Obiapaka Ena Mai ꞌAbiꞌuaina.
3
Eꞌu hau kiꞌami e,
bariu neiana hanona eꞌu marere ibaruana narerena niwahi heremi,
marere koriꞌuaina mai neiana ohi arerenakia hanona taba neiakiai nabaraona muenimi weiana emi raona raona katebero harai.
2 Eꞌu nuatae hanona ꞌabi aba waꞌi baha ꞌakinai mahabanai haukia tehinanakia haukia mai rauhubu ꞌabikia weiakia eka Obiapaka mai Bamauri hauna ena iuhubeau haukia tehore tebaibeni haukia katoraona ꞌininakia.
3 Koriꞌuaina katoꞌiobi haraina weiana rani orekia aokiai bapoꞌo poꞌo haukia baika katekarahi,
ia ekia mauri hanona kipokia hauanikia ena nuatae neꞌuai ainakia haukia,
wai katebapoꞌonimi,
4 ṉa kateꞌabi aiho,
“Iesu eꞌabiꞌuai kemai,
uhe?
Ba ia aeꞌe?
ꞌAbaꞌabaka aba teꞌari ore,
ꞌa taba ikoikiai hanona ꞌekakiai mo hanopaka erama raninai emai mo bariu.”
5 Iamo ekia ꞌabi hanona aꞌi tebero ꞌabi tohana hanona aꞌi tiraona ꞌinina,
weiana waꞌi baha ꞌakinai Tirama ena ꞌabiai kupa mai hanopaka terama,
ba hanopaka hanona ꞌakupaka aonai ekara ꞌau erama mai ꞌaku ehore hanopaka ekakaiarona.
6 Haeamona bei ehore hanopaka ꞌaiꞌaina touai ebapururuna.
7 Tirama ena ꞌabi hamonamo weiana ehore kupa mai hanopaka bariu ṯemiaho haukia eaꞌi ꞌininakia irubai kebapururunakia,
ia keaomo Tirama aꞌi timariki aina haukia ekia bakai mai pururu wapunai.
8 Eꞌu hau kiꞌami e,
taba hamona neiana hanona aꞌi katoreana,
Obiapaka wairanai wapu hamona mai ihau taha hamona (1,000) hanona ekia haeai ahaꞌi,
terarua hanona ihobo.
9 Obiapaka hanona aꞌi emahari ena ꞌabiꞌuai akakia ibabaikiai,
baika tiraonana ꞌabana ahaꞌi,
ia hanona oi nibahuainiꞌo pokina aꞌi nenuatae hau ha aꞌi keꞌakauma,
ia nenuatae maearima ikoikiai ekia kiꞌai kateraona kabe.
10 ꞌA Obiapaka ena rani kemai hanona matoha bainao hauna ꞌabana,
rani weianai hanona ꞌuru rarina ꞌakina kebua aonai kupa kateꞌakauma,
kupa aona tabakia ikoikiai irubai kateara,
haeamona hanopaka mai ahanai tabakia ikoikiai kateꞌakauma.a
11 Taba ikoikiai hanona ua katepururu aiho raninai,
wai hanona maearima aea homamiai patoao?
Emi mauri hanona katerobe mai Tirama imarikiaina maurinai katomiaho.
12 Tirama ena mai wapuna ṯoꞌimana aonai katoaka tabura wapu weiana ena mai kenoanoa.
Wapumo weianai hanona kupa kateꞌara ꞌakauma mai kupa tabakia iruba hiabunai kateobo.
13 Ia aika hanona Tirama eꞌabiꞌuai aina hauna nahaꞌimana,
weiana hanona kupa mai hanopaka mahamahana aka bero haukia mo katemiaho aina ꞌekana.
14 Ua buonai,
eꞌu hau kiꞌami e,
wapu weiana ṯoꞌimana aonai katoaka tabura,
kiꞌa aꞌi katobabai mai aꞌi katobeho Tirama wairanai haeamona mai baibuami ia kipokia katomiaho.
15 Katoraona ꞌinina eka Obiapaka ena bakiroai hanona aika kebamaurinaka.
Uahoꞌabaka eka raonaꞌau hauna Paulo aobero weiana Tirama ebena haunai ꞌabi ihobona erere benimi.
16 Ena marere ikoinai aokiai taba neiakia robakia eahunakia,
taba baika hanona tepahihi mai obokia aꞌi kahaobo,
weiana maearima ekia ꞌiobi tekoꞌikoꞌi haukia mai aokia aꞌi tepahihi haukia tihore ꞌabi anina ṯehina kuꞌa banaina ihobona Puka robena ꞌabina baika tibabaina ꞌabana.
Weiana tibabaina hanona ia kipokia kateba pururunakia.
17 Ua buonai,
uahoꞌabaꞌu kiꞌami e,
wai neiana toꞌiobina hanona katoꞌima ꞌima harainimi,
weiana rauhubu tikabena haukia ekia beho aꞌi temeba kaparenimi,
aꞌi tomoꞌeho marikina.
18 Ia eka Obiapaka mai Ibamaurika hauna Iesu Keriso ena aokoꞌo hoana mai ia iꞌiobinai katoapaꞌua.
Nabahubaꞌari nuabi hanona ia herenai bariu keao mo banaibanai.
Amen.