Keriso Ena ꞌAbi
IBAWAIRA TINANA
Ioane Herenai
Puka Pouna Ihinana ꞌAbina.
1
Au,
Ioane,
Iesu Keriso ebawaira tinana ꞌabina puka neianai narerena.
Tirama ehore Iesu ebena ena taꞌaraꞌi haukia herekiai rani aꞌi kehomaꞌa tabakia katerama haukia kebaihanakia.
Weiana Iesu ena aneru ha euhuna,
ena taꞌaraꞌi hauna Ioane ebaihana.
2 Weiana Ioane ehore Tirama ena ꞌabi mai Iesu Keriso ena ꞌabi aiakia eoꞌo mai eihanakia tabakia ikoikiai ehina pounakia.
3 Mahabanai ꞌabikia neiakia katetuabi haukia hanona tenamo,
abomo puka neianai terere ꞌabikia kateona mai aokia ikoinai katekaꞌaina haukia hanona tenamo,
pokina taba neiakia ikoikiai katerama ranina hanona aba herekai.
Ioane Marere Ererena Tirama Ena Marea ꞌAbaihau Hamomo Herekiai.
4 Au Ioane Tirama ena marea ꞌabaihau hamomo Asia hanonai narerebenimi.
Bariu nemiaho,
ꞌuainai abomo emiaho,
haeamona wairai kemai Tiramana,
mai ena obia imiaꞌauna wairanai auba ꞌabaihau hamomo tekoroti haukia,
5 mai Iesu Keriso kipokia ekia aokoꞌo hoana mai baibua ahamiai kemiaho.
Iesu Keriso hanona Tirama ena ꞌabi maikoina nehina pou haraina hauna,
ꞌariai mikiri mue koriꞌuaina hauna abomo hanopaka obiakia ꞌarakia ikoikiai ekia poki.
Eraonaꞌau ainaka paunai ena ꞌari aruarunai eka kiꞌa herekiai erubunaka.
6 Ena obia aiarana mai ena robe haukai ebaonaka Hamana Tirama ena aka kahababai.
Iesu Keriso herenai nuabi mai hiabu katemiaho keaomo banaibanai.
Amen.
7 Tomoihana Iesu hanona
ꞌauhao ai nimai,
maearima ikoikiai
mahakia hanona ia kateihana,
robuna tekomona haukia
abomo kateihana,
hanopaka itubukia maearimana
ikoikiai ia paunai katehai ꞌari.
ꞌAbi tohana,
neiana hanona
kerama toha.
Amen.
8 Obiapaka Tirama niꞌabi netibaha,
“Au hanona Alepa mai Omega,
Koriꞌuaina mai Murihaina.
Au hanona bariu namiaho ꞌuaina abomo amiaho,
haeamona wairai kamai,
hiabu ikoinai Tiramana.”
Ioane Keriso Eihana.
9 Au,
Ioane,
wai uahoꞌabami kipokia nahamiaho haeamo,
ena obia aiarana aonai mai hau haiara hamona aonai mai bapahihika Iesu paunai.
Tirama ena ꞌabi mai Iesu pouna ahina waira tinana paunai Patamo kereibuanai tehorotinaꞌu namiaho.
10 Weiana Obiapaka ena beraurai Auba Robe hanona au aoꞌu ebabonu ꞌauna,
weiana muriꞌu ai aia ha apaꞌuana matoha pihi ꞌuruna ꞌabana aona,
11 ia etibaha,
“Neiakia noihanakia tabakia hanona puka ai morerenakia kouhuna keao Tirama ena marea ꞌabaihau hamomo aiara neiakiai ṯemiaho haukia herekia,
Epeso,
Semurana,
Peregamo,
Tuatira,
Sadi,
Piladelpia,
mai Laodikea.”
12 Weiana akori kabe eꞌabi benaꞌu hauna kaihana ṉa ahoma.
Iamo gold ramepakia ꞌabaihau hamomo tekoroti aihanakia.
13 Ramepa baiatakiai hau ha ekoroti,
ia ihana matoha Maearima nahuna ꞌabana,
ena habuni hanona ehomaꞌa eaomo aena etaro abunakia,
haharanai hanona gold ꞌapana eꞌaberena.
14 Arana mai buina hanona tepore obo harai matoha poame ꞌabana ꞌao ꞌauhao porena ꞌabana.
Mahana ihakia hanona matoha iruba neupa ꞌabana.
15 Aena hanona matoha kopa iruba aonai nibaubaea neꞌimare ꞌimare ꞌabana.
Aiana hanona matoha roio rarikia tihara puni ꞌurukia ꞌabana.
16 Imana itipanai bihiu ꞌabaihau hamomo eaꞌinakia,
kareba ha mahana abira abira teara hauna pinanai ekarahi.
Mai wairana ihana hanona matoha atiaha beraura nirara eana ꞌabana.
17 Ia aihana raninai aꞌeho aena pokinai aꞌumuti,
matoha aꞌari ꞌabana.
ꞌA ia ehore imana itipana hauꞌu ai ehaoꞌau,
eꞌabi etibaha,
“Aꞌi motaꞌu,
au hanona koriꞌuaina mai murihaina.
18 Au hanona mauri hauꞌu,
au aꞌari iamo amauri haeamona kamauri banaibanai.
Au hanona ki aꞌina weiana mai eꞌu hiabu ꞌari haukia ekia ꞌeka kakaikauna kamaiainakia katemauri.
19 Ua buonai noihanakia tabakia morerenakia,
neiakia hanona bariu ṯemiaho tabakia haeamona wairai katerama tabakia.
20 Bihiu ꞌabaihau hamomo imaꞌu itipanai mai gold ramepakia ꞌabaihau hamomo oihanakia.
Neiakia hanona ꞌabi bunikia ba anikia hanona nahomana,
bihiu ꞌabaihau hamomo hanona Tirama ena marea ꞌabaihau hamomo ekia aneru,a
mai gold ramepakia ꞌabaihau hamomo hanona Tirama ena marea ꞌabaihau hamomo.”