Keriso Hanona Aika Ibaraika Hauna.
2
Nahaꞌu kiꞌami e,
au neiana narerena niwahi heremi hanona wai kiꞌa ha aꞌi katobabaina paunai.
Ia hau ha kiꞌa nibabaina raninai aika ibaraika hauna ha nemiaho Hamana kehina bena aika paukai,
ia hanona bero hauna Iesu Keriso.
2 Ia kipona ena mauri ebaibeni bairarao tabanai eao eka kiꞌa ihina haona paunai,
aika ikupaiaka mo paukai ahaꞌi ia maearima ikoinaia ekia kiꞌa paunai.
3 Aika Tirama ehina benaka ꞌabikia nahakaꞌa ainakia raninai kahaꞌiobina aika hanona Tirama haꞌiobina.
4 Hau ha peꞌabi petibaha,
“Au Tirama aꞌiobina,”
ia Tirama ena rauhubu aꞌi nikaꞌainakia raninai,
hau weiana hanona baiꞌoi hauna,
ia aonai Tirama ena ꞌabi tohana hanona aꞌi nemiaho.
5 Hau ha Tirama ena ꞌabi nikaꞌainakia hauna hanona Tirama niraonaꞌauaib tohana.
Weianai kahaꞌiobi haraina aika hanona Tirama herenai nahamiaho.
6 Hau ha niꞌabi ia Tirama herenai nemiaho hauna hanona Iesu emauriaina maurina ihobonai kemauri.
Rauhubu ꞌAbina Mahamahana.
7 Eꞌu hau kiꞌami e,
rauhubu ꞌabina neiana narerena niwahi hauna hanona mahamahana ahaꞌi,
ia rauhubu ꞌabina ꞌaiꞌaina aba ꞌuainai toaꞌikakauma aonai toaꞌina,
rauhubu ꞌabina ꞌaiꞌaina neiana hanona aba toꞌona ꞌabina.
8 Iamo rauhubu ꞌabina neiana hanona mahamahana,
anina tohana hanona Keriso mai wai heremiai aba nahaihana,
pokina wapura hanona aba nikapare,
ea tohana aba nirara.
9 Hau ha niꞌabi ia hanona ea aonai nemiaho,
iamo uahoꞌabana ꞌarina aꞌi niꞌari hauna hanona bariu wapura aonai nemiaho ohomo.
10 Hau ha uahoꞌabana niraonaꞌau aina hanona ea aonai nemiaho,
ba herenai kiꞌa ahaꞌi,
hau ha aꞌi kebabehona.
11 Ia hau ha uahoꞌabana ꞌarina aꞌi niꞌari hauna hanona wapura aonai nemiaho mai wapura aonai nikaꞌa.
Wapura ehore ia mahana aba ekaiabunakia buonai,
aeana niao hanona aꞌi neꞌiobina.
12 Nahaꞌu kiꞌami e,
narere benimi ena poki hanona
emi kiꞌa Keriso atanai
aba ihina hao.
13 Hamamai haumi e,
narere benimi ena poki hanona
wai hau weiana popounai
emiaho emai mo bariu hauna
aba toꞌiobina.
Hau ꞌaruꞌarumi e,
narere benimi ena poki hanona
wai hau kiꞌa obona aba
tobaꞌehona.
14 Nahaꞌu e,
narere benimi ena poki hanona
wai Hamaka toꞌiobina.
Hamamai haumi e,
narere benimi ena poki hanona
wai hau weiana popounai
emiaho emaimo bariu hauna
aba toꞌiobina.
Hau ꞌaruꞌarumi e,
narere benimi ena poki hanona
tutabura Tirama ena ꞌabi
wai aomiai nemiaho ba
hau kiꞌa obona aba tobaꞌehona.
15 Hanopaka mai aonai ṯemiaho tabakia ikoinai aꞌi katoraonaꞌau ainakia,
iamo hau ha hanopaka niraonaꞌau aina raninai,
ia hanona Hamaka aꞌi niraonaꞌauai tohana.
16 Pokina hanopaka aona tabakia ikoikiai hanona hauani ena nuatae kiꞌa tabakia katebabai,
maha ena nuatae kiꞌa tabakia kateiha,
mai obia tabakia kateapainakia,
uahomakia ikoikiai hanona Hamaka herenai aꞌi timai ia hanopaka herenai timai.
17 Hanopaka mai aona inuatae aina tabakia ikoikiai aba tiꞌakauma ore,
ia Tirama ena nuatae akana tibabaina haukia hanona katemauri banaibanai.
Keriso Ena ꞌOu Hauna.
18 Nahaꞌu e,
hanopaka kepua ranina hanona aba ekaraꞌau.
Pou aba tona Keriso ena ꞌou hauna nimai,
ia bariu Keriso ena ꞌou haukia boꞌokia hanona aba tewaira tina.
Ua buonai aika haꞌiobina rani puana hanona aba ekaraꞌau.
19 Maearima weiakia hanona herekai tekarahi pokina ia hanona aika ꞌabaka tohakia ahaꞌi.
Ia aika ꞌabaka haukia raninai,
aika kipokia pahamiaho haeamo.
Iamo ekia kaꞌa oboai kahaꞌiobi haraina ia hanona aika ꞌabaka ahaꞌi.
20 Ia wai hanona Auba Robe weiana Robe hauna Keriso ebaibeni hauna aba toaꞌina aomiai,
ua buonai wai ikoimiai Tirama ena ꞌabi tohana toꞌiobina.c
21 Au wai narere benimi hanona Tirama ena ꞌabi tohana aꞌi toꞌiobina paunai ahaꞌi,
ia wai hanona Tirama ena ꞌabi tohana aba ṯoꞌiobina.
Ba wai aba toꞌiobina baiꞌoi hanona Tirama ena ꞌabi tohana herenai aꞌi nimai.
22 Baiꞌoi hauna hanona tai?
Ia hauna niꞌabi Iesu hanona Keriso ahaꞌi.
Maearima uahomana hanona Keriso ena ꞌou hauna,
ia hanona Hama mai Nahu ohi nebuniainakia.
23 Hau ha Nahu nebuniaina hauna hanona ia herenai Hama ahaꞌi.
Hau ha Nahu nibatohana hauna hanona Hama abomo ia herenai.
24 Popounai ꞌabi tona hauna hanona aomiai kemiaho.
Tona ꞌabina weiana katokaꞌaina raninai,
wai hanona Nahuna aonai mai Hamana aonai katomiaho.
25 Neiana hanona Keriso kipona eꞌabiꞌuai aika ꞌeuka,
mauri banaibanai kebenaka.
26 Narere benimi weiakia ekia nuatae kateꞌoinimi haukia robakia ahuna.
27 Ia wai hanona Keriso ehore Auba Robe ebenimi aomiai nemiaho,
ua buonai maearima ha aꞌi keba ꞌiobinimi reꞌa abetaina.
Pokina Auba Robe hanona taba ikoinai nibaꞌiobinimi,
ena baꞌiobi hanona tohakia,
ia aꞌi nibaiꞌoi.
Auba Robe ebaꞌiobinimi ihobonai rani ikoinai Keriso aonai katomiaho.