Tirama Aubana Mai Auba Kiꞌa Obona.
4
Eꞌu hau kiꞌami e,
Auba Robe teaꞌina ṉa tiho haukia ikoikiai ekia ꞌabi aꞌi katoba tohanakia,
ia katohobo ꞌuainakia katoꞌiobina auba weiana hanona Tirama herenai emai ꞌao.
Pokina mahabanai haukia baiꞌoikia boꞌokia hanopakai aba tewaira tina ꞌeka maikoinai.
2 ꞌA wai Tirama ena Auba Robe eaꞌina hauna hanona taeara neianai koꞌiobina:
Hau ha kehina pouna Iesu Keriso hanona hauaniai emai hanopakai raninai,
auba weiana ia eaꞌina hauna hanona Tirama herenai emai.
3 Ia auba ha Iesu nebuniaina hanona Tirama herenai aꞌi emai.
Auba weiana hanona Keriso ena ꞌou hauna Tiaporo herenai emai.
Pouna tona kemai ia aba emai bariu hanopaka neiana aonai.
4 Nahaꞌu kiꞌami e,
wai hanona Tirama ꞌeuna,
mahabanai haukia baiꞌoikia tobaꞌehonakia,
pokina Tirama ena Auba aomiai nemiaho hauna etabura kiꞌa baha ba tiaporo weiana hanopaka haukia herekiai.
5 Ia mahabanai baiꞌoikia hanona hanopaka ꞌeuna,
ua buonai hanopaka ꞌabikia mo ṯehinanakia hanopaka haukia ia aiakia tiona.
6 Ia aika hanona Tirama ꞌeuna,
hau ha Tirama eꞌiobina hauna hanona aiaka keona,
ia hau ha Tirama ꞌeuna ahaꞌi hauna hanona aiaka aꞌi keona.
Ihaiha nahomanai ꞌabi tohana aubana mai baiꞌoi aubana hanona aba kahaꞌiobi ainakia.
Tirama Hanona Raonaꞌau.
7 Eꞌu hau kiꞌami e,
ha ha hamaraonaꞌau ainaka,
pokina raonaꞌau hanona Tirama herenai emai.
Niraonaꞌau hauna hanona Tirama nahunai niao,
abomo Tirama neꞌiobina.
8 ꞌA aꞌi niraonaꞌau hauna hanona Tirama aꞌi eꞌiobina,
pokina Tirama hanona raonaꞌau.
9 Tirama hanona ena raonaꞌau ṉa ebaiha aihonaka,
Nahuna hamo hamona euhuna emai hanopakai,
weiana ia paunai aika kahamauri.
10 Raonaꞌau tohana hanona neiana:
Aika Tirama aꞌi haraonaꞌau aina,
ia Tirama aika eraonaꞌau ainaka paunai Nahuna euhuna emai aika eka kiꞌa ihina haona tabanai eao.
11 Eꞌu hau kiꞌami e,
Tirama hanona ṉa eraonaꞌau aihonaka buonai,
aika abomo ꞌabaka ha ha ua kaharaonaꞌau aihonakia.
12 Hau ha Tirama aꞌi eiha ꞌapuana,
iamo aika ꞌabaka ha ha kaharaonaꞌau ainakia raninai,
Tirama hanona aika aokai nemiaho,
ena raonaꞌau hanona aba nitabura ꞌau aika aokai.
13 Tirama Auba Robe ebenaka buonai,
haꞌiobina aika hanona Tirama aonai nahamiaho haeamona ia abomo aika aokai nemiaho.
14 Tirama Nahuna euhuna emai hanopakai maearima ibamaurikia haunai eao,
weiana ai aba taihana mai ṯahina pouna.
15 Hau ha ena ꞌabiai keba tohana Iesu hanona Tirama Nahuna raninai,
Tirama hanona ia aonai nemiaho,
ia abomo Tirama aonai nemiaho.
16 Tirama niraonaꞌau ainaka hauna haꞌiobina mai nahaꞌikakaumana.
ꞌAbi tohana Tirama hanona raonaꞌau.
Hau ha maearima niraonaꞌau aina hauna hanona Tirama aonai nemiaho,
Tirama abomo ia aonai nemiaho.
17 Taeara neianai raonaꞌau aokai aba nitabura ꞌau,
ba weianai aika hanona aꞌi kahataꞌu Tirama ena bakai wapuna aonai,
pokina hanopaka neiana aonai eka mauri hanona Keriso ena mauri ihobona.
18 Tirama ena raonaꞌau aonai hanona aꞌi kahataꞌu,
Tirama ena raonaꞌau taburana hanona taꞌu maikoina neuꞌu ahinakia,
pokina taꞌu aonai puma raonana nemiaho.
Ua buonai hau ha nitaꞌu hanona ia aonai raonaꞌau aꞌi nitabura harai baha.
19 Aika ha ha ꞌabaka naharaonaꞌau ainakia pokina Tirama aika eraonaꞌauai ꞌuainaka paunai.
20 Hau ha niꞌabi ia Tirama niraonaꞌau aina iamo uahoꞌabana ꞌarina aꞌi niꞌari raninai,
ia hanona baiꞌoi hauna.
Hau ha uahoꞌabana nahaihana hauna aꞌi niraonaꞌau aina hanona Tirama aꞌi nahaihana hauna keraonaꞌau aina aꞌi ketaina.
21 Keriso rauhubu ꞌabina ebenaka hauna neiana:
Tirama niraonaꞌau aina hauna hanona uahoꞌabana abomo keraonaꞌau aina.