
24 ꞌA bariu wai harina maikoina Tuatirai babiꞌe naiana ena baꞌiobi ꞌabikia uahomakia aꞌi tukaꞌainakia mai Satani ena buni tabakia tohakia ṉa tiho haukia aꞌi toꞌiobi haumi,
nahina benimi ahamiai puma ha aꞌi kahore ꞌauna.
25 Iamo wai taba namona aba toaꞌina hauna katoaꞌi ꞌini haraina keaomo au kawahi.
26 Ena aꞌikakauma ketabura,
kiꞌa aokiai kekabanai hauna haeamona eꞌu nuatae akana kebabai haraina keaomo puanai hauna hanona hiabu kabena,
ia kehore hanopaka maearimakia keobia ainakia.
27 ‘Ia auri ikaiꞌininai kepoki ainakia,
keahu ꞌitiꞌitinakia matoha uro ꞌabana.’
Ihobona au Hamaꞌu herenai hiabu aꞌina ꞌabana.
28 Au kahore raurani bihiuna abomo ia kabena.
29 Mai haiana hauna kehore Auba Robe ena ꞌabi Tirama ena marea maearimakia nehina benakia hauna aiana keona.”