Mahabanai Baiꞌoikia Haukia Ekia Hoahoa Kiꞌa Obokia.
2
ꞌUainai Isaraela haukia baiatakiai mahabanai haukia baiꞌoikia baika temiaho ihobona mo baꞌiobi haukia baiꞌoikia baika baiatamiai katewaira tina.
Ekia baꞌiobi baiꞌoikia weiakia emi aꞌikakauma kateaꞌi kiꞌana haukia tibaꞌiobiai,
Obiapaka weiana aruarunai ekawanakia hauna ṯebuniaina,
weiana kipokia ibapururukia akana tibabai noanoana.
2 Maearima boꞌona ia taikia katetai nabau hoakia katebabai,
ba babai weiakia paukiai maearima Tirama ena ꞌabi tohana herenai kateꞌabi kiꞌa.
3 Baꞌiobi haukia ekia aoꞌaea paunai baiꞌoi orikiai aomi kateani,
iamo ekia bakai hanona aba waꞌi baha eꞌoru nemiaho abomo ibapururukia hauna hanona enoꞌa nibaiꞌima.
4 Pokina Tirama aneru tebeho haukia aꞌi eiha haonakia,
ia iruba niꞌara banaibanai ꞌekana aonai ekapo totonakia,
weia ꞌuri wapurana aonaia ṯemiaho bakai wapuna ṯeꞌimana.
5 Tirama uru ꞌaiꞌaina aꞌi eiha haona,
ia tou ebakarahina Tirama aꞌi timariki aina haukia ebapururunakia.
Ia Noa bero eiroro aina hauna mai ꞌabana ꞌabaihau hamomo kipokia eba maurinakia.
6 Tirama ehore Sodoma mai Gomora aiara kiꞌa obokia puma ebahoainakia ba irubai ehuhu abunakia teaomo teabururu,
weiana ꞌabana hanona Tirama aꞌi timariki aina haukia herekiai kerama.
7 Tirama ehore bero hauna Lota ebamaurina,
ia hanona maearima weiakia rauhubu tikabenakia haukia ekia maha poreporeai aona eatetua.
8 (Pokina bero hauna Lota hanona weia baiatakiai emiaho mara mara ekia babai kiꞌa eihanakia mai ꞌurukia eoꞌo,
ba babai weiakia tehore ia aona tebatetuana.)
9 Ua buonai Obiapaka hanona ia timariki aina haukia baihobo aokiai aea kebarobo mauri aihonakia hauna eꞌiobina mai aka kiꞌa haukia puma ihoaina ꞌekanai aea kebamiaho aihonakia keaomo bakai wapunai hauna abomo eꞌiobina.
10 Weiakia ahakiai hanona hauani ena raona akakia kiꞌa obokia tikaꞌainakia ia Tirama ena hiabu aꞌi timariki aina haukia hanona puma rarina katehoai kiꞌa bahana.
Baꞌiobi haukia baiꞌoikia neiakia hanona ṯenuakoꞌo mai tiapa,
ekia mariki ahaꞌi weiana nuabi haukia kupai ṯemiaho haukia herekiai tiꞌabi kiꞌa.
11 Nuabi haukia weiakia ekia tabura mai ekia hiabu hanona teapaꞌua kiꞌa baha ba baꞌiobi haukia baiꞌoikia neiakia,
iamo nuabi haukia hanona Obiapaka wairanai baꞌiobi baiꞌoikia iaꞌi kiꞌakia ꞌabina aꞌi ṯehinana.
12 ꞌA maearima neiakia hanona taba obokia aꞌi tiobo haukia tiꞌabi kiꞌa ꞌabi kiꞌa,
ihobona mahi weiakia ekia raona ahaꞌi ekia nuataeai mo ṯemiaho haukia ꞌabakia maearima ia kate aꞌinakia kateahu ꞌarinakia paunai terama,
ia abomo katepururu matoha ꞌaki mahikia ꞌabana.
13 Ekia aka kiꞌa weiakia tibabai haukia ꞌarana ihobo kateaꞌina.
Ia hanona mararani tohakiai hauani hoahoakia kiꞌa obokia ibabaikia hanona tiaonamoai,
ba kipokia katoaniani haeamo aonai abomo kateba haumaeanimi mai atami kateaꞌi kiꞌanakia.
14 Aokia hanona maha poreporeai ebonu nabau mai babai kiꞌa ibabaikiai aꞌi tibaoao,
babiꞌe aokia aꞌi tetabura haukia tiaoainakia kiꞌa ꞌekanai,
aokia teuhore mai ia hanona Tirama ena ururu aonai.
15 Baꞌiobi haukia baiꞌoikia neiakia hanona taeara berona aba tereana mai tiaru ꞌabaea aru ꞌabaea Beor nahuna mahabanai hauna Balam murinai tikaꞌa,
ia hanona aka kiꞌa ꞌarana moniai keaꞌina hauna eraonaꞌauai kiꞌa bahana.
16 Ena babai kiꞌa paunai kipona ena doniki ꞌabi aꞌi neꞌiobina hauna ehore maearima maeakiai ia erikena,
weiana mahabanai hauna aona ea ena aoꞌabaea weiana kaꞌana niaoaina hauna ebapuana.
17 Maearima neiakia hanona matoha ateate weiakia beikia teꞌororo haukia ꞌabana ekia ꞌabi anina ahaꞌi ꞌao baura taburana ꞌauhao niabuao abuaona ꞌabana abara aꞌi nimaiaina,
ba Tirama ꞌeka ewapura kiꞌa baha hauna aba ebaꞌoruna ia ꞌeukia.
18 Ekia apa mai poꞌo ꞌabikia ṯehina abomo maha porepore hoahoakia kiꞌa obokia tibabai maearima weiakia bariu mo beho ꞌekakiai ṯemiaho haukia baiatakiai tikarahi haukia katemue ainakia.
19 Ia tiꞌabiꞌuai weiakia hanona kiꞌa taꞌarana aꞌi kateaꞌi,
iamo ia kipokia hanona kiꞌa akana weiana tibabaina hauna taꞌarana iaꞌina haukiai tiao,
pokina taba ha maearima ena mauri nipoki aina raninai ia hanona weiana taꞌarana iaꞌina haunai niao.
20 Maearima hanopaka maurina ꞌopunai tikarahi timai eka Obiapaka Bamauri hauna Iesu Keriso ṯeꞌiobina haeamona ṯemue hanopaka ena kiꞌa aonai ba nipoki ainakia raninai,
maearima uahomakia hanona herekiai kekiꞌa kiꞌa baha ba ꞌuainai mauri temiaho aina hauna.
21 Maearima uahomakia hanona taeara berona aꞌi pateꞌiobina hanona penamo,
ia teꞌiobina haeamona rauhubu robena tebenakia hauna herenai tikaobo hanona aꞌi enamo.
22 Aobero ꞌabina ia herekiai hauna hanona etoha,
“Waeha nemue kipona eaiora hauna niani,
mai aiporo eꞌuere harai ꞌaki ia haeamona nemue niao tipuai neno taoꞌataoꞌa.”