Marere Koriꞌuaina
IOANE
Ererena Hauna
Mauri ꞌAbina.
1
Au bariu pou narere benimi hanona hau weiana popouna ꞌakinai emiaho hauna,
weiana hauna haiamaiai taona,
mahamaiai taihana,
mahamai tohanai taiha haraina mai imamaiai taꞌi ꞌapuana.
Ia hanona Mauri ꞌAbina Keriso weiana mauri pokina hauna.
2 Mauri neiana hanopakai ewaira tina.
Mauri banaibanai hauna Keriso neiana taihana paunai pouna ṯahinana ṯairoro aina heremiai.
Ia hanona Hamana ohi temiaho ba heremaiai ewaira tina.
3 Ai taba taihana abomo ꞌuruna taona hauna ṯairoro aina heremiai hanona wai mai ai kipokia kahabahaeamo.
Eka bahaeamo hanona Hamaka mai Nahuna Iesu Keriso aba aika kipokia.
4 Ai ṯarere benimi ena poki hanona kipokia kahaonamo haeamo.
Tirama Hanona Ea.
5 Pou Keriso herenai taona hauna bariu ṯairoro aina heremiai hanona neiana.
Tirama hanona ea,
Ia aonai hanona wapura ha ahaꞌi ꞌakina.
6 Aika pahaꞌabi Tirama kipokia nahaba haeamo iamo wapura aonai nahakaꞌa raninai aika hanona nahabaiꞌoi mai Tirama ena ꞌabi tohana aꞌi nahakaꞌaina.
7 Ia Tirama ea aonai nemiaho ꞌabana aika eai nahakaꞌa raninai aika hanona ꞌabaka kipokia kahabahaeamo,
Nahuna Iesu aruarunai eka kiꞌa ikoikiai neutu obonakia.
8 Aika pahaꞌabi eka kiꞌa ahaꞌi raninai aika kipoka nahabapoꞌonaka abomo Tirama ena ꞌabi tohana hanona aokai ahaꞌi.
9 Ia aika eka kiꞌa Tirama wairanai kahahina pounakia raninai ia hanona aia ibabua ꞌauna hauna mai bero hauna ba eka kiꞌa kehina haonakia abomo eka beho ikoikiai keutu obonakia.
10 Aika pahaꞌabi kiꞌa ha aꞌi hababaina raninai Tirama hanona baiꞌoi haunai nahabaona,
abomo ena ꞌabi hanona aokai ahaꞌi ꞌakina.