Tirama Nahunai Nahaeao Hauka.
3
Hamaraona harai,
Hamaka ena raonaꞌau herekai eapaꞌua kiꞌa baha ba eaparinaka aika hanona Tirama nahuna.
Aika hanona ia nahuna tohaka.
Hanopaka haukia aꞌi ṯeꞌiobinaka ena poki hanona ia Tirama aꞌi ṯeꞌiobina paunai.
2 Eꞌu hau kiꞌami e,
bariu aika hanona Tirama nahuna,
ia aika maearima aehomaka hanona aꞌi niwaira tina harai baha,
iamo aika haꞌiobina Keriso kewaira tina raninaia aika hanona ia ꞌabanai kahaeao,
pokina ia tohana kahaihana.
3 Maearima ikoinai Keriso herenai buabeni neianai ṯemiaho haukia hanona kipokia aokia kiꞌa keahaꞌi ihobona Keriso aona kiꞌa eahaꞌi ꞌabana.
4 Hau ha kiꞌa nibabaina hanona Tirama ena rauhubu niꞌoatana,
pokina kiꞌa hanona rauhubu niꞌoatana.
5 Ia wai aba toꞌiobina Keriso ewaira tina hanona kiꞌa keaꞌi pare,
ia aonai hanona kiꞌa ha ahaꞌi.
6 Ua buonai hau ha Keriso ohi ṯemiaho oioi hauna hanona kiꞌa aꞌi nibabai toꞌona.
Ia hau ha kiꞌa nibabai toꞌona hauna hanona Keriso aꞌi eiha tinana abomo aꞌi eꞌiobina.
7 Nahaꞌu kiꞌami e,
hau ha beho babai ꞌekakiai aꞌi meaoainimi.
Hau ha aka berona nibabaina hauna hanona ebero,
ihobona Keriso ebero ꞌabana.
8 Kiꞌa nibabai toꞌona hauna hanona Tiaporo ꞌeuna,
pokina Tiaporo hanona aba popounai kiꞌa ebabaina emai mo bariu.
Tirama nahuna ewaira tina ena poki hanona neiana,
Tiaporo ena aka kebapururuna.
9 Hau ha Tirama nahunai niao hauna hanona kiꞌa aꞌi nibabai toꞌona,
pokina mauri mahamahana weiana Tirama herenai emai hauna ia aonai nemiaho.
Ia Tirama ꞌeunai erama paunai kiꞌa aꞌi kebabai toꞌona.
10 Weiana Tirama nahuna mai Tiaporo nahuna baiatakia kahaꞌiobi haraina.
Hau ha aka berona aꞌi nibabaina ꞌao uahoꞌabana aꞌi niraonaꞌau aina hanona Tirama nahuna ahaꞌi.
Aika Ha Ha Kaharaonaꞌau ainaka.
11 ꞌUainai toaꞌikakauma aonai pou tona hauna neiana:
Aika ha ha kaha raonaꞌau ainaka.
12 Kaino ꞌabanai aꞌi katoao,
ia hanona Tiaporo ena maearima,
kipona hatina Abela eahu ꞌarina.
Taba buonai Kaino Abela eahu ꞌarina?
Pokina ia ena hoahoa hanona tekiꞌa,
ia hatina ena hoahoa hanona tebero.
13 Uahoꞌabaꞌu e,
hanopaka haukia ꞌarimi aꞌi kateꞌari reꞌa,
aꞌi katotaꞌu taꞌu huri.
14 Aika uahoꞌabaka naharaonaꞌau ainakia paunai haꞌiobina aika hanona ꞌari aonai aba hakarahi mauri mahamahana aonai hatoto.
Ia hau ha ena raonaꞌau ahaꞌi hauna hanona ꞌari aonai nemiaho ohomo.
15 Uahoꞌabana ꞌarina aꞌi niꞌari hauna hanona ahuahu hauna,
wai toꞌiobina ahuahu hauna aonai hanona mauri banaibanai aꞌi nemiaho.
16 Keriso ena mauri ebaibeni aika paukai.
Neianai aika raonaꞌau tohana hanona taba haꞌiobina.
Ua buonai aika abomo eka mauri kahabaibeni uahoꞌabaka paukiai.
17 Herenai taba teboꞌo hauna uahoꞌabana neuraru hauna neihana iamo aꞌi nibaraina raninai,
haꞌiobina Tirama ena raonaꞌau hanona ia aonai aꞌi nemiaho.
18 Nahaꞌu kiꞌami e,
eka raonaꞌau hanona ꞌabiai mo mai pinakai mo aꞌi kahahina ꞌabaeana,
ia eka raonaꞌau hanona eka hoahoa tohanai kahabaiha baiha aina.
Kahanuakoꞌo Tirama Wairanai.
19 Taeara neianai kahaꞌiobina aika hanona Tirama ena ꞌabi tohana kipokia nahamiaho,
haeamona aoka ketabura Tirama wairanai.
20 Aoka kehinabe kiꞌanaka reꞌa,
aika haꞌiobina Tirama hanona eapaꞌua kiꞌa baha ba aika aoka mai haꞌiobi tabakia maikoina,
abomo ia hanona taba ikoikiai neꞌiobinakia.
21 Eꞌu hau kiꞌami e,
aika aoka aꞌi kehinabe kiꞌanaka raninai aika mai taburaka Tirama wairanai kahakoroti.
22 Ba herenai taba ikoinai kahanoi haukia kebenaka,
pokina ena rauhubu ꞌabina nahakaꞌaina mai ibaonamona akana nahababaina.
23 Tirama ena rauhubu ꞌabina hanona neiana,
aika Ia Nahuna Iesu Keriso atana kahaꞌikakaumana mai ehina benaka ꞌabana,
ha ha kaharaonaꞌau ainaka.
24 Tirama ena rauhubu ꞌabina nikaꞌaina hauna hanona Tirama aonai nemiaho,
Tirama abomo ia aonai nemiaho.
Tirama Auba Robe ebenaka paunai,
aika haꞌiobina Tirama hanona aika aokai.