Aꞌikakauma Haukia Hanopaka Ena Hoahoa Tibaꞌehonakia.
5
Maearima weiana Iesu hanona Keriso niaꞌikakaumana hauna hanona Tirama nahuna,
Hama niraonaꞌau aina hauna hanona nahuna abomo niraonaꞌau ainakia.
2 Tirama naharaonaꞌau aina mai ena rauhubu ꞌabikia nahakaꞌa ainakia raninai,
neianai kahaꞌiobi haraina aika hanona Tirama nahuna naharaonaꞌau ainakia.
3 Aika Tirama naharaonaꞌau aina hanona ena rauhubu ꞌabikia kahakaꞌa ainakia.
Abomo ena rauhubu ꞌabikia hanona aꞌi tepahihi aika herekai.
4 Pokina Tirama nahuna ikoinai hanona hanopaka hiabuna tibaꞌehona.
Aika Tirama nahaꞌikakaumana,
hoahoa neianai hanopaka ena hiabu nahabaꞌehona.
5 Ua buonai hanopaka hiabuna tibaꞌehona haukia hanona weiakia tiaꞌikakauma Iesu hanona Tirama Nahuna haukia mo ikupaiakia.
Tirama Ehore Nahuna Pouna Ehinana.
6 Iesu Keriso hanona beiai mai aruaruai emai,
beiai eꞌuere robe mai matiu ibiri ropo ꞌarunai eꞌari.
Ia hanona beiai mo aꞌi emai,
ia beiai mai aruaruai emai.
Auba Robe abomo nibatohana,
pokina Auba Robe hanona Tirama ena ꞌabi tohana.
7 Ua buonai teaihau hanona Iesu tibatohana:
8 Auba Robe,
bei,
mai aruaru,a
teaihau ekia ꞌabi hanona hamona,
Iesu hanona Tirama Nahuna.
9 Aika maearima tebatohana ꞌabina nahaꞌi taeanakia,
ia Tirama ebatohana ꞌabina hanona eapaꞌua kiꞌa baha pokina ia hanona Tirama,
ebatohana ꞌabina hanona ia Nahuna pouna.
10 Maearima ha Tirama Nahuna niaꞌikakaumana hauna hanona batoha ꞌabina neiana ia aonai nemiaho.
Tirama aꞌi niaꞌikakaumana hauna hanona Tirama baiꞌoi haunai nibaona,
pokina maearima weiana hanona Tirama ebatohana ꞌabina Nahuna herenai eꞌuahina hauna aꞌi niaꞌikakaumana.
11 Tirama ebatohana ꞌabina hanona neiana:
Tirama hanona mauri banaibanai ebenaka,
ba mauri neiana hanona Nahuna Iesu Keriso aonai nemiaho.
12 Tirama Nahuna eaꞌina hauna hanona mauri aba eaꞌina,
ꞌa Tirama Nahuna aꞌi eaꞌina hauna hanona mauri aꞌi eaꞌina.
Mauri Banaibanai.
13 Tirama Nahuna atana tuaꞌikakaumana haumi marere neiana narere benimi,
pokina wai katoꞌiobina mauri banaibanai hanona aba toaꞌina.
14 Aika hanona tabura neiana haꞌina Tirama wairanai,
aika ia ena nuatae ihobonai kahanoina raninai aiaka niona.
15 Aika haꞌiobina Tirama herenai taba taba kahanoi ainakia hanona aiaka niona raninai,
haꞌiobi haraina hanoiai tabakia hanona aba haꞌinakia.
16 Hau ha uahoꞌabana herenai kiꞌa weiana aꞌi kebaꞌari baihana hauna neihana raninai ahanai kebahubaꞌari,
ba Tirama kehore uahoꞌabana weiana mauri kebena.
Au maearima weiakia ekia kiꞌa aꞌi keaoainakia ꞌari ꞌekana hauna naꞌuahina.
Ia maearima baika kiꞌa ha tibabaina weiana keaoainakia ꞌari ꞌekana.
Au kiꞌa weiana ahanai kebahubaꞌari hauna robana aꞌi nahuna.
17 Beho babai ikoinai hanona kiꞌa,
ia kiꞌa baika hanona aꞌi tiaoainaka ꞌari banaibanai ꞌekana.
18 Aika haꞌiobina Tirama nahunai tiao haukia hanona kiꞌa aꞌi tibabai toꞌona.
Tirama Nahuna niꞌaeabunakia,
hau kiꞌa obona ia aꞌi keaꞌi ꞌapuanakia.
19 Haꞌiobina aika hanona Tirama nahuna,
ia hanopaka maikoina hanona hau kiꞌa obona ena hiabu aonai.
20 Abomo aika haꞌiobina Tirama Nahuna emai hanona aoka ebaeana,
weianai aika Tirama tohana kahaꞌiobina,
haeamona aika hanona Tirama tohana aonai mai Nahuna Iesu Keriso aonai nahamiaho.
Iesu Keriso hanona Tirama tohana abomo ia hanona mauri banaibanai pokina.
21 Nahaꞌu kiꞌami e,
baiꞌoi tiramakia herekiai katoꞌima ꞌima harainimi herekiai katokapare.