Mauri Beina Atena.
22
Epua,
aneru weiana ehore mauri beina atena eba ihanaꞌu,
eiroro wairai matoha karati ꞌabana.
Ba Tirama mai Mamoe nahu ekia obia imiaꞌaunai eharu riri emai,
2 ba aiara taearana apaꞌuana ibuanai eharu ririna.
Ate ꞌarana abira abira hanona matiu weiakia mauri tibaibeni haukia tekoroti,
ihau hamona aonai hanona rani ikoinai harau haea rua buabuakia tiba ramanakia,
nawa ha ha aokiai ṯebuaꞌa.
Ia raukia hanona hanopaka maearimakia ikoikiai ekia inawa ibanamokia tabakia.
3 Aiara weiana aonai hanona Tirama ena ururu baꞌanai ṯemiaho tabakia ha weia aꞌi kahatabu ahina.
Pokina Tirama mai Mamoe nahu ekia obia imiaꞌauna hanona aiara weiana aonai kate miaho.
Ena taꞌaraꞌi haukia katehore ia katekuti aina,
4 ba ia wairana kateihana,
haeamona Tirama atana hanona paukia ahakiai irere ꞌau.
5 Rabi ha weia keahaꞌi,
ramepa ꞌao beraura eakia hanona aꞌi katenuatae ainakia,
pokina Obiapaka Tirama kehore ea kebenakia.
Haeamona ia hanona obia ꞌarana haukiai kateao katepoki keaomo banaibanai.
Iesu Aba Kemai.
6 Epua,
aneru weiana ehina benaꞌu etibaha,
“ꞌAbi neiakia hanona toha tohakia mai kateba tohanakia.
Obiapaka Tirama weiana mahabanai haukia aubakia niba taburanakia ia pouna ṯehinana hauna ehore ena aneru euhuna taba aba katerama haukia ena taꞌaraꞌi haukia keba ihanakia.”
7 Iesu eꞌabi etibaha,
“Tomobahu,
Au hanona aba kawahi,
mahabanai ꞌabikia puka neiana aonai tikaꞌainakia haukia hanona tenamo.”
8 Au Ioane hanona taba neiakia aihanakia mai ꞌurukia aoꞌo.
Ba aia aoꞌo mai aihanakia murinai,
taba neiakia ebaihanaꞌu aneruna aena pokinai akaipehu kakuti aina nahoma.
9 Iamo ia ehore au ehina benaꞌu etibaha,
“Aꞌi kokuti ainaꞌu.
Au hanona taꞌaraꞌi hauꞌu oi ꞌabamu mai uahoꞌabamu mahabanai haukia ꞌabakia mai puka neiana ꞌabina ṯeꞌima haraina haukia ikoikiai ꞌabakia.
Oi hanona Tirama ikupaiana mo kokuti aina.”
10 Haeamona aneru weiana ehina benaꞌu etibaha,
“Puka neiana ena mahabanai ꞌabikia aꞌi kokaiabunakia,
pokina neiakia ikoikia katerama ranikia hanona aba herekai.
11 Maearima weiakia kiꞌa akakia tibabai haukia hanona kiꞌa akakia temebabai,
weiakia hoahoa ꞌopukia tibabai haukia hanona hoahoa ꞌopukia temebabai,
weiakia bero akakia tibabai haukia hanona bero akakia temebabai,
weiakia tirobe haukia hanona temerobe.”
12 Iesu eꞌabi etibaha,
“Tomobahu.
Au hanona aba kawahi.
Au kahore ikoimiai emi babai ihobokiai ha ha ꞌarami kabenimi paunai,
ꞌarami hanona kawahi ainakia.
13 Au hanona Alepa mai Omega,
Koriꞌuaina mai Murihaina,
taba ikoikiai iaꞌiramakia mai ibapuakia hauꞌu.”
14 Ekia habuni ṯeutunakia haukia hanona tenamo,
weiana ia hanona bero kateaꞌina mauri nibaibeni matiuna buabuana kateani,
mai aiara weiana Ierusalema mahamahana paꞌabina aonai katekatoto.
15 ꞌA aiara weiana kapenai hanona maearima weiakia waeha ꞌabakia haukia,
nepu baꞌari haukia,
nabau hoahoakia kiꞌa obokia tibabai haukia,
ahuahu haukia,
kaibaꞌuku ṯekuti haukia,
mai maearima weiakia baiꞌoi ꞌarina tiꞌari ekia ꞌabiꞌabiai mai ekia hoahoai tibaiꞌoi haukia ikoikiai.
16 “Au Iesu hanona eꞌu aneru auhuna ewahi ꞌabi tohakia neiakia kebaibeni waia Tirama ena marea haumi heremi.
Au hanona Davida obia ꞌarana hauna Ramuna mai ena rama hauꞌu.
Au hanona raurani bihiuna ꞌimarena.”
17 Auba Robe mai hawainibe mahamaha babiꞌena ohi tiꞌabi ṯetibaha,
“ꞌOmai!”
Tabana aia neiana niona hauna abomo meꞌabi metibaha,
“ꞌOmai!”
Tabana ꞌakona niꞌororo hauna hanona kemai.
Abomo tabana nenuatae hauna hanona kemai mauri beina ꞌarana ahaꞌi hauna keinu.
18 Puka neiana ena mahabanai ꞌabikia tiona haukia ikoikiai narobenakia.
Hau ha ꞌabi neiakia ahakiai ꞌabi haeai ha kehore ꞌauna raninai,
Tirama kehore iaꞌikiꞌa tabakia puka neiana aonai irere haukia ia ahanai kehore ꞌaunakia.
19 Ba hau ha mahabanai pukana neiana aonai ꞌabi ha keaꞌi parena raninai,
Tirama kehore ia ena itau weiakia mauri nibaibeni matiuna ahanai hauna mai aiara robena aonai hauna,
weiakia puka neiana aonai robakia teahu haukia,
ia herenai keaꞌi parenakia.
20 Iesu,
taba neiakia ꞌabikia nehina pounakia hauna netibaha,
“ꞌAbi tohana,
au hanona aba kawahi.”
Amen.
Obiapaka Iesu e,
ꞌomai.
21 Nabahubaꞌari,
Obiapaka Iesu ena aokoꞌo hoana hanona Tirama ena maearima ikoimiai heremiai kemiaho.
Amen.